Read Khiamniungan Naga 1 Sam 20 Bible Online

1 Sam 20 - Khiamniungan Naga bible

1 Sam 20

¹Nungai David Rama nai Naiot ainou Jonathan dongai khulü- khun. Apaüh Jonathan tü sang, “Ngo ti chhikü noin?” “Ngo ti aphio sunlokü noin? Apoüh jü aa tü aloatau saokü hau lümeikü ngo apo tü ti aphio chhitaiukü noin?”

²Jonathanüh thalakü ngiom, “Ni eao nou Goa nou alolaokiu! Jüpoüh apa chhisiya alum ngü hau chiteji, atengting tsüdekü lüko apaüh nung ngü ainou tsangkü tsüwan, nung atsüo tsüde!”

³Lüko Davidüh thalakü ngiom, “Ni ngü titi tsüojinji apaüh thatü meikü ngen, naiuso apaüh chhiao yangtaiutsün nung ni hau tsünge-iao apaüh that taiuwan, tiautenai nung lula- inaito among lothe-e. Ngo eao ainou hokngam tsaklu pungekü noin ta aa noitsün APAOU nianko ngo nitü ngiomong shingkü ngioji!”

⁴Jonathanüh ngiom, “Ni aiutsün alum ngo chhi-e.”

⁵Davidüh thalakü ngiom, “Lühom alei yan sümai noin, naiuso ngo nokpao ko heshiuao noiküla. Lüko nung apem ni tü potha naito, ngo khukü tsangnyi ajekhaiu asham saokü athang tsak ko pamkü noi-e.

⁶Apoüh ngo chihepuo nai tsüha ta ngesan naito, ngo jütsam Betlehem nai ponthon aloat chaithio kiutsün ataophe jü tsamkhaiu athum thaiutha ni tü ngiokhem loküta liukü khuwaniu ta lüchite.

⁷Apaüh ‘Mei-e,’ ta ngio naito, ngo kipsane, lüko apa mongmat naito, apaüh ngo atsüoting tawaiane ta yangtaiuwan ta ni nge-e.

⁸Tsüojinyangkü jü thaiutha nung achhikiu, naiuso je thalou-etsün labean. Lüko ngo aphio nai noi naito, ni apimüh ngü aloat! Ngo apo au loatiau tiauta kanlükhune?”

⁹Jonathanüh thalakü ngiom, “Nungto layangting!” “Ngo jüpo pha ni tü poau ngela naito, nung ngo ni hau tsüchite-e süne?”

¹⁰Nungai Davidüh sangshikü ngiom, “Apoüh mongmatkü thala naito, nung ngü hau sauüh chiteshi-e?”

¹¹Jonathanüh thalakü ngiom, “Je to liu ai bao khuwanko.” Nungti ngü- ne liu ai khuwan,

¹²küta Jonathanüh David tü ngiom, “APAOU Israel Goa sam mitha lünoi! Lühom naiuso tsangnyi nung taoko nai ngo jüpo tü sangshi-e. Athaiutha apa saisile meikü naito, ngo adongai ngio honge.

¹³Apaüh ni tü pha po-au ayangtaiu noi naito, ngo nung thaiutha ni hau tsünge-ikü naito, APAOU nou ngü lüloatanko, küta ni aa lüpoitaiuko. APAOU, jüpo ko hakü shitsünli niko lünoi!.

¹⁴Naiuso ngo aa noi naito, ni asio nai athaloutaiutsün ngüko saitha lünoi-i; lüko ngo ean naito,

¹⁵jü tsamkhaiu tü lo monglamekü noitsünlilu athontsüyangkü lünoi. Naiuso tilai APAOU nou a ehso moisemkü lomo-e,

¹⁶sam tsak si tsak ko athalou-e taiutsün nung tsülo- theankü lünoi. Nung lothean naito, APAOU nou ni hau angja lükiu.”

¹⁷Loüh jam Jonathanüh David tü apa tsüojinao athalou-e shan, titi- tenai Jonathanüh David tü meshen pem tsüojintsün lilu tsüojin.

¹⁸Nungai Jonathanüh apa tü ngiom, “Lühom to Alei Yan Sümai phe, ni thaisam nai tsühakü naito, ni tsühatsün ngesane.

¹⁹Tsangnyi ajekhaiu nai ni tsühatsün tekkü ngesane, naiuso nung thaiuko ni pamlotsün athang nailu khuküta, lungphansan phiai lüpaman.

²⁰Ngo nungtü watthat noikü koptsün khekkü nung tü chon süme nou kope.

²¹Nungai ngo jütsamki tü nungso yamsanao lükhu ta ngio-e. Naiuso ngo apa tü chon nouso nungko adongko noin, ‘ni lülo ta ngio naito’ nungüh ni aasaniu ta hanji, nungai to ni apamtaiu ainou ashian. Ni angja nai tsünoi-e ta ngo aa noitsün APAOU nianko ngiomong shingkü ngioji.

