Read Khiamniungan Naga 1 Sam 19 Bible Online

1 Sam 19 - Khiamniungan Naga bible

1 Sam 19

¹Saulüh apa thso Jonathan naiuso apa khemko noitsün asonghoi apem hau David loatau yangtaiutsün chiten. Lüko Jonathan David ko thatü mei-ekü noiküla.

²Apaüh David tü ngiom, “Jüpoüh ni loatau koweji. Tsüojin- yangkü lühom ahom tsokü lünoi, athang tsak ko pamkü lünoian.

³Ni pamnoitsün athang nai ngo jüpo ko aikü tsa-e, küta ngo apa hau athaiutha chite-e. Ngo tso tsak ilo naito, ni hau nge-i-e.”

⁴Jonathanüh Saul khako David lomsankü ngiom, “Asong, ni yathsüotsün David tü ti tsümeikü lachhi. Apaüh tilaitso ni tü tsümeikü tsüchhi, lüko apaüh chhitsün alum ko ni tü ahachu asong noikü shin.

⁵Tilai apaüh Goliat loat, nungai apaüh meshen aa thumkü kiu, naiuso APAOU nou Israel hai hau ashiolotsün asong kiu. Nung epnai, ni monglingkü noiküla. Nungaito tiau ni lo aphio tsülepkün tü aphio chhiao koweji naiuso ti koko ta tsüdekü David loatau aiuji.”

⁶Jonathanüh Saul mong shioloküta apaüh David tsüloate ta APAOU nianko ngiomong shing tsak shan.

⁷Nungtiphe Jonathanüh David jonshi küta apa hau alum chiten, naiuso apa Saul dongai nialokü khukü Davidüh yathsüokü shitsünli apaüh nokpao yathsüoshi.

⁸Filistia haiko loüh ehli müjam lishi. Nungko Davidüh ngüso thapekkü kompengkü shiolo.

⁹Nyitso Saul apa tsamai lai semkü noitsün taoko, angei onthso nou apa thalowan, nung taoko David lüko nungko kokiang khongkü noiküla.

¹⁰Saulüh apa lai üh David dio ai nou tü langlut ao kowe, lüko Davidüh haiuwankü lai nou dio ai nou ta langlut an. Nungai David thakhukü khulükhun.

¹¹Nungsoh nai khaiunia ajantso David loatau apa tsam tü jiokü loatkü wanao hong. David tsammongnyiu Maikelüh apa lotsüokü ngiom, “Ni lüsoh nungko nou tsükhulokü naito, ni lühom eane.”

¹²Tsammongnyiu nou David koukhan thso ainou saokü jingkü khuwan-i.

¹³Küta apaüh tsamai taiutsün sotsom goa nou loküta, wonpon nou shantsün khaiukham khamei, naiuso ne patlutkü then chinai sai-i.

¹⁴Tilai Saul khaiuniahoi David thaloau shin, nungai Maikelüh ngüso hau apa akia noin ta chiten.

¹⁵Lüko Saulüh ngüso David tü yamao tsülaokü hongkü ngiom, “Nungai apa then sunkü pikü ashi, küta ngo apa loate.”

¹⁶Ngüso tsammongai napnai ngüsoüh tsamkhaiu sotsom goa nou then ai saikü apa khaiukham ao wonpon nou shantsün the-ikü epsan.

¹⁷Saulüh Maikel tü ngiom, “Ni tiauta kausai küta jü eh khulükhunan-iji?” Maikelüh thalakü ngiom, “Ngo apa khulükhun-iao tsühachukü naito ngü loate ta ngiom.”

¹⁸David Rama ai Samuel dongai khuküta Saulüh apa tü chhitsün alum chiten. Nungai David si Samuel ne Naiot ai khukü noian.

¹⁹Saul hau David Rama nai Naiot ko noin ta chite,

²⁰nungtiphe apaüh khaiunia ajantso apa keloau hong. Ngüsoüh nungai Samuel ahei ao thekü e-pohoi nou jih hangkü naiuso sang songkü wekü shitsün epiu. Nungai Goa Onthso nou Saul khaiuniaso thalowan naiuso ngüso lüko jihang sang songkü hangau yachu.

²¹Tilai Saulüh nung lula, apaüh ngiongem kantsünso lo piakü hongshi, naiuso loüh ngüso lüko jih sang songkü hangao yachu. Apaüh ngiongem kantsünso samjam nou hongshi, naiuso ngüso tü lüko nungtilu thawao.

²²Nungai apa pem Rama nai khuau tsalo, tilai apa Soko nai khiam temkhao asong tsak nai shisaom, apaüh Samuel si David so tiai noin ta sang, naiuso ngüso Naiot nai noin ta chite.

²³Apa lüko nungai khuau tsalokü noinai, Goa Onthso nou apa thalowan, naiuso apa jihangkü Naiot yam thathunkü wekü khu.

²⁴Apaüh apa neshe apem khowan küta Samuel khako sang songkü wekü jih hang, naiuso nungnyi si nungsoh chikü apa tsosa noiküla. (Nung ngio yachutsün nungti noin, “Saul lüko e-po tsak hau iulawan süne?”)