Read Khiamniungan Naga 1 Sam 12 Bible Online

1 Sam 12 - Khiamniungan Naga bible

1 Sam 12

¹Nungai Samuelüh Israel hai tü ngiom, “Asamüh ngü tü ti chhiao sangkü noiküla, nung chhi-iu. Ngo asam tü nokshingau asam hau nokpao tsak kiu-iu,

²naiuso loto apaüh asam niakeiao epiu. Ngo to sonaniu, naiuso khaiu thaiuwaniu, naiuso jüthsoso asam ko noin. Ngo asam ahei oum tao ainou lo saokü thekü shin.

³Ngo tso aphio chhitaiukü noi naito, APAOU naiuso apaüh chosantsün nokpao khako angiowan. Ngo nungai noin. Ngo khaiunia ajantso ün jangtso tsüdekünai gado lowankü noin süne? Ngo ajantso sapthio-ikü tsüdekünai angja kiukü noin süne? Ngo ajantso pha ainou nekhem paopei lokü noin süne? Ngo nungso tsak lüko chhikü noi naito, ngo ti lokü noin nung ngo laokü kiushi-e.”

⁴Khaiuniahoi nousoüh thalakü ngiom, “Tsüde, ni sam tsüsapthio, tsüdekünai sam angja-ikü tsünoi; ni sau tü ti lokü tsünoi.”

⁵Samuelüh thalakü ngiom, “Asamüh ngü da ti aphio tsüepsan ta ngiotsün thaiutha lonyi APAOU naiuso apaüh chosantsün nokpao ngüne mitha noin.” Ngüsoüh thalakü ngiom, “Ah, APAOU sam mitha noin.”

⁶Samuelüh tsülaokü ngioji, “APAOU ta ngiotsün to, sauüh Mosa naiuso Aron chosan naiuso asam paosiposo Ijip ainou niasan nungh noin.

⁷Lo, asam tiai noin nungko tsakü anoi, küta ngo asam APAOU üh asam tü naiuso asam paosiposo tü chhikü shitsün asio chhisiya nouso apem asam hau yangsan-ishi-e.

⁸Tilai Yakob naiuso apa tsammongso Ijip nai khun, nungai Ijip haiüh ngüso thangmang, nungai asam paosiposoüh ahachu thaiutha wekü sang, naiuso apaüh Mosa naiuso Aron hong, ngüsoüh Ijip ainou Israelhai niasan küta nung gohthang nai kih-i.

⁹Lüko khaiuniahoi nousoüh APAOU Goa bean, nungtiphe apaüh asam paosiposo Filistiahai, naiuso Moab nokpao, naiuso Hazor noknio süpai ahei nousoko ehli lihe-i, naiuso ngüso hau shiolowani.

¹⁰Nungai ngüsoüh APAOU tü ahachu thaiutha wekü ngiom, APAOU, ‘samüh angei sunhe-iu, tititenai sam ni ainou phoklekü khuwan, küta Baal naiuso Astart sotsom nouso tü amkham. Samüh ni amkhamao sam ehso ainou sam akipsan!’

¹¹Naiuso APAOU nou Gideon, Barak, Jeptha, naiuso athonting nai ngo hong.Sam apem asam ehso ainou kipsan, naiuso asam lo aalo nai noin.

¹²Lüko tilai asamüh Amor hai nokpao Nahasüh asam komao epsan, nungai asamüh APAOU asam nokpao noitsün wanan küta ngü tü ngiom, ‘Samüh sam nokshingao nokpao tsak aiuji.’

¹³“Lo asamüh akiu ta sangtsün nokpao nungko noin. APAOU nou apa asam nokpao theao kiu-iu.

¹⁴Asamüh APAOU asam Goa lomsankü, yathsüokü, angio angkü, naiuso apa athoilut nouso kankeikü, asam si asam nokpaoüh apa tü hoilut naito, asam ko alum meikü khu-e.

¹⁵Lüko asamüh APAOU tü angio tsüangkü, apa athoilut nouso tü khengshi naito, apa asam naiuso asam nokpao thako tsa-e.

¹⁶Nungtiphe asam tiko noin nungko atsa, naiuso APAOU nou chhi asong chhiao noitsün asamüh eppe.

¹⁷Nung ahuo tao tsüde süne? Lüko ngo misao sao-e. Naiuso APAOU nou ah uo naiuso ahmok honge. Tilai nung thawao-e, asamüh apa tü nokpao tsak thaiutha saotsün ko APAOU thako angei asong tsak sunlo-iu ta yangshi-e.”

¹⁸Nungtiphe Samuelüh misao sao, naiuso nung ajekhaiu ko lu APAOU nou ahmok naiuso ah uo hong. Nungai khaiunia chikü APAOU naiuso Samuel lun hatkü iula.

¹⁹Küta ngüsoüh Samuel tü ngiom, “Tsüojinyangko APAOU, sam tsü eanao thaiutha a Goa APAOU tü misao asaokiu. Sam angei piakü noitsün ko aikü samüh nokpao tsak akiu ta saotsün shioko angei sunloshi-iu ta lo junaiu sanji.”

²⁰Samuelüh thalakü ngiom, “Hatkü lanoi.” “Asamüh nungti tsümeikün chhi lüko, APAOU ainou phoklekü lakhuwan, lüko asam mong apem nou apa lüyathsüo.

²¹Atsüo tsüdekün goa nouso phiai lakhu, ngüsoüh asam hachuau naiuso kipsanao tsüshio-e, tititenai ngüso to üji nou noin.

²²APAOU nou ngiomong shingkü thalou-iu, naiuso apaüh asam tsüwanane, tititenai apaüh asam meshen khaiunia theao thalou-iu.

²³Jü thaiutha naito, asam thaiuthako misao tsüloshikü noitsün tsangkü apa thako ngo angei tsüsunheao APAOU nou alolaokiu. Nunglikoto, ngo asam tü asam thaiutha chhiao ti ayam tha si tsütha nung tsande-e.

²⁴Asamüh APAOU tü mongpem apem kiukü lüyathsüo. Asam thaiutha apaüh chhisiya asong chhitsün lüyangsan.

²⁵Lüko asamüh angei nou tsülaokü sunlo naito, asam naiuso asam nokpao lomowane.”