Read Khiamniungan Naga 1 Sam 25 Bible Online

1 Sam 25 - Khiamniungan Naga bible

1 Sam 25

¹Samuel ean, naiuso Israel hai apem kamkü shiküta apa thaiutha mongsaiu. Nungai ngüsoüh apa mea apa tsam Rama nai khanan. Nungai David Paran liutsa ai khuwan

²Maon noksong ainou Karmel noksong shimkü Nabal tü niankü Kaleb pothso ainou khaiunia tsak noiküla. Apaüh onnemok heng 3, 000, naiuso won hoi heng 1, 000 ta taiutsün apa thatü memei khaiunia noiküla. Apa tsammongnyiu Abigail nung aleng amei naiuso athsümon noitsün nyiuhai tsak, lüko pohai nou to yaang mongthe khaiunia tsak noiküla. Karmel nai Nabalüh apa onnemok hoi akoi tippanji ta

⁴nung thaiutha Paran liutsa ainou Davidüh lula,

⁵nungtiphe apaüh oumhoi che Karmel ai khukü Nabal ko phetekü ta apa hau salam ngio lükiu ta hong.

⁶Apaüh Nabal tü ngioau ngüso tü nungti thilut: “Davidüh ni, atsammongso, naiuso apem dongai salam hongji.

⁷Apaüh a onnemok hoi ni tippantsün lula, naiuso a onnemok jimhoi samko hakü noiküla, lüko ngüso tü tsümeikü ti tsüchhi ta apaüh ngela-iao aiuji. Ngüso Karmel nai noitsün taoko ngüso ün titso tsükaowan.

⁸Tsüojinyangkü sam ni yathsüotsünso hau naiuso ahaimei David hau ni ti kiushi-e, nung lükiu.”

⁹David khaiuniasoüh nung ngiopung David nianko Nabal dongai hong, naiuso ngüsoüh nungko taiukü noiküla,

¹⁰athon nai Nabalüh thalakü ngiom, “David? Apa sau to? Apa thaiutha ngo tilaitso tsülude! Lonyi lühom nouko nung goumchi nou akhulükhuntsün sua nousoüh meankü noin!

¹¹Ti ainou shin ta ngo tsüngekünso hau jü themtsai naiuso khiam, tsüdekünai jü wonkoi tip- pantsün thaiutha loattsün thainian nouso nyih tsükiu-e!”

¹²David khaiuniahoi laokü shiküta Nabalüh ti ngiom, nung apa hau chiten.

¹³“Asam salaiu nouso lüsuplo!” ta apaüh ngiokhem kiu, naiuso ngüso apemüh suplo. Nungko Davidüh lüko apa salaiu suplo küta apa khaiunia tsom püle thatso ko aikü tsalo, naiuso khaiunia nime chihshen paotsangao taiukiu.

¹⁴Nabal tsamki ongko tsaküh apa tsammongnyiu Abigail tü ngiom, “Davidüh liutsa ainou sam APAOU hau salam ngiongem kantsün ajantso hongkü noin ta ni lulamo? lüko apaüh ngüso lochikiu-iu.

¹⁵Lüko ngüso samko thatü meikü noin, ngüsoüh sam tilaitso tsüjunjeki, naiuso atao chikü nai sam ngüso ko hakü eiu ai noiküla, sam ün ti noin nung tsaktso tsükaulükhun.

¹⁶Sam onnemok jimkü noitsün atao chikü ngüsoüh sam asoh si anyi chikü solokiu.

¹⁷Tsüojinyangkü nung tü jam lüyanglu küta ti chhi-e nung lüthalu. Nung sam APAOU naiuso apa tsamkhaiu thaiutha to aküothe noi-e. Apaüh khaiunia sau tü tso tsüangkü hauli apa saisile tsümeikü noin!”

¹⁸Abigailüh themtsai tsan tsom nime, theng nou meankü noitsün nyihkhun nekong nime, atsaotsün onnemok pungo, atsao woi tsoi chekü chinyat, sainaoshep won apung tsom tsak, naiuso phioshep won nou shantsün themtsai tsom nime nouso liukü lokam küta gado hau kan-i.

¹⁹Nungai Abigailüh tsamkihoi nouso tü ngiom, “Asam kha ai tsülaokü lükhu, küta ngo hoilute.” Lüko apaüh apa tsammongpo ta to titso tsüngio.

²⁰Nungai Abigail gado nai moknoikü kinghok nai shi taoko, athaplu, David naiuso apa khaiuniaso ko alekta pheten.

²¹“Nung khaiunia nou jengtsaiu ngo liutsa nai tiauta jimkiukü shin? Apa jengtsaiu tsak lüko tsükaowan, lüko ngo apa hachutsün thaiutha apaüh ngü hau nungti laokiushiji süne ta Davidüh yanghe!

²²Lühom ahom mongko ngo nungso ehenting saokü tsüloat naito, Goa nou ngü hau angja akiu!”

