Read Khiamniungan Naga 1 Sam 2 Bible Online

1 Sam 2 - Khiamniungan Naga bible

1 Sam 2

¹Hannaüh nungti mi sao: “APAOU nou jümong amongling nou meani-iu; Apaüh ti chhin nung shioko ngo titi amongling noin! Ngo jü ehso tü nyailutji; tiautenai Goa nou hachutsün thaiutha ngo monglingji!

²“APAOU khekkü sau asio tsünoi; nungai apa khekkü sau tsünoi, sam Goa khekkü asolotsün ti tsünoi.

³Ni bülomkü chitetsün alaolo; ni abülom ngio nouso atsaman. Tiautenai APAOU angetsün Goa noin, naiuso apaüh khaiunia chikü ün chhisiya thaisanji.

⁴Akong süpaihoi uokop pai nouso lotheankü noin, lüko outsükongkünso kongkü iulaji.

⁵Khaiunia sauhai ataojam thai meankü noiküla loto ngüso chija eheshiu chenheji, naiusile nouso loto tsünaiushi. Luon tsammongnyiu nou methso chinyat chetkü noin, lüko methso piakü noitsün nyiuhai sappatkü noin.

⁶APAOU nou loatji naiuso aa noi-iji; apaüh khaiuniahoi eantsün goumchi ai honganji, naiuso loüh ngüso laokü nialokü shiji.

⁷Apaüh ajantso tsosilu naiuso ajantso memei shanji, apaüh ajantso lohenji naiuso ajantso losongji.

⁸Apaüh tsosilu hai pukhao ainou tensanji naiuso tsaosilao angja ainou loksanji. Apaüh ngüso nokpao haimei au shankiuji naiuso atsokting noikham nai taiukiuji. Goumchi athanya nouso APAOU thaiutha noin; nungso tü noilutkü apaüh goumchi nou lahsankü noin.

⁹“Apaüh apa da monglamtsünso aa soloji, lüko tsümeikünso to anyakhem nai mowanji; Khaiunia tsaküh apa oukong noulu ashiolo nou tsüepji.

¹⁰APAOU tü tsaotsünso to lomowane, ngüso thako apaüh aün ainou ahmok honge. APAOU nou goumchi athum mi kheme; apaüh meshen nokpao hau oukong kiu-e, apaüh meshen achosan nokpao hau ashiotsün epi-e.”

¹¹Nungai Elkana, apa tsam Rama ai laokü khu, lüko methso Samuel to Shilo nai Eli meson khemko APAOU yathsüokü noi.

¹²Eli meson ün melothso nouso atheao tsünoikün yaang hoi noiküla. Ngüsoüh Goa tü tsümongkiu,

¹³tsüdekünai khaiuniahoi khako mesonhoi saisile yam ti noin, nung ngiokhem yam nouso tü ti tsümongkiu. Nungliko, tilai khaiunia tsaküh aloat chaithio kiuji, nungai meson ün ayathsüotsün chonsiang laiukü semkü shikü, nyih nou lo thengkü noi taoko,

¹⁴ngüsoüh nung chonsiang nou nyih lak nai tsatthiokü, küta nung chonsiang nou tilüsong khusane, nung meson thaiu nou noiküla. Israel hai apem sauhai Shilo nai aloat chaithio kiuao shin, ngüso tü nungli kankeikü noiküla.

¹⁵Nungko hakü, iu nou losanküta mojahkün khako lüko, meson yathsüotsünso shiküta aloat chaithio thiotsün khaiunia tü ngiom, “Meson nou jekheau thaiutha ngü hau nyih ajantso akiu, apaüh nyih ainou athengshiu tsülou-e, lüko nyihsanglu lou-e.”

¹⁶“Samüh ayam atha nou chhiko; naiuso iu nou aya jahkü thioko, küta ni ti aiuji nung lülou,” ta khaiunia nou thala naito, meson ayathsüo- tsünsoüh ngio-e, “Tsüde! nung lo ngü hau akiuwan! Ni tsükiukü naito, ngo nung mongdem oukong nai louau lu noin!”

¹⁷Nung Eli meson melothsosoüh chhitsün angei Goa khako thatü thsüokü noiküla, tiautenai ngüsoüh APAOU chaithio nouso asu tsühatkü kankei.

¹⁸Melothso Samuelüh meson phakhut ewoi ashethop nou lahtsün thokü APAOU nou tsülaokü yathsüo.

¹⁹Loüh Hannaüh apa hau phakhut alaiu tsak shankü, meshen tsam- mongpo pon pungkü aloat chaithio kiuao sungnai nung kankü shikiu.

