Read Khiamniungan Naga 1 Sam 17 Bible Online

1 Sam 17 - Khiamniungan Naga bible

1 Sam 17

¹Filistia hai ehli ao Soko nai Yihuda noksong tsak ko kamshin, ngüsoüh Soko naiuso Azeka ne jetko Efes Dammim ta jontsün athang tsak ko kam,

²Saul naiuso Israel hai Filistia haiko ehli ao khemlokü Elah Tsamei nai kamshin.

³Tsamei tsak ngüso jetko taiukü, Filistia hai king tsak ai hoikü tsa, naiuso Israel hai king tsak ai hoikü tsakü kamsan.

⁴Filistia hai ainou Israel hai tü tai ao Gat noknio ainou khaiunia tsak Goliat ta niankü shin. Apa pem atheng nai ak-e süme thatso noiküla,

⁵naiuso apa shitho, naiuso son kandio taoson lung son tsoi aopungo kü chinyat thatso lethsangkü noiküla.

⁶Apa hokso taosonlung son nou nyingjeikü, naiuso taoson lung son nou shantsün lai pikü noiküla.

⁷Apa lai nelapiu tü teithamkü, naiuso ngiu nou tsoi chinyat thatso lethsangkü lilutkü noiküla. Süpai tsak apa shii kankü hoilut.

⁸Goliat tsaküta Israel hai tü wekü ngiom, “Asamüh nungko ti chhiji? ehli ao ashi, Ngo Filistia hai noin, asam Saul sua nouso ngüko li ao asam ongko khaiunia tsak achosan.

⁹Apaüh shioloküta ngü loat naito, sam asam sua ao the-e; lüko ngo apa loat naito, asam sam sua ao the-e.

¹⁰Nungko lo ngo Israel hai süpai tü taiji. Asam ong ainou ngüko li ao khaiunia tsak achosan ta ngo ngiosomji!”

¹¹Tilai Saul naiuso apa khaiuniasoüh nung lula, ngüso thatü hatat.

¹²David nung Yihuda nai Betlehem ainou Efrat hai tsak Jese thso noiküla. Jese thso petjei, naiuso Saul nokpao taoko Jese nung thatü sonankü noiküla.

¹³Apa thso yamchong süme nouso Saul ko hakü ehli iuwan. Petcheting nou Eliab, nungthan nou Abinadab, naiuso süme nou Shamma noiküla.

¹⁴David nung niophiting noiküla, naiuso tilai petcheting süme nouso Saul ko noiha-e,

¹⁵David nung atao atao ko apa po onnemok hoi tü paotsangao Betlehem ai laokü khukü noiküla.

¹⁶Goliatüh ahom naiuso asham tsütokü ajekhaiu aopülenyi ngoikü Israel hai tü taikeikü noi.

¹⁷Nyitso Jeseüh David tü ngiom, “Woi tsao nou tsoi che naiuso themtsai che loküta liukü adeiso saothang nai khukü lükiu-iu ta hong.

¹⁸Naiuso nung jangnyao nou shantsün eheshiu che nouso ahei hau kankü lükhu; adeiso titi noiji, ngüso meikü noin ta mitha atsangsheiao tso tsak kankü ashi.

¹⁹Nokpao Saul, adeiso, naiuso Israel hai Filistia haiko Ela Tsamei nai ehli liji.”

²⁰David nungthan nyap beta chu, küta onnemok tü paotsangao ajantso taiukiu, naiuso chihshen nou loküta apa tü Jeseüh ngiotsünli khu. Apa Israel hai ehli khuau tsaloutsün taotingko asaothang nai shingoi, naiuso ngüsoüh ekhong nou khong.

²¹Filistia hai si Israel hai momo noithang yamlokü kha shei-ekü noiküla.

²²Davidüh chihshen nou athat waotsün asong phamongai taiu, küta ehli thang nai apa deiso dongai jingkü khu, küta apaüh ngüso titi noin ta sang.