²²Lüko ngo apa tü, ‘chon nouso etsakai noin ta ngio naito’ nungaito ni nung wankü lükhuwan, tiautenai APAOU nou ni honganji.

²³Ni naiuso ngo thalou-etaiutsün thaiutha tsak si tsak thalou-etsün asaita taiuao APAOU sam jetko noin.”

²⁴Nungtiphe David liutsa nai pamkü noian. Alei Yan Sümai nouko Nokpao Saul thaisam nai shin

²⁵kü- ta apa nung khako noitsün thangnai dioai shimkü moknoi. Apa tü thankü Abner moknoi, naiuso Jonathan nung tü lashikü moknoi. David noithang akeng noiküla,

²⁶lüko Saulüh nung ajekhaiu ko nai titso tsüngio, tiautenai apaüh yang, “Apa tü tso tsak thawaokü noin, naiuso apa amkham yamko tsüsiokü noin.”

²⁷Nungthan nyi si Alei Yan Sümai than nyi lüko David noithang akeng lu noiküla, nungai Saulüh Jonathan tü sangkü ngiom, “David tiauta thaisam nai münyi si lonyi tsüshi?”

²⁸Jonathanüh thalakü ngiom, “Apaüh ngü tü Betlehem ai akhu-i ta kojakü noiküla.

²⁹Apaüh ngiom, ‘Tsüojinyangko ngü akhu-i,’ ‘tiaute- nai noksong nai sam tsammongsoüh aloat chaithio kiutsün sümai saoheao noin, naiuso jüdeiüh ngü nungko haau ngiokü noin. Nungtiphe ni jüpaio tünaito, jü tsammongso ko epeao ngü akhu-i.’ Nung shioko David apa noithang nai tsünoi.”

³⁰Saul, Jonathan tü mongmatkü ngiom, “Ayam tsüthakü angio tsüangkün nyiuhai tsak thso nou ni! Lo ni David ko hakü ni chetsinyimtsün anyiu naiuso achija lomiamlokü khuji ta ngo ngeji!

³¹David nung goumchi ko aakihtsün lektso ni tilaitso nokpao tsüthe-e ta tsüngeso? Lo khuküta apa nungai nialokü ashi, apa eaolu noin!”

³²Jonathanüh thalakü ngiom, “Apa tiauta eane?” “Apaüh ti chhikü noin?”

³³Nungai Saulüh Jonathan loatao apa tü lai nou lang, naiuso apa poüh David atsüoting loatkü wanao thatkü noin ta Jonathanüh ngela.

³⁴Jonathan amongmat nou thaisam puo ainou tsakü, nungnyi apaüh titso tsüheshiu, nung Alei Yan Sümai nenyi nou noiküla. Apa David thaiutha aokü yangelat, tiautenai Saulüh apa lomiamkiukü noiküla.

³⁵Nungthan ahom Jonathan nung thaiuko ngüne chitetaiutsünli David ko pheteao liutsa nai khu. Apaüh apa ko melothso tsak nialokü khu,

³⁶küta apa tü ngiom, “Ngo kopau noitsün chon nou epsanao jingkü lükhu.” Melothso nou jingkü khutsün ko Jonathanüh apa yankü chon tsak kop.

³⁷Tilai nung chon nou salitsün athang melothso nou ngoi-iu, Jonathanüh apa tü wekü ngiom, “Nung chon nou intso khukü noin!

³⁸Nungkolu tsakü lanoi! Liukü lükhu!” Nung melothso nou chon nou juonlo küta apa APAOU dongai laokü shin,

³⁹nung athat Jonathan si David neüh lu ngekü, apaüh nung ti athat ta tsüngekü noiküla.

⁴⁰Jonathanüh apa dun nouso nung melothso hau kiuwan küta nungso kankü noksong nai laokü lükhuwan ta ngiom.

⁴¹Melothso nou khuwan phiai, David lungphansan phiai nou tsakü chu, küta apa goh ai singkaongam langthiokü samjam kauthio. David naiuso Jonathan nemthso shapkü tsaküh tsak tü chepkü noiküla, David yangelattsün nung Jonathan yangelattsün tü songkü noiküla.

⁴²Nungai Jonathanüh David tü ngiom, “Ni ko Goa hakü lünoi.Ni naiuso ngo, athsaosithsoso naiuso jü thsaosithsosoüh jeüh tsaküh tsak tü asio nouko thalou-etsün athon tsüyangkü noiao APAOU sam jetko anoi.” Nungai David khuwan, naiuso Jonathan lüko noksong nai laokü khuwan.