Read Khiamniungan Naga 1 Sam 1 Bible Online

1 Sam 1 - Khiamniungan Naga bible

1 Sam 1

¹Efraim king goumchi Rama noksong ko kihtsün Efraim kau ainou Elkana ta niankü khaiunia tsak noiküla. Apa Jeroham thso, Tohu tsamkhaiu ainou Elihu thsao Zup pothso ko nou tsak noiküla.

²Apa tsammongnyiu nime tsak nian Hanna, naiuso tsak nian Peninna noiküla. Peninna tü methso chetlut, lüko Hanna to luon noiküla.

³Pon pungkü Elkana Rama noksong ainou Shilo ai Apemshiotsün APAOU tü amkhamao naiuso aloat chaithio kiuao khu. Nungai Eli meson thso melothso nime Hopni naiuso Phinehas ne APAOU ün meson noiküla.

⁴Elkanaüh aloat chaithio kiutsün pungkü nyih amtsan tsak nou Peninna naiuso apa thso hau tsak tsak kiu.

⁵Apaüh Hanna tü thatü tsüojin lüko apa hau nyih amtsan tsaklu kiu, tiautenai APAOU nou apa methso chettsün ainou lolaokü wan.

⁶Peninnaüh Hanna mong lothekiu, naiuso tsüwesankü kankei, tiautenai APAOU nou apa hau methso chetao tsüsopkiu.

⁷Nungtilu pon si pon ta yankü khuwan; tilai ngüso APAOU tsamai khu-e, Peninnaüh Hanna hau chihsikhiam heshiuao lüko tsümongchio-ikü iula-i.

⁸Apa tsammongpo Elkanaüh “Hanna, ni tiauta monghenji, ni tiauta tsüheji, ni asaita tiauta mongkiakü noiji? ta sangkü noiküla. Melothso che ko hauto athaiutha ngo chenthso tsüde süne?”

⁹Nyitso ajekhaiu ko APAOU Amkham Tsam Shilo nai ngüsoüh thai samlokhem küta Hanna tsakü chukü apa mong lothe nou APAOU tü misao nai thatü thsüokü shap. Nung taoko Eli meson nung amkham tsam koukhan dongko moknoiküla.

¹¹Hannaüh ngiomong shing tsak mongkü shingkü ngiom, “Apem- shiotsün APAOU, ni yathsüotsün ngü tü athaplu! Ngü angjatsün tü thapküta ngü ayangsan! Ngü labean! Ni ngü hau melothso tsak kiunaito, ngo apa aakihlaiu thumkü ni hau kiuwane, naiuso apaüh khaiuo tilaitso tsü-iuwane.”

¹²Hannaüh APAOU tü tsülaokü atao laiukü misao sao, naiuso nungko Eli mesonüh apa sonkou tü langlutkü thap.

¹³Apaüh nyankü misaokü noiküla, apa sonkou to lemlem, lüko sangh tsüsungh. Nungtiphe Eliüh apa tukkatkü noin ta yang,

¹⁴naiuso apa tü ngiom, “Achija atukkat saisile hantsün alaolowan! Ni shiutsün alaowan küta chongekü anoi!”

¹⁵Hannaüh thalakü ngiom, “Tsüde, ngo tsütukkat, APAOU.” “Ngo tilaitso atukkattsün tsüshiuji! Ngo onthso nai tsümong lingtsün tsak noin, naiuso ngo APAOU tü ngü angjatsün losankü misao noiküla.

¹⁶Ngo amai tsünoikün menyiu tsak ta layang. Ngo nungti misao lokü shiji tiautenai ngo thatü ayangelat nai noin.”

¹⁷Eliüh ngiom, “Aalo nai lükhu,” “Küta Israel Goa nou ni apa tü ti thaiutha sangji nung ni hau lükiu.”

¹⁸Hannaüh thalakü ngiom, “Atsüojinyangko ni ngo asaita ayangsan kiu,” Nungai apa khukü eheshiu intso heshiu, küta loto apa mong lotheantsün ainou tsamlokü noiküla.

¹⁹Nungthan nyap ahom Elkana naiuso apa tsammongso beta chukü APAOU tü amkhamkü phiai, ngüso tsam Rama nai laokü shin. Elkana apa tsammongnyiu Hanna ko em, naiuso APAOU nou apa misao thala.

²⁰Naiuso apa pem tsükengkü iula- küta melothso tsak chetkiu. Apaüh methso nou Samuel ta niankiu, athat nou: “Ngo apa thaiutha APAOU tü sang.”

²¹Naiuso Elkana si tsammonghoi chikü, pon pungkü aloat chaithio naiuso apaüh thalotaiutsün chaithio kiuao Shilo nai sungh.

²²Lüko nung taoko naito Hanna tsükhuha, Hannaüh apa tsammongpo tü ngiom, “Methso nou chiheau monloyatsün ko aikü ngo apa APAOU tsamai nialokü khu-e, küta apa nungko meshen aakihlaiu chikü noi-e.”

²³Elkanaüh thalakü ngiom, “Mei, ni tilüsong ameiting ta yangji nung lüchhi, naiuso APAOU nou ni thalotaiutsün lüthawao-i.” Naiuso ni apa thaisamao momonkün lektso tsamai noikü lüpaotsangsan. Nungtiphe Hannaüh apa tsamai noikü methso nou paotsangsan.

²⁴Apaüh methso nou paotsang- sankü phiai, pon süme shekü noitsün jangtsopong tsak, wonne tsoi che, naiuso nyikhun nekong tsak theng nou meankü loküta apaüh nung methso Samuel Shilo nai nialokü khu.

²⁵Ngüsoüh jangtsopong nou loatkütün phiai, methso Samuel Eli meson dongai nialokü khu.

²⁶Hannaüh Eli meson tü ngiom, “Awankiu APAOU. Ni ngü ngeshijimo? APAOU tü misaokü nungko tsakü noikü ni eptsün nyiuhai nou ngü noin.

²⁷Ngo APAOU tü nung methso thaiutha sangkü noiküla, naiuso ngo ti sangkü noiküla, nung apaüh ngü hau kiu-iu.

²⁸Nungtiphe ngo apa APAOU hau thumkü kiuji. Apa aakihlaiu chikü apa APAOU ün noi-e.” Nungaih ngüsoüh nungko APAOU amkham.