²³Apa ngüso ko chitekü noitsün taoko, Goliatüh nung khako Israel haitü taitsünli kha ai shiküta taikü noiküla; naiuso Davidüh nung lula.

²⁴Tilai Israel haiüh Goliat ep, ngüso ahat nou jingkü khuwan.

²⁵“Apa tü athaplu!” ta ngüso tsak si tsak chitekü ngemkü noiküla. “Apaüh taitsün tü anglu! Nokpao Saulüh nung Goliat sauüh loate apa hau paopei asong tsak kiu-e ta thalou. Nokpao nou apa menyiuthso lüko tsamsigoh yangi-e, naiuso loüh apa pothso tüto liukim nou tsüshilo hakü wankiu-e ta thaloukü noiküla.”

²⁶Davidüh apa shimkü noitsün khaiuniahoi nouso tü sangkü ngiom, “Nung Filistia hai nou loat küta Israel hai amiam ainou kipsan nai nung khaiunia nou ti eppe? Atsüoting to, aa Goa ün süpaihoi lochinyan ao nung tsütipankün Filistia hai nou sau noin?”

²⁷Khaiunia sauüh Goliat loate nung thaiutha ti chhikiu-e nung ngüsoüh apa hau chiten.

²⁸David, khaiunia nouso ko chitetsün apa dei asheting Eliabüh lula, kü apa David lun mongmat küta ngiom, “Ni nungai ti chhiji? A onnemokthso liutsa nai sauüh paotsangji? Ni abülom khaiunia! Ni ehlitsün tü thapluao shin!”

²⁹Davidüh sangkü ngiom, “Lo, ngo ti chhikü noin?” Ngo lüko ngio tsak sangao tsüshio-e süne?

³⁰Apa amao khaiunia tsak dongai sakü khuküta nung ngiosanglu sangshikü ngiom, nungko apaüh sangtsün pungkü, aya nai lilu athashi ep.

³¹Khaiunia ajantsoüh Davidüh ti ngioji nung lulakü, ngüsoüh Saul hau chiten, küta apaüh David jonao hong.

³²Davidüh Saul tü ngiom, “Asuhatkü noitsün asong! nung Filistia hai nouko sautso tsühatao noin! Ngo khukü apa ko ehli li-e.”

³³Saulüh thalakü ngiom, “Nyah” “Ni titi apa ko li-e? Nito melothso tsaklu noin, naiuso apa to apa aakihlaiu thathunkü süpai tsak thekü shin!”

³⁴Davidüh than, “Asuhatkü noitsün asong,” “Ngo jüpo onnemok hoi paotsangji. Tilai chongkhao, naiuso shap tsaküh onnemokthso tsak kankü khuwane,

³⁵Ngo nungso tü kumkü khuküta thaji, naiuso nung onnemok nouso kipsanji. Naiuso chongkhao si shap nouso jüdongai ngü tü ali shinai, ngo nungso sang nai thaloukü loatji.

³⁶Ngo khao nouso naiuso shap nouso loatkü noin, naiuso aa Goa ün süpaihoi lochitsün tsütippankün Filistia hai nou ta lüko nungtilu chhi-e.

³⁷APAOU nou ngü khao nouso naiuso shap nouso ainou kipsan, nungti apaüh ngü nung Filistia hai ainou kipsane.” Saulüh thalakü ngiom, “Nyüh,” “Lükhu, küta APAOU nou niko ha-e.”

³⁸Saulüh apa shitho David hau tholoau kiu: taoson lung son nou shantsün kandio apaüh David khaiu ai keilut, naiuso shitho nou sunkü noitsün nehong tsak kiu.

³⁹Davidüh Saul salaiu apa shitho chiai soplo küta khuau kowe, lüko apaüh tsüshio, tiautenai apaüh nungso tsüthede. Apaüh Saul tü ngiom, “Ngo nung shitho thokü ehliao tsüshio.” “Ngo nung tsüthode.” Nungtiphe apaüh nung shitho apem ngiowan.

