Read Khiamniungan Naga 1 Sam 23 Bible Online

1 Sam 23 - Khiamniungan Naga bible

1 Sam 23

¹Davidüh Keila noksong nung Filistia haiüh komheanji, naiuso chonglam be-eiuyam chong- ting yamsantaiutsün kaolowanji ta lula.

²Nungtiphe apaüh APAOU tü sang, “Ngo khukü Filistia hai akom tümo?” APAOU nou thalakü ngiom, “Nyüh,” “Ngüso komküta Keila noksong akipsan.”

³Lüko David khaiuniasoüh apa tü ngiom, “Sam nung Yihuda nai noi taoko ahat nou thajeiankü noin; loüh sam Keila noksong ai khuküta Filistia hai süpaiso komshi naito, aya hattsün tü tsaokü hatshi-e!”

⁴Nung- tiphe Davidüh APAOU tü müjam sanglushi, naiuso APAOU nou apa tü ngiom, “Khukü Keila noksong lükom, tiautenai ngo Filistia hai khako ashiolotsün kiu-e.”

⁵Nungtiphe David naiuso apa khaiuniaso Keila noksong nai khuküta Filistia hai komhe, ngüsoüh khaiunia piakü loat naiuso thainian nouso lowan. Nungli Davidüh noksong nou kipsan.

⁶Tilai Ahimelek thso Abiathar thakhu küta Keila nai David ko hoilut, apaüh meson phakhut nou kankü shin.

⁷David, Keila noksong ai khuwan- iu ta Saul hau chiten, naiuso apaüh ngiom, “Goa nou apa jü oukong ai lethiowaniu. David, bekhan mongko noitsün noksong mongai khutsün tsangkü apa chija khuojeilo-iu.”

⁸Nungtiphe Saulüh Keila noksong nai khukü David naiuso apa khaiuniaso thaloau apa süpaihoi tü ehli ao jon.

⁹Tilai Davidüh apa komao Saulüh chhiji ta lula, apaüh Abiathar meson tü ngiom, “Nungko meson asio shitho kankü ashi.”

¹⁰Nungai Davidüh ngiom, “APAOU, Israel hai Goa, Saulüh ni yathsüotsün ngo, shioko Keila noksong lomowanao shi-e ta yangtsün ngo lulakü noin.

¹¹Keila noksong paopunghoi nousoüh ngü Saul phamongai thumkü kiuwane süne? Ngo lulatsünli Saul atsüoting shi-e süne? APAOU, Israel hai Goa, ni ngü tü athashi ta ngo kojaji!” APAOU nou thalakü ngiom, “Saul shi-e.”

¹²Davidüh loüh müjam sangshikü ngiom, “Keila paopunghoi nousoüh jü khaiuniaso naiuso ngo, Saul phamongai kiuwane süne?” APAOU nou thalakü ngiom, “Ngüsoüh kiuwane.”

¹³Nungtiphe David naiuso apa khaiunia apem nai tsom luok thatso nouso alekta Keila noksong wankü akhu tsülaokü khu. Tilai Saulüh David Keila noksong ainou khulükhunaniu ta lula, apa athat taiu laolowan.

¹⁴David, king goumchi Zip lang shimkü nai pamkü noian. Saulüh asai- ta apa thaloau kowe, lüko Goa nou David apa hau tsükiu.

¹⁵Davidüh Saul apa loatao tsalotsün ep. David Zip shimkü Hores lang ko noiküla.

¹⁶Jonathan nungai khukü David tü Goa nou kipsane lahat ta mong losongkiukü ngiom,

¹⁷Jüpo Saulüh ni loatau tsüshio-e. “Israel hai nokpao theao ni tsak noin ta apaüh meikü ngen, naiuso nungko ni tü thanting noikham nai ngo noi-e.”

¹⁸Ngüne haimei theao asio athalou-e tsak taiuküta David Hores nai noi, naiuso Jonathan tsamai laokü ya.

¹⁹Zip ainou khaiunia ajantso Gibea nai Saul dongai khuküta ngiom, “David to sam goumchi Hores ai Hakila king sübao Judea lang aje- pekki nai pamkü noin.

²⁰Asuhatkü noitsün Nokpao, ni apa thaloaulu thatü yangji ta samüh ngeji, nungtiphe sam goumchi ai ashi, küta samüh ni hau apa thakiu-e.”

²¹Saulüh thalakü ngiom, “APAOU nou ngü tü thatü tsüojin shioko sam ouk akiu!

²²Apa tiai noin, nung sauüh eptaim, nung tsangsheikü ngeao sasakü ashi chite. Apa thatü akausai ta ngo luji.

²³Apa tiko pamji nung athang tongtü yamchu küta saitha jü dongai ngio nou laokü kankü ashi. Nungai ngo niko khuha-e, ngo Yihuda goumchi apem thapekkü yamao ayang noin, lüko apa nung khiamkhan nouko lu noi naito, ngo apa loatkü wane.”

²⁴Nungtiphe ngüso tsalokü Zip ai Saul khako laokü shin. David naiuso apa khaiuniaso Judea lang ajepekki nai noitsün atheao tsünoikü leantsün Maon tsamei lang nai noiküla.

²⁵Saul naiuso apa khaiuniaso David tü yamao thaiutha tsalo, lüko apaüh nung lula küta Maon liutsa king lungkap nai khukü noian. Tilai Saulüh nung thaiutha lula, apaüh David tü thaiulükhun.

²⁶Saul khaiuniaso naiuso David khaiuniaso king momo ai leh-ekü noiküla. Ngüso Saul khaiuniaso khako intsolu tsüthalo- ikü liukü khulükhun.

²⁷Nung taotingko ngiongem kantsün tsak shingoi küta Saul tü ngiom, “Liukü laokü ashi! Filistia haiüh goumchi nou jüoheanji!”

²⁸Nungtiphe Saulüh David tü komtsün laolo küta Filistia haiko ehliao khu. Nung shioko nung athang nou tü Apungetsün King ta jonji.

²⁹Nungai David Engedi khiamkhan ai khukü paman.