Read Khiamniungan Naga 1 Sam 18 Bible Online

1 Sam 18 - Khiamniungan Naga bible

1 Sam 18

¹Saul naiuso Davidne chite- tsün khem. Nung phiai Saul thso Jonathan, David tü meshen pem tü tsüojintsünli thatü aokü tsüojinkü iula.

²Saulüh David nung ajekhaiu ko yakü apa tsamai tsükhu-ikü apa ko taiu.

³Jonathanüh David athon- tsüyang haimei theao ngiomongshing shan, tiautenai apa tü thatü aokü tsüojinkü iula.

⁴Jonathanüh apa pha- laiu phakhut ngiosan küta nungko hakü apa shitho, salaiu, uokop pai, naiuso omkhi nou David hau kium.

⁵Saulüh thoiluttsün chhisiya apem nai Davidüh ashio ep, nungtiphe Saulüh apa süpai hoi ahei ao the-i. Nungüh Saul khemko asonghoi naiuso khaiuniahoi nouso monglingi.

⁶Davidüh Goliat loatküta apa naiuso süpaihoi nouso laokü yashitsün taoko, Israel hai noksong pungkü ainou menyiuhoi nokpao Saul ko pheteao shin. Ngüsoüh poipoi si lungthong khowekü amongling jih hamkü hang.

⁷Ngüso monglingetsün taoko menyiuhoi nousoüh nungti hang: “Saulüh heng ngoikü loat, lüko Davidüh heng che loat.”

⁸Saulüh nung ang ao tsüaiukü thatü mongmat. Apaüh ngiom, “Tiautenai ngüsoüh Davidüh to heng che, lüko ngo to heng lu loat ta welutji. Ngüsoüh nungthan ko David hau nokpao ao shankiu-e tüsao!”

⁹Saul nung ajekhaiu ko yakü David tü niokiakü naiuso mongkhemkü iula.

¹⁰Nungthan ajekhaiu ko Saul, Goa nou hongtsün angei onthso nou alekta thalowan naiuso apa waiwai khaiunia tsak khekkü apa tsamai noi. Ajekhaiu pungkü apaüh chhikü shitsünli, Davidüh kokiang khongkü noiküla, naiuso Saulüh apa lai semkü noiküla.

¹¹“Ngo David dio ai nou tü leplutkü langlutkü wane” ta Saulüh apa mongai yanghe, lüko nung atao pungkü nouko David soilokü noi.

¹²Saul, David lun hat, tiautenai APAOU David ko hakü noiküla, lüko Saul to lean.

¹³Nungtiphe Saulüh David hongkü heng tsak khako ahei ao the-i. Davidüh apa khaiuniaso ehli nai niakei

¹⁴naiuso apa chhisiya alum ko ashio ep, tiautenai APAOU apa ko ha.

¹⁵Davidüh shiolotsün lulanai Saul tekkü hatkü iula.

¹⁶Israel nai naiuso Yihuda nai noitsün khaiunia chikü nou David tsüojin, tiautenai apa to ashiolotsün ahei tsak noiküla.

¹⁷Nungaih Saulüh David tü ngiom, “Nungko jüthso menyiuthso yamchong nou Merab noin. Ngo apa atsammongnyiu theao athalou-e tsak taiukü kiu-e, nung athalou-e nou- ni mongsong naiuso angio angtsün süpai tsakli ngü ayathsüo, küta APAOU ehli nou ali-e.” (Apa ngo loattsün likoto Filistia haiüh bao apa lüloatko ta apaüh yanghe.)

¹⁸Davidüh thala, “Nokpao ün le theao lümeikü jü tsamkhaiu ti naiuso ngü sau?”

¹⁹Lüko tilai Merab nung David hau kiuao thaiutha atao shisaom, apa Mehola ainou khaiunia tsak Adriel ta niankü hau bao kiuwan.

²⁰Saul menyiuthso Maikel David ko tsüojinekü iula, nung lulanai Saul monglingkü noiküla.

²¹Apaüh yang, “Ngo Maikel nung David ko kiha-i-e, küta David thaloau jin tsakli kankeikü apa Filistia hau hau loati-e.” Saulüh David tü ngioshin, “ni jüle ao iula-e.”

²²Apaüh apa khemko noitsün asonghoi ta David ko tengkhaiukü nung lüchite ta ngiokiu. “Nokpao nou ni tü monglingkü noin naiuso apa khemko noitsün asonghoi apem nou ni tsüojinji, lo athaiutha apa thso tsamsigoh yangau atao amei noin.”

²³Avesan tsünoikün “ngüli nou tsaosilao tsak thaiutha to, nokpao le iula ao thatü asuhat asong naiuso nianlom tsak noin.”

²⁴Asonghoi nousoüh Davidüh ngiotsün Saul hau chiten.

²⁵Naiuso Saulüh David hau chiteao ngio kiukü ngiom, “Tsammongnyiu nou he amai kiuao Filistia hai e mea ainou tsashethun tsom tsak kankü ashi, nung apa ehso tü phaosanli noi-e.” (Nungti Saulüh David Filistia hai hau loatiao ayangtaiu noiküla.)

²⁶Saulüh ngiotsün asonghoi nousoüh David hau chiten, naiuso nokpao le theao David monglingkü noiküla. Tsamsigoh shan ajekhaiu mosaokün khako,

²⁷David naiuso apa khaiuniaso iuküta Filistia hai khaiunia tsom nime loat. Apaüh ngüso tsashethun lamlokü nokpao dongai ya, naiuso nung asaotsün haowe khengai noiküla, nungti apa nokpao le iula. Loto, Saulüh apa thso Maikel David hau tsamsigoh yangiaolu noiküla.

²⁸Saulüh David ko APAOU hakü noin ta ngela naiuso loüh Maikelüh David tü tsüojin.

²⁹Naiuso Saul, David lun tekkü hatkü iula, küta apa aakihlaiu chikü David ko eh iula.

³⁰Filistia hai süpaihoi shikü ehlitsün apem ko Saul asonghoi nousoüh shiolotsün ko naito Davidüh shiolotsün piathso noiküla. Athon nai David thatü atengting tsak iula.