Read Khiamniungan Naga 1 Sam 14 Bible Online

1 Sam 14 - Khiamniungan Naga bible

1 Sam 14

¹Nyitso ajekhaiu Jonathanüh apa dun semtsün khaiunia tsak tü ngiom, “Ashi, samüh Filistia hai saothang yankü khuko.” Lüko Jonathanüh apa po Saul hau tsüchite;

²nung taoko Saul apa ko khaiunia tsom luok thatso hakü Gibea ainou laiukü tsükhukü Mikron nai sasashep pai khem nai asaothang shankü noiküla.

³(Shilo nai APAOU meson Eli thsao Ikhabod sau Phinehas thso noiküla, apa dei Ahitub thso Ahijaüh meson phakhut khutkü noiküla.) Naiuso khaiuniahoi nousoüh Jonathan tilai khuwan ta tsüngekü noiküla.

⁴Jonathanüh Filistia hai saothang nai khuau noitsün Mikmas aoyan ko lungkap jin asong nime la-ekü, Bozez jin tsak naiuso Seneh jin tsak ta jinkü noiküla.

⁵Jin tsak nou Mikmas tü lalutkü ajenapki nai, naiuso amao tsak nou Geba tü lalutkü ajepekki nai noiküla.

⁶Jonathanüh apa sahsingiu kantsün oum khaiunia nou tü ngiom, “Ashi, sam nung tsütipankün Filistia hai süpai hoi saothang nai khuko: Tsüngean APAOU nou sam tü hachukü tso-e, apaüh hachu naito, sam thsaokü noilüko, sam ashiolotsün ainou APAOU ti tsangkü lünou aloyangau tsüshio.”

⁷Oum khaiunia nou thalakü ngiom, “Ni tilüsong chhiao aiuji, ngo niko hakü noin.”

⁸Jonathanüh thalakü ngiom, “Thatü mei.” “Sam khuko küta Filistia hai hau sam epiko.

⁹Ngüsoüh sam dongai shi-e ataiu ta ngio naito, nungai sam tiai noin nungko samüh taiu-e.

¹⁰Lüko ngüsoüh sam tü ngüso dongai ashi ta ngio naito, nungaito sam shi-e, tiautenai APAOU nou ngüso khako sam hau ashiolotsün kiuwaniu ta nung ii nou noi-e.”

¹¹Nungtiphe ngüsoüh Filistia hai hau ngüso epi, naiuso Filistia haiüh ngiom, “Athaplu! Ibri hai ajantso ngüso haiulotsün khan mong ainou kengchiai shikü noin!”

¹²Nungai ngüsoüh Jonathan naiuso oum khaiunia nou netü “nungai sam dongai asung! ta ngiom. Samüh asam hau tso tsak chiteao noin!” Jonathanüh oum khaiunia nou tü ngiom, “Ngü tü ahoilut. APAOU nou ngüso khako ashioloau Israel hai au kiuwaniu.”

¹³Jonathan jin aonai siangkü sungh, naiuso oum khaiunia nou apa phiai hoilut. Jonathanüh Filistia hai komkü shiolo, naiuso oum khaiunia nou ngüso loat.

¹⁴Chong- ting Jonathan si oum khaiunia neüh gohthang acre tsak mongko khaiunia khei ngoikü loatküla.

¹⁵Nok nai noitsün Filistia hai apem hattat; asaothang nai noitsün süpaihoi naiuso akomtsünso ahat nou ngaongao; goum nou lemlem, naiuso nungko alekkattsün asong tsak noiküla.

¹⁶Saul khaiuniahoi nousoüh Benjamin goumchi Gibea nai jiokü noikü thapnai, ngüsoüh Filistia hai apülai nai jingkeikü ep.

¹⁷Nungtiphe Saulüh apa khaiuniaso tü ngiom, “Süpaihoi nouso tü lüwelu küta sau tsüha ashingsan.” Ngüsoüh nung welunai Jonathan naiuso apa dun semtsün oum khaiunia nou tsükam- hakü epsan.