²⁰Nungai Eli mesonüh Elkana naiuso apa tsammongnyiu ouk kiukü ta ngiom, “Ajethso tsak nou apa hau thumkü kiutsün thangko liloau nung nyiuhai tsangkü loüh amao methsoso APAOU nou ni hau lü oukkiu.” Nungphiai ngüso tsamai laokü khu.

²¹APAOU nou Hanna oukkiu, naiuso apaüh loüh melothso süme naiuso menyiuthso nime ta chetkiushi. Melothso Samuel APAOU yathsüotsün chhisiya nai shejikan.

²²Loto Eli thatü sonkü shin.Apa thsosoüh Israel hai tü chhitsün thaiutha apaüh tsülaokü lulakü noi, naiuso ngüso APAOU Nejenkhio ko chhisiyatsün menyiuhoi nouso ko lüko saiha.

²³Naiuso apaüh ngüso tü ngiom, “Asamüh nung chhisiya nouso tiauta chhiji? Asamüh tsümeikü chhitsün thaiutha khaiunia pungkü nou ngü hau chiteji.

²⁴Jü thsoso, nung lülaolo! APAOU khaiuniahoi, nung chhi thaiutha chite-iao amiam tsak noin!

²⁵Khaiunia tsaküh amao khaiunia tsak thako angei sunlo naito, Goa nou apa kiploau shiom, lüko APAOU thako angei sunlotsün khaiunia tsak to sauüh kiploau tsüshio-e.” Lüko ngüsoüh ngüso po ngio tsüang, tiautenai APAOU nou ngüso loat au khemkü noiküla.

²⁶Methso Samuel shejikantsün ko apaüh APAOU naiuso khaiunia ainou atsüojinyang ep.

²⁷Goa e-po tsak APAOU ainou nung ngiongem kankü Eli dongai shin: “Tilai apaosipo Aron naiuso apa tsammongso Ijip nokpao suahoi noiküla, ngo Aron hau jüpem tsangsheikü han.

²⁸Amthang nai angannyamtsün jahkü yathsüoau, naiuso ngü ko chite au phakhut alaiu nou khut au, Israel kau apem ainou ngo apa tsamkhaiu jü meson theao chosan. Naiuso nungko loatküta jahkü thiotsün chaithio haoson tsak ngüso thaiutha taiuloau ayam tsükiu süne?

²⁹Naito, tiau asamüh jü khaiunia ainou, ngo saotsün aloat chaithio naiuso amao chaithio nouso tü chinekkü thapji? Naito, Eli, jü khaiunia Israel haiüh chaithio kiu- tsün ameiting apem tsangkü asam chija tsakü iula-itsün nou ngoko to tekkü athsoso tsüojinji süne?

³⁰Ngo, APAOU, Israel Goaüh ayanan taoko atsamkhaiu naiuso akauüh atao chikü thaiutha meson thekü ngü yathsüoau thaloukü ngiom. Lüko lo ngo ngioji, ngo nung tsütaiushi-e! Nungliko to, sauhaiüh ngü lomsanji, ngo ngüso lomsane, naiuso sauhaiüh ngü lochiji, ngo ngüso tsüwesankü nai wane.

³¹Anglu, ngo atsamkhaiu naiuso akauko pühehoi apem loatau atao nou shiji, nungtiphe atsam- mongko khaiunia sautso ve somkü tsükih-e.

³²Ngo ouk nouso apem amao Israel khaiunia nouso hau kiu- wan nai, ni yangelate naiuso niovei kiakü thape, lüko atsammongko ve somkü khaiunia tsaktso tsükih-e.

³³Lüko ngo athsoso ongko tsak aa taiu-e, naiuso apaüh meson tsak thekü ngü yathsüo-e. Lüko apa niopek iula-e, naiuso ayangtaiu apem mowane, loüh athsaosithsoso athe- oum taoko eane.

³⁴Tilai athso Hopni naiuso Phinehas ne nemthso nyitso lu eane, nungüh ni tü ngo ngiokü shitsün alum shithawao-e ta hane.

³⁵Sau ngü tü ngiotsüo nai noi-e, naiuso ngo aiutsün chhi-e, ngo nung meson theao cho-e. Ngo chosantsün nokpao khako asaita yathsüoau ngo apa tü thsaosithsoso chetsinyimkü khu-i-e.

³⁶Athsaosithsoso ajantso poitaiu nai nung meson dongai khukü apa tü eheshiu naiuso chai sao-e, naiuso meson nou tü hachukü noiha au, naiuso eheau epau ayam tso tsak asopkiu ta koja-e.”