Read Khiamniungan Naga 1 Sam 10 Bible Online

1 Sam 10 - Khiamniungan Naga bible

1 Sam 10

¹Nungai Samuelüh Olip khiam napkü noitsün meng tsak lokü nung Saul khaiu ai thsalut, naiuso son nou chepkü ngiom, “APAOU nou ni apa khaiunia Israel hai chiai nokpao theao tsomkiuji. Ni apa khaiuniaso khako nokshinge, naiuso ngüso ehso apem ainou kipsane. Naiuso APAOU nou ni apa khaiuniaso thaiutha nokpao tsak theao chosaniu ta tsangsheiao nung mitha noin.

²Tilai ngo lonyi ni ainou pungekü khu-e, ni Benjamin goumchi ai Rachel ün etam Zelza nai ni akhaiuniaso nime phete-e. Nungko ngüneüh ni hau gado nouso iantsün nung eplo-iu ta chite-e. Nungtiphe apo loto nungso thaiuthabao tsüdekü athaiutha yangelatkü, apaüh, ‘Ngo jüthso thaiutha ti chhi-e ta bao tsülaokü sanglutkü noin.’

³Ni nung ainou Tabor nai asio pai moshisaokün lektso khu-e, nungai ni khaiunia süme Bethel nai Goa hau aloat chaithio kiuao yamai khukü noitsün phete-e. Ngüso ongko tsaküh wonthso süme niakü noin, loüh amao tsak nou themtsai süme kankü noi-e, naiuso süme nou nyihkhun nekong tsak theng nou meankü kankü eppe,

⁴nungai ngüsoüh ni monglingkü lou-e küta ni hau themtsai nime kiu-e, ni nung louau noin.

⁵Küta ni Filistia hai saotaiu nai Gibea nai Goa ün King ai khu-e. Nungko noksong nai naptsün bekhan nai ni e-pohoi tsak kokiang khongkü, paidan patkü, poipoi matkü, akhongtsün poipoi in tsak nou lomkü king khaiu nai am- thang ainou saotsün hoi tsak phete-e. Ngüsoüh sang asong nou wekü jih hange.

⁶Nungko alekta APAOU Onthso nou ni da shi-e, naiuso ni ngüsoüh wekü amkham jihang nouko ha-e, nungai ni khaiunia ayan tsakli iula-e.

⁷Tilai nungso thawao-e, Goa nou ni tü ti chhi-iao yam niaji nungti ni lüchhi.

⁸Ni Gilgal nai jü khako khu-e, nungai ngo niko phete-e, küta loatkü jahtsün chaithio naiuso aalo chaithio nouso kiu-e. Ngo shikü ni ti chhi-e nung mochitekün lektso ni nungai chinyatnyi taiukü anoi.”

⁹Tilai Saul, Samuel ainou punge- kü khu, Goa nou Saul hau mongpem sakshi ayan tsak kium. Naiuso nung ajekhaiu nouko Samuelüh apa tü ngiotsün alum thawaokü noiküla.

¹⁰Tilai Saul naiuso apa tsamki ne Gibea nai shingoi, e-po ahoi tsak apa ko pheten. Alekta Goa Onthso oukong nou Saul chiai saom, naiuso ngüso Onthso nai jih hangkü wetsün nai apa hakü noiküla.

¹¹Khaiunia sauhaiüh apa nung khako ngekü naiuso epkü noiküla, ngüsoüh nung chhi nou epnai tsaküh tsak tü sangkü ngiom, “Kis thso tü ti thawaokü noin? Saul lüko e-po tsak iula-an süne?”

¹²Nungai kihtsün khaiunia tsaküh sangkü ngiom, “Amao e-pohoi nouso lüko titi asamüh ngüso poso sauhai noin ta yangji?” Nung ngiotsün ngio nou nungti yalo, “Saul lüko e-po tsak hau iula-an süne?”

¹³Tilai Saulüh Goa Onthso nou hangitsün jihang naiuso wekü ngiotsün khem, apa king amthang nai sungan.

¹⁴Saul po ehen nou Saul si tsamki nou ne epküta ngüso tü sang, “Asam tiai khuküla?” Saulüh thalakü ngiom, “Sam gado yam khuküla.” “Lüko tilai samüh gado nouso tsüep, sam Samuel ko phete au khu.”

¹⁵“Asam hau ti chiten” ta Saul po ehen nou Saul tü sang.

¹⁶Saulüh thalakü ngiom, “Apaüh sam hau thainian nouso apem eplowaniu,” ta chiten, lüko Saulüh apa po ehen hau apa nokpao theao Samuelüh ngiotsün to tsüchite.

¹⁷Samuelüh khaiuniahoi nouso amkham thaiutha Mizpa nai jonkam;

¹⁸küta apaüh ngüso tü ngiom, “APAOU, Israel hai Goaüh ngioji, ‘Ngo asam Ijip ainou niasan, naiuso Ijip hai naiuso sauhaiüh asam omhe-ikü noiküla, ngüso ainou kipsan.

¹⁹Asam angja naiuso omhe apem ainou kipsantsün asam Goa ngo noin, lüko lonyi asamüh ngo wankü nokpao tsak akiu ta ngü tü saoji. Naito, APAOU khako asam chija mele mele naiuso kau kau lingkü akamshi.’”

²⁰Nungai Samuelüh kau pungkü kha ai shi-i, naiuso APAOU nou nungko Benjamin kau shingsan.

²¹Nungai Samuelüh Benjamin kau ko tsamkhaiu lingkü kha ai nialokü shin, naiuso Matri tsamkhaiu shingsan. Nungai Matri tsamkhaiu ainou pohaihoi kha ai nialokü shin, naiuso Kis thso Saul shingsan. Ngüsoüh apa tü yam, lüko tilai ngüsoüh apa tsü-epsan,

²²ngüsoüh APAOU tü sangshin, “Loüh amao ajantso tsünoi süne?” APAOU nou thalakü ngiom, “Saul to nungai paidan nouso phiai pam kü noin.”

²³Nungtiphe ngüso jingkü khu- küta Saul nung khaiunia hoi nouso khako nialokü shin, naiuso ngüsoüh apa amaohai apem chiai shisankü epsan.

²⁴Samuelüh khaiuniahoi nouso tü ngiom, “APAOU nou chosantsün khaiunia nou nungai noin! Apa khekkü sam ongko sautso tsünoi.” Khaiuniahoi apemüh wekü ngiom, “Nokpao aakih laiukü lünoi!”

²⁵Samuelüh khaiuniahoi nouso hau nokpao tsaküh chhiao noitsün ayam nouso naiuso chhisiya nouso meikü chite, küta nung thsam tsak ko satkü taiu, naiuso apaüh nung asiothang nai kamtaiu, nungphiai apaüh khaiunia hoi nouso momo tsamai hongan.

²⁶Saul lüko Gibea nai apa tsamai laokü khu. Sauhai mong- pemai Goa nou than nung khaiunia nouso lüko apa ko khuha.

²⁷Lüko atheao tsünoikün khaiunia ajan- tsoüh ngiom, “Nung khaiunia nou sam thaiutha ti amei chhikiuao shio-e?” Ngüsoüh Saul lochilotsao naiuso apa dongai paopei titso kankü tsüshi.