²³Tilai Abigailüh David ep, apa mokthso chiai nou shakta saokü David khako kauthio,

²⁴küta David tü ngiom, “APAOU tsüojinyangkü ngü tü anglu! Alochi lotsao nou ngo theko.

²⁵Tsüojinyangkü Nabal tü ti la anglu, nung ti amei tsüsunkün tsak noin! Apa nian alat nung Mainga, noin nung thakü noin! Atsamkiso shitsün taoko ngo tsünoiküla, APAOU.

²⁶A ehso tü phaoshanao noitsün ainou lolaotsün nung APAOU nou noin. Naiuso lo, ngo ni tü aa noitsün APAOU nianko a ehso naiuso ni tü angja kiuao aiutsün apem tü Nabal li angja kiu-e ta ngiomong shingekü ngioji.

²⁷Tsüojinyangkü APAOU, nung paopei ngo adongai kankü shitsün alokiu, küta nung akhaiuniso hau lükiu.

²⁸Tsüojinyangkü ngo tso aphio chhitaiukü noinai ngü hau awankiu, APAOU nou ni naiuso athsaosithsoso nokpao au the-i-e, tiautenai ni apa thaiutha ehli likiuji, naiuso ni aakihlaiu chikü tsümeikün titso tsüchhi-e.

²⁹Khaiunia ajan- tsoüh ni komkü naiuso loatau aiu naito, khaiunia tsaküh apa chaiou jeng- tsaiu tü jimtsünli, APAOU a Goaüh ni jimkü noi-e. A ehso thaiutha khaiunia tsaküh menkop nou lung kopantsünli, ngüso kopane.

³⁰Tilai APAOU nou apaüh thaloutaiutsün amei chhisiya apem chhikheme naiuso ni Israel nokpao the-i-e,

³¹naito ni mi tsünoikü loattsün tsüdekünai phaosantsün thaiutha ni mongetkü tsüyangelatshi-e, APAOU. Naiuso APAOU nou ni ouk kiutsün taoko tsüojinyangkü ngo labean.”

³²APAOU Israel Goa, sauüh ni lonyi ngü ko pheteao hong, “Apa lülomsan ta Davidüh nyiuhai nou tü ngiom.

³³Khaiunia loattsün ainou, teng- khaiu phaosan ainou, lolaoau ni lonyi ngü hau mongthat amei kiutsün thaiutha Goa nian lülom.

³⁴Ni hau angja kiuao ainou APAOU nou ngo lolaokü wan. Naiuso ngü ko pheteao ni liuliukü tsüshitünto, Nabal khaiunia nouso apem ahom taoko to eankü noi-ela ta ngo Israel Goa nianko ngiomong shingkü ngioji.”

³⁵Nyiuhai nou kankü shitsün Davidüh loküta apa tü ngiom, “Tsüyangelatkü tsamai laokü lükhu. Ni ti aiuji ngo nung chhi-e.”

³⁶Nungai Abigail, Nabal dongai laokü khu, nungai nokpao thaiutha shantsün sümai tsak saohekü noiküla. Nungko apa tukkatkü monglingkü noi lüko, nyiuhai nou apa hau nungthan ahom saokü titso tsüchite.

³⁷Küta apa atukkat ainou mongtsüo shinai, nyiuhai nou apa hau alum chiten. Nungai apa alekta aiulakü iulawan.

³⁸Ajekhaiu chenyi thatso phiai APAOU nou Nabal tü shiuhkü apa ean.

³⁹Tilai Davidüh Nabal eaniu ta lula, apaüh ngiom, “APAOU lülom! Ngo lochitsün thaiutha apaüh Nabal tü phaosaniu, naiuso apa yathsüotsün ngo aphio chhitsün ainou lolaokü taiukiu. Nabal angei thaiutha APAOU nou apa hau angja kiu-iu.” Nungthanko Davidüh Abigail ko tsamsigoh yangao ayang tsak hong.

⁴⁰David tsamkiso menyiu nou dongai Karmel nai khuküta apa tü ngiom, “Davidüh ni apa tsammongnyiu the-iao nialokü ashi ta sam hong.”

⁴¹Abigailüh goh tü thankü kau- thiokü ngiom, “Ngo apa yathsüotsün, apa tsamkiso hok tsawankiuao khemlokü noin.”

⁴²Apa shakta tsaloküta apa gado chiai moknoi. Nungko apa meso pungoüh lamthiokü David tsamkiso ko khuha küta David tsammongnyiu iula.

⁴³Davidüh Jezreel ainou Ahinoam tsamsigoh yangkü noiküla, naiuso loüh Abigail lüko apa tsammongnyiu iulashi.

⁴⁴Nungailu Saulüh apa menyiuthso Maikel sau David tsammongnyiu noiküla apa Gallim noksong ainou Lais thso Palti hau kiuwan.