¹⁸“Meson phakhut nou nungai kankü ashi” ta Saulüh meson Ahija tü ngiom.(Nung ajekhaiu ko nai Ahijaüh Israel khaiuniahoi nouso khako kankeikü noiküla.)

¹⁹Saulüh meson nouko chitetsün taoko Filistia hai saothang nai apülaitsün tekkü tsaokü iulawan, nungtiphe Saulüh apa tü ngiom, “Nungai APAOU tü sangshiao atao tsünoi!”

²⁰Filistia hai ongko thumkü apülai noitsün taoko apa naiuso apa hoi ngüso ko li-e ao tsalo.

²¹Ibri hai ajantso sauhai Filistia haiko ngüso saothang dongai khuwan hakü noiküla, ngüsoüh loüh athang nou li-eshikü Saul naiuso Jonathan neko halutshi.

²²Filistia hai khupenganji ta luküta Efraim king nai pamnoitsünso lüko Filistia hai komanao ngüso ko halutshi.

²³Küta Betaven saokü ehlikü noiküla. APAOU nou Israel hai nung ajekhaiu ko kipsan.

²⁴Nung ajekhaiu ko Israel hai naiu nou outsükongkü iulawan, nungai Saulüh ngiomong shing tsak shanküta nung ngiokhem kiukü ngiom, “Ngo lonyi jü ehso tü motham- shikün khako sauüh heshiu-e, apa tü athesan lüthe.” Nungtiphe khaiunia sauüh nung ajekhaiu thathunkü titso tsühe.

²⁵Ngüso liutsa lang athang tsak ai shin naiuso alumai liukhiam nou epkü noiküla.

²⁶Nungko liutsa lang pai apem liukhiam nou meankü noiküla, lüko khaiunia sauüh tso nung tsühe, tiautenai ngüso apem Saul ün athesan lun hat.

²⁷Lüko Jonathanüh apa poüh khaiuniahoi hau athesan shanlutkiu nou tsüluhakü noiküla; nungtiphe apaüh semtaiutsün pailai tsatphu küta nung liutsob nai chi- thio, naiuso liukhiam intso shiuwan, nungai jamaolu apa iwonkü iula.

²⁸Khaiunia tsaküh apa tü ngiom, “Apoüh sam tü lonyi sauüh chih he-e apa tü athesan lünoi ta ngiom, nungshioko khaiunia apem outsü- kongkü naiukü noin.”

²⁹Jonathanüh thalakü ngiom, “Sam khaiuniaso tü jüpoüh titi ahat ao tsak chitaiukü noin! Athaplu, ngo liukhiam intso shiutsün nou ngo titi iwon-in!

³⁰Sam khaiuniaüh ehoi shiolotsün tao nung heshiutünto titengkü mei-ela. Lüyanglu, samüh loüh Filistia hai titengkü piakü loatela!”

³¹Nung ajekhaiu ko nai Israel haiüh Filistia hai Mikmas ainou Aijalon saokü liküta shiolo. Nung taoko naito Israel hai naiu nou outsükongkü shian.

³²Nungtiphe ngüsoüh ehoi ainou thalotsün onne- mok, jangtso, nouso ehlithang nai loat, küta ashe lepkü hean.

³³“Khaiuniahoi nou APAOU thako she sunkü nyih hetsün tsangkü angei sunheshi,” ta Saul hau chite. Saulüh wekü ngiom, “Asam akau- sai hoi nouso!” “Nungko jüdongai lung asong tsak monlokü ashitaiu.”

³⁴Küta apaüh ngiokhem amao tsak kiushi, “Khaiuniahoi nouso ongai khuküta ngüso jangtso naiuso onnemok nouso nungai apem kankü ashi ta ngüso tü lüngio. Ngüsoüh nung loat küta nung athang nai heao noin, ngüsoüh nyih ashe lepkü hetsün tsangkü APAOU thako angei tsüsunloau noin.” Nungsoh nai ngüso apemüh jangtso kankü shikü nungai loat.

³⁵Saulüh APAOU amthang tsak la, nung apaüh ayating lahsantsün tsak noiküla.

