Read Khiamniungan Naga 1 Sam 13 Bible Online

1 Sam 13 - Khiamniungan Naga bible

1 Sam 13

¹Asio thsamlai ajantso ko nung ahoi tsak nou tsünoi, lüko Ibri thsam naito nungti sattaiukü epji: Saul nokpao tsalotsün tao achetpon noiküla, naiuso apa Israel hai nokpao ao pon nime the. Ibri ngio nai achetpon sasakü tsünoi.

²Saulüh apa thaiutha khaiunia heng 3, 000 shinglo. Heng 2, 000 nou apa ko Mikmas nai naiuso Bethel ün king goumchi nai taiuküta heng 1, 000 nou apa thso Jonathan ko hakü Benjamin hai ün goumchi Gibea nai hong. Khaiunia apoi nouso momo tsamai laokü hongan.

³Jonathanüh Filistia hai ahei Geba nai loatan, naiuso Filistia hai apemüh nung thaiutha lula. Nungaih Saulüh Ibri hai tü ehli nai ashi ta jangongmat sang tsangkü shingkhan apemai hongpeng.

⁴Saulüh Filistia hai ahei loataniu ta Israel hai apem hau chiten, nungai Filistia haiüh ngüso chinyankü iula. Nungtiphe khaiunia hoi nouso Gilgal nai Saul ko haao jontsün thala.

⁵Filistia hai Israel haiko ehliao kamshin, ngüsoüh ehli tsamkei heng 30, 000, mokthso chiai moknoitsün khaiunia heng 6, 000, naiuso haiusai nai singtsoli süpaihoi piakü noiküla. Ngüso Betaven tü ajepek nai, Mikmas ai khu, küta nungai asaothang shankü noi.

⁶Nungai ngüsoüh Israel hai komao tsalo, küta nungko Israel hai titi theloau tsüshiokün aküo nai napani. Israel hai ajantso ken nai, ajantso khan nai, ajantso lung ong nai, ajantso khanthan nai, naiuso ajantso khiam temkhao nai haiulo;

⁷amaohai ajantso Yordan Haiu yankü naiuso Gilead hai naiuso Gad hai shingkhan ai khuwan. Nung tao saokü nouko Saul Gilgal nai noiküla, naiuso apa ko hatsün khaiuniahoi nouso ahat nou ngaongaokü noiküla.

⁸Samuelüh apa hau achhiao ayam hantsünli, apaüh Samuel tü ajekhaiu chinyatnyi taiukü noiküla, lüko Samuel nung taoko Gilgal nai tsüshingoi. Nungai khaiunia hoi nouso apa ainou won- lükhunan,

⁹nungtiphe apaüh ngüso tü ngiom, “Jüdongai ajahtsün chaithio naiuso aalo chaithio nouso kankü ashi.” Apaüh jahkü chaithio kiu,

¹⁰naiuso nung akheman taotingko Samuel shingoi. Saul, apa ko pheteao khuküta monglingkü waolo,

¹¹lüko Samuelüh ngiom, “Ni ti chhin?” Saulüh thalakü ngiom, “Ni ngio- tsün taoko ni tsüshiphe, khaiuniahoi nouso ngü wankü penganao tsalo, naiuso nungko aikülu Filistia hai Mikmas nai kamshi.

¹²Lo Filistia hai ngü komao Gilgal nai saowane, lüko ngo loüh APAOU tü atsüojinyang nou molokü noin ta ngo yang, nung shioko ngo jüchija thoikü nung ajah chaithio kiuwan.”

¹³Samuelüh thalakü ngiom, “Nung mainga hai chhisiya noin.” “Ni APAOU a Goaüh thoiluttsün ngio tsüang. Ni angtünto, apaüh ni naiuso athsaosithsoso hau Israel nai athontsüyangkü nokshing the-iao noiküla.

¹⁴Lüko loto anokshing ni tü yangkü lu thonane. Tiautenai ni apa ngio tsüangphe, APAOU nou mongchiotsün khaiunia tsak yamsan küta apa khaiuniaso tü shingao nokpao shankiu-e.”

¹⁵Samuelüh Gilgal wanküta apa yamai khuwan. Saul apa süpaihoi ko haao khunai, khaiunia apoi nouso apa tü hoilutkü khu. Ngüso Gilgal ainou Benjamin goumchi nai noitsün Gibea saokü khu. Saulüh apa khaiunia tsom 600 thatso nouso tü sailukü noiküla.

¹⁶Saul, apa thso Jonathan, naiuso apa khaiuniasoüh Benjamin goumchi Geba nai asaothang shankü noi; Filistia hai saothang nung Mikmas nai noiküla.

¹⁷Filistia hai süpaihoi ngüso saothang ainou nok komao ahoi süme hau thekü tsalo: ahoi tsak nou Shual goumchi nai Ofra dongai khu,

¹⁸naiuso amao ahoi tsak nou Bet Horon dongai khu, naiuso loüh amao ahoi tsak nou liutsa dongai Zeboim tsamei tü thapsankü elung dongai khu.

¹⁹Nungai Israel goumchi nai sonlang tsünoiküla, tiautenai Filistia haiüh Ibri hai hau sahsingiu tsülangikü kiap.

²⁰(Israel hai eiu a jengtsaiu jingom, O, tsolam sah, langao naiuso shimonloau Filistia hai dongai khuaulu noiküla,

²¹O shimonao, naiuso jangtsopong tü shiohtsün pailai shimonao chai tangka tsak, naiuso jingom shimontsün mai tangka nime noiküla.)

²²Nungtiphe ehli ajekhaiu nai Saul naiuso Jonathan phamongko sahsingiu semtsün tü simkü Israel hai süpaihoi phamongai ti tsüsemkü noiküla.

²³Filistia haiüh süpai keihoi tsak Mikmas Aoyan khiapjeiao thaiutha hong.