Read Khiamniungan Naga 1 Sam 11 Bible Online

1 Sam 11 - Khiamniungan Naga bible

1 Sam 11

¹Alei tsak thatso noikü phiai Amonhai nokpao Nahasüh apa süpai hoi nialokü khukü Gilead nai noitsün Jabes noksong kumhe-an. Naiuso Nahas tü ngiom, “Sam ko athalou-e tsak ashan, nungaito samüh ni nokpao tsak ta lou-e.”

²Nahasüh thalakü ngiom, Ngo niko ayangtaiu tsak taiukü athalou-e shane: “Ngo asam chikü niovei uai nou lowane, nung Israel hai apem thaiutha amiam tsak noi-e.”

³Jabes hai aheihoi nousoüh ngiom, “Israel goumchi thapekkü ngiongem hongau sam hau ajekhaiu chinyatnyi akiu. Nungko khaiunia sauühtso sam kipsanao tsüshikü naito sam niko hoilutane.”

⁴Tilai ngiongem kantsünsoüh Saul kihtsün Gibea nai shingoi, naiuso ngüsoüh nung ngiongem chiten, nungai khaiuniahoi mong lothekü shap.

⁵Saul, apa jangtsopong hakü eiu ainou loting yasaokü noiküla, naiuso apaüh sangkü ngiom, “Ti angja noin? Khaiunia chikü tiauta shapji?” Nungai Jabes ainou ngiongem ti shikü noiküla ngüsoüh nung apa hau chiten.

⁶Tilai Saulüh nung lula, Goa Onthso nou apa meankü iula küta mong songkü hah.

⁷Apaüh jangtso nime nelangkü tapne, küta ngiongem kantsünso hau nung alohat ngio naiuso nyih anelang nouso kiukü Israel hai goumchi thapekkü hongkü ngiom, “Sauhai Saul naiuso Samuel ko ehli nai tsüiuha-e, ngüso jangtso nungti tapne-e!” Israel hai apem APAOU nou lun hatkü iula, naiuso ngüso tsak hau thekü kamshi.

⁸Saulüh ngüso Bezek nai kamshi-in, nungai Israel ainou heng 300, 000, naiuso Yihuda ainou heng 30, 000 ta khaiuniahoi kamsankü noiküla.

⁹Ngüsoüh Jabes ainou shitsün ngiongem kantsünso tü ngiom, “Lühom anyiwem khako ngüso kipsane ta akhaiuniaso hau lüchite.” Tilai Jabes haiüh nung ngiongem lula ngüso thsüokü mongling,

¹⁰küta Nahas nokpao tü ngiom, “Lühom sam niko haane, naiuso asamüh ti mei ta yangji nung asamüh lüchhi.”

¹¹Nungsoh nai Saulüh apa khaiuniaso ahoi süme hau thekü janthat, küta ah nge taoko ngüsoüh Amon hai saothang nai napkü kom, küta anyiwem thalutkü Amon hai chaoatkü wan. Ehja nouso momo ta pengpunkü khuwan.

¹²Nungai Israel haiüh Samuel tü ngiom, “Saul sam nokpao au tsüthe-e ta ngiotsün hoi nouso tiai? Ngüso sam hau akiuwan, naiuso samüh ngüso loate!”

¹³Lüko Saulüh ngiom, “Lonyi khaiunia tsaktso tsüloate, tititenai nung ajekhaiu nouko APAOU nou Israel hai kipsan.”

¹⁴Naiuso Samuelüh ngüso tü ngiom, “Sam apem Gilgal ai khuko, naiuso Saul sam nokpao noin ta hongpengshiko.”

¹⁵Nungtiphe ngüso apem Gilgal nai khu, naiuso nung asiothang nai ngüsoüh Saul nokpao ta pungpeng. Nungko ngüsoüh aalo chaithio kium, naiuso nungko Saul naiuso Israel hai apem thsüokü mongling.