³⁶Saulüh apa khaiuniaso tü ngiom, “Sam saoküta asoh Filistia hai komko, ah mongekün khako ngüso apem loatküta kamheanko.” Ngüsoüh thalakü ngiom, “Ni ti ameiting ta yangji nung lüchhi.” Lüko meson nou ngiom, “Samüh Goa tü chong sangluko.”

³⁷Nungtiphe Saulüh Goa tü sang, “Ngo Filistia hai akom tamo? Ni sam hau ashiolotsün kiu-e mo?” Lüko nung ajekhaiu ko Goa nou tsüthashi.

³⁸Nungai Saulüh ahei nouso tü ngiom, “Nungko ashi küta lonyi tso angei sunkü noimo ta lüyanglu.

³⁹Jüthso Jonathan li nou thalüko aphio chhitsün to loatkü wane ta Israel hau ashio kiutsün APAOU nianko ngo thaloji.” Lüko sauüh titso tsüngio.

⁴⁰Nungai Saulüh ngüso tü ngiom, “Asam apem nungai atsa, naiuso Jonathan je nungko tsakü noi-e.” Ngüsoüh thalakü ngiom, “Ni ti ameiting ta yangji nung lüchhi.”

⁴¹Saulüh APAOU Israel Goa tü ngiom, “APAOU, ni tiau lonyi ngü tü tsüthala? APAOU, Israel Goa, asio lung tsangkü ngü tü athashi. Nung aphio nou Jonathan je tsangkü naito, Urim tsangkü athashi; lüko nung aphio nou Israel hai tsangkü naito, Thummim tsangkü athashi.” Nung phongde nouko Jonathan naiuso Saul ne aphio ta han; lüko ahoi nouto thakhukü noiküla.

⁴²Nungai Saulüh ngiom, “Jüthso Jonathan je jetko ajanthatkiu”. Nungai nung phongde nou Jonathan tü hanlut.

⁴³Nungai Saulüh Jonathan tü sangkü ngiom, “Ni ti chhikü noin?” Jonathanüh thalakü ngiom, “Ngo semkü noitsün pailai nou liukhiam intso tsao-iheaniu. Ngo nungko noin, ngo eao khemlokü noin.”

⁴⁴Saulüh apa tü ngiom, “Ni tsüloatkü naito, Goa nou ngo aloat!”

⁴⁵Lüko khaiunia hoi nousoüh Saul tü ngiom, “Israel thaiutha asongting ashiolo kankü shitsün Jonathan loatkü wane süne? Tsüloate! Samüh apa khaiu ainou khaiuo tsaktso tsüsa-ani-e ta APAOU nianko thaloji. Apaüh lonyi ti chhin nung Goa ahachu tsangkü chhin.” Nungtiphe khaiunia hoi nou Jonathan loatkü wananao noitsün ainou kipsan.

⁴⁶Nungphiai Saulüh Filistia hai tü komkeitsün laolo, küta ngüso meshen goumchi ai laokü khuwan.

⁴⁷Saul, Israel hai nokpao iulakütün phiai, apa alumai, apa ehso Moab haiko, Amon haiko, Edom haiko, Zoba nokpao nouso ko, naiuso Filistia haiko likü noiküla. Apa litsün ehli apem shiolo.

⁴⁸Apa hahkü liküta Amalek hai lüko shiolo. Apaüh Israel hai tü ehshipotsün chikü ainou kipsan.

⁴⁹Saul thso melothso nouso: Jonathan, Isvi, naiuso Malkishua noiküla, naiuso menyiuthso yamchong nou nian Merab, niophi nou nian Mikal ta noiküla.

⁵⁰Apa tsammongnyiu Ahimaz thso nou Ahinoam noiküla, apa süpaihoi ahei, apa po ehen Ner thso Abner noiküla.

⁵¹Saul po Kis naiuso Abner po Ner ngüne Abiel thsoso noiküla.

⁵²Saul aakihlaiu thathunkü Filistia hai thako eh nou thsüokü lihe. Tilai apaüh khaiunia ajantso kongsimongkü naiuso mongsongkü eppe, apaüh nung khaiunia meshen süpai ao shinglo shinglokü noiküla.