Read Khiamniungan Naga 1 Sam 22 Bible Online

1 Sam 22 - Khiamniungan Naga bible

1 Sam 22

¹David, Gat noknio ainou khulükhun küta Adullam noksong shimkü lungken tsak ko pam. Tilai apa deisinioso naiuso apa tsammong apoi nousoüh apa nungai noin ta lula, ngüso lüko apako hoilut.

²Khaiunia sauhai athangmang nai, chailaiu nai, naiuso mongtsam tsüthasangkü noin, nungso apem nai tsom püle thatso apa dongai shi, nungko apa ngüso ahei au iula.

³David nung ainou Moab goumchi Mizpa nai khuküta Moab hai nokpao tü ngiom, “Goa nou jü thaiutha ti chhikiu-e nung mo-epsankün lektso tsüojinyangkü jüpo si jünyiuso shikü ngüko anoi-i.”

⁴Nungtiphe David posinyiuso Moab hai nokpao ko taiukiu, naiuso ngüso nungko David lungken nai pamkü noitsün atao chikü noiha.

⁵Nungai e-po Gad, David dongai shiküta ngiom, “Nungko lanoi; lo lu Yihuda goumchi ai lüsoian.” Nungtiphe David tsalokü Heret liutsa ai khuwan.

⁶Nyitso Saul, Gibea nai, king tsakai tamarik paisokhem tsak ko apa lai semkü, apa khemko noitsün asonghoi nouso apem apa lemkü tsakü noiküla. Saulüh David naiuso apako hakü noitsün khaiuniahoi nouso yamchu-iu ta lula,

⁷nungai apaüh apa khemko noitsün asonghoi nouso tü ngiom, “Anglu, Benjamin hai! Asam apem hau Davidüh eiu tsüdekünai sainaoshep eiu kiu-e ta yangji süne, tsüdekünai asam apa süpaihoi ongko asonghoi shankiu-e ta yangji süne?

⁸Asamüh nung shioko ngü sapthioau koweji süne? Jü thsoting nou David ko athsane tsak noin ta asam tsaküh tso ngü hau tsüchite. David, jü khaiunia ongko tsaküh ngo loatau aküo tsak tü taiuji naiuso jü thsoüh nung thaiutha choiji ta sauühtso Jü thaiutha yangkiukü tsüchite!”

⁹Saul asonghoi ongko Deog lüko hakü noiküla, naiuso apaüh ngiom, “David, Nob nai Ahitab thso Ahi- melek dongai khutsün ngo epküla.

¹⁰Davidüh ti chhi-e ta Ahimeleküh APAOU tü sang, nungai apaüh David hau eheshiu intso naiuso Filistia hai nou Goliat salaiu kiu.”

¹¹Nungtiphe Saulüh Nob nai noitsün meson Ahimelek naiuso apa tsammongso, mesonhoi nouso, dongai hong, naiuso ngüso apa dongai shin.

¹²Saulüh Ahimelek tü ngiom, “Anglu, Ahimelek!” Apaüh thalakü ngiom, “Ni yathsüotsün ngo nungko noin, APAOU.”

¹³Saulüh apa tü sangkü ngiom, “Ni naiuso Davidüh tiau jüthako khengshiji? Ni tiau apa hau eheshiu ajantso naiuso salaiu kiu, küta apa thaiutha Goa tü sangkiu? Lo apaüh ngü loatau aküo tsak tü yamkü taiuji, naiuso ngü tü khengshikü khuwaniu!”

¹⁴Ahimeleküh thalakü ngiom, “Akhem ko noitsün asonghoi ongko Davidlu ni monglamtsün tsak noin! Apa aleting noin, a ehü ongko ahei, naiuso nokpao noikham nai khaiunia pungkü nou thatü lomsankü kankeitsün tsak noin.

¹⁵Ah, ngo apa thaiutha Goa tü sangkiu-iu, naiuso nung ayating tsüde. Ni tü akheng- shitsün thaiutha to, Asuhatkü noitsün nokpao nou ngü tsüdekünai jü tsammongko tsak tü lüko aphio tsükiuao noin. Ngo nung thaiutha to titso tsüngeha!”

¹⁶Nokpao nou ngiom, “Ahimelek, ni naiuso atsammongso apem eaolu noin.”

¹⁷Nungai apa dongko ehü tsakü noitsünso tü ngiom, “APAOU meson nouso lüloat! Ngüsoüh David ko hakü akausai chhi chhin, naiuso khuwaniu ta ngekü lüko ngü hau tsüchite.” Lüko ehü nousoüh APAOU mesonhoi nouso tü pha poau tsüsom.

¹⁸Nungtiphe Saulüh Deog tü ngiom, “Ni ngüso lüloat!” naiuso Deogüh ngüso apem loatkü wan. Nung aje- khaiu ko apaüh mesonhoi asio neshe tenao maikü noitsünso khaiunia ao- petjeikü pungo loatkü wan.

¹⁹Saulüh e-pohoi noknio Nob nai kihtsün amao nouso khaiunia apem loatkü wanao ngiokhem kiu. Nungko melo menyiu, methso, naiuso nionyaothso, jangtso, gado, naiuso onnemok hoi apem ngüsoüh loatkü wan.

²⁰Lüko Ahimelek thsoso ongko tsak Abiathar ta niankü thakhu, küta apa David tü hoilut.

²¹Apaüh APAOU mesonhoi Saulüh titi chaoat nung David hau chiten.

²²Davidüh thalan, “Tilai ngo nung ajekhaiu ko Deog epkü noiküla apaüh atsüoting nung Saul hau chite-e ta ngo nge-en. Nungtiphe atsammongso eantsün apem thaiutha jü thsale noin.

²³Ngü ko anoi, naiuso ti lahat. Saulüh je nemthso loatao aiuji, lüko ni ngüko aikü aasan ha-e.”