⁴⁰Apaüh onnemok jimtsün pailai lo, küta haiumong ainou lungtso mekü noitsün pungo juonlo küta apa nekongai thio. Apaüh lung saithiokü sattsün khemlo, küta apa Goliatko wao-eao khu.

⁴¹Filistia hai nou Goliat naiuso apa shii semtsün David khako tsülaokü shimkü shin.

⁴²Tilai apaüh David tü thsüokü thap, nungai apa ti on tsühatkü melothso tsaklu ep.

⁴³Apaüh David tü ngiom, “Nung pailai nou ti thaiutha to? Ni ngo jii tsak ta yangji süne?” Naiuso apaüh David tü apa goa ainou athesan shanlutkü ngiom,

⁴⁴“Jü dongai ashi,” ta apaüh David tü ngiom, “Ngo apem waio si sao naiuso thainian nouso hau waowane.”

⁴⁵Davidüh thalakü ngiom, “Ni jü khako sahsilai kankü shiji, lüko ngo ni lochikiutsün Israel hai süpai hoi Goa, Apemshiotsün APAOU, nianko shiji.

⁴⁶Nung ajekhaiu kolu APAOU nou ni jü phamongai kiuwane; ngo ni shioloküta akhaiu tapsankü wane. Naiuso ngo Filistia hai süpaihoi mea waio si sao thainian hau heani-e. Nungai Israel hai Goa noin ta goumchi apem nou nge-e,

⁴⁷naiuso nungko noitsün khaiuniahoi nouso APAOU nou apa khaiuniaso kipsanao sahsingio pokü tsünoi ta nge-e. Apa to ehli nai ashioloutsün noin, naiuso apaüh asam apem sam phamongai kiuwane.”

⁴⁸Nungai Goliat David dongai shiao tsalou, naiuso David apa ko li ao tsakü noitsün Filistia hai nou dongai jingkü khu.

⁴⁹Apaüh apa pha nekong nai senthio küta Goliat tü satlut ao nou lung tsak senlo. Nungüh apa khakheng tingko pep, naiuso apa khaiuo thapek, küta Goliat apa kha goh ai sheikü loithiowan.

⁵⁰Nungti sahsingio tsükankeikü Davidüh Goliat lungtso tsak nou loatan!

⁵¹Nungai apa Goliat dongai jingkü khukü apa chiai tsa, küta Goliat sahlaiu sailokü apa khaiu tapsan. Tilai Filistia haiüh ngüso lengpo Goliat eantsün ep, nungai ngüso khupengan.

⁵²Israel naiuso Yihuda khaiunia nousoüh Gat yam thathunkü Ekron bekhan saokü sang songkü wekü ngüso phiai jingkü kumkü khu. Filistia hai Sharaim ai khutsün yam thathunkü Gat si Ekron saokü tawaikü loian.

⁵³Tilai Israel haiüh Filistia hai tü kumkü khutsün ainou laolokü shin, ngüsoüh Filistia hai saothang nou kumhean.

⁵⁴Davidüh Goliat khaiu lokü Yirusalem ai kankü ya, lüko apaüh Goliat ün ehli jengtsaiu nouso to apa nejenkhio ai wanan.

⁵⁵Tilai Saulüh David nung Goliat ko ehli ao khutsün epkü, apaüh apa süpai aniakei Abner tü sang, “Abner, apa nung sau thso to?” Abnerüh thalakü ngiom, “Nokpao, ngo nung thaiutha ti tsüngeha.”

⁵⁶Nungaito khuküta nung atsang- sheijikan ta Saulüh ngiokhem kiu.

⁵⁷Tilai David nung Goliat loat küta apa saothang nai laokü shin, Abnerüh apa Saul dongai nialoukü khu. Davidüh nung saokü nouko Goliat khaiu semkü noiküla.

⁵⁸Saulüh apa tü sangkü ngiom, “Oum khaiunia, ni sau thso to?” Davidüh thalakü ngiom, “Ngo Betlehem ainou ni yathsüotsün Jese thso noin.”