Read Khiamniungan Naga 1 Sam 16 Bible Online

1 Sam 16 - Khiamniungan Naga bible

1 Sam 16

¹APAOU nou Samuel tü ngiom, “Ni Saul thaiutha tilektso yangelate? Ngo apa Israel ün nokpao ainou wananiu. Küta lo Olip khaiutsom lokü Betlehem nai khaiunia tsak nian nou Jese dongai lükhu; tiautenai ngo apa thsoso ongko tsak nokpao theao chosaniu.”

²Samuelüh sangshikü ngiom, “Ngo nung titi thekü chhi-e?” “Saulüh nung thaiutha lula naito, apaüh ngü loatane!” APAOU nou thalakü ngiom, “Ni jangtso thso tsak lülo küta ni nungai APAOU hau aloat chaithio tsak kiuao khun ta lüngio.

³Nung aloat chaithio nouko Jese lüko lüjonthio, küta ngo ni hau ti chhiao noin nung chite-e. Ngo hantsün khaiunia nou nokpao theao ni lütsomkiu.”

⁴Samuelüh APAOU nou apa tü chhiao ngiotsün nung chhiküta Betlehem ai khu, nungai noknio ahei hoi nouso hatatkü apa ko pheteao shikü sang, “Ni sailutsün amei thaiutha lemo?”

⁵Apaüh thalakü ngiom, “Ah,” “Ngo APAOU hau aloat chaithio tsak kiuao shikü noin. Asam chija losioloküta ngü ko hakü ashi.” Apaüh Jese naiuso apa thsoso tü lüko ngüso chija lü losiolo ta ngiom, naiuso ngüso aloat chaithio amkham nai jonthioha.

⁶Tilai ngüso shingoi, Samuelüh Jese thso nou Eliab epküta apaüh yanghe, “APAOU khako tsatsün nung khaiunia tsak nou apaüh chosantsün noi-e.”

⁷Lüko APAOU nou apa tü ngiom, “Apa titi konsitheng naiuso pühe mei ta lathap. Ngo apa tsülo, tiautenai ngo to khaiuniaüh li tsüthaisanji. Khaiunia nou achi leng nou tü thapji, lüko ngo to mongpem tü thapji.”

⁸Nungai Jeseüh apa thso Abina- dab jonküta Samuel dongai nialokü shin. Lüko Samuelüh ngiom, “Apa lüko APAOU nou chosantsün tsüde.”

⁹Jeseüh loüh Shamma nialokü shin. Naiuso Samuelüh ngiom, “Apa lüko APAOU nou chosantsün tsüde.”

¹⁰Nungli Jeseüh apa thso chinyat nouso Samuel dongai nialokü shin. Naiuso Samuelüh apa tü ngiom, “Tsüde, APAOU nou nungso tsaktso tsüchosan.”

¹¹Nungai Samuelüh Jese tü sangkü ngiom, “Athsoso loüh noishimo?” Jeseüh thalakü ngiom, “Nungai niophithso nou noishin, lüko apa onnemok hoi paotsangao khukü noin.” Samuelüh thalakü ngiom, “Apa tü nungai ashi ta lüngio.” Apa mo- shikün lektso samüh aloat chaithio nou tsükiu-e.

¹²Apa kongsimongkü, pühe meikü, naiuso nionap meikü noitsün oum tsak noiküla. “Nungai APAOU nou Samuel tü nung khaiunia nou noin, apa lütsomkiu ta ngiom!”

¹³Samuelüh Olip khiam nou loküta apa deiso khako David tsomkiu. Nungailu APAOU Onthso nou David meankiu, naiuso nung nyi nai yakü APAOU apako hakü noiküla.

¹⁴APAOU Onthso nou Saul lean, küta APAOU tsangkü hongtsün angei onthso nou apa angjakiu.

¹⁵Apa tsamkisoüh apa tü ngiom, “Goa nou hongtsün angei onthso tsangkü ni angjaji ta samüh ngeji.

¹⁶Nungtiphe, asong khaiunia, samüh kokiang khong montsün khaiunia ta yamao sam hau ngiokhem akiu. Tilai angei onthso ni da shi-e, nung khaiunia nou apa kokiang khong nai, ni loüh meikülu noishi-e.”

¹⁷Saulüh ngüso hau, “Kokiang khong meikü montsün khaiunia tsak yamloküta apa jüdongai nialokü ashi,” ta ngiokhem kiu.

¹⁸Nungai apa tü paotsangtsünso ongko khaiunia tsaküh ngiom, “Betlehem noksong nai Jese thso tsak jihang meikü montsün noin. Apa pem kongsimongkü, pühe mei, süpai tsak, naiuso ngio chiteao montsün khaiunia tsak noin. APAOU nou apako hakü noin.”

¹⁹Nungtiphe Saulüh Jese dongai ngiongem kantsün hongkü ngiom, “Athso David onnemok hoi jimkü noitsün jüdongai ahong.”

²⁰Nungai Jeseüh David hau themtsai gado chakan tsak, wonthso tsak, theng nou meankü nyihkhun nekong tsak, ta yamkiukü Saul dongai hong.

²¹David, Saul dongai shiküta apa chhisiya tsalo. Saulüh apa thatü tsüojin küta apa sahsingiu kankeiao chosan.

²²Küta Saulüh Jese dongai ngiongem tsak hongkü ngiom, “Ngo David mongchioji, nungko ngü yathsüokü anoi-i.”

²³Nungko yakü tilai Goa nou angei onthso Saul dongai honge, Davidüh apa kokiang lokü khong. Nung angei onthso nou apa wankü khunai aalokü iula naiuso meikü noiküla.