Read Khiamniungan Naga 1 Sam 26 Bible Online

1 Sam 26 - Khiamniungan Naga bible

1 Sam 26

¹Naiuso Zip ainou khaiunia ajantso Saul noitsün Gibea nai shiküta, David Judea langthun Hakila King ai pamkü noin ta ngiom.

²Nungai Saul apako Israel nai ameiting süpaihoi heng 3, 000 hakü Zip liutsa nai David tü yamao khu

³küta Hakila king yamku nai ngüso kamlo. Nungai David loüh lang nai noiküla, naiuso Davidüh Saul apa tü yamao shikü noin ta lula,

⁴apaüh akautha hoi hong, nungai Saul atsüoting nungko noikü epsan.

⁵Apa shakta khukü Saul naiuso Saul ün süpaihoi ahei Ner thso Abner saitsün athang tsangsheikü thapthiokü taiu. Nungko Saul asaothang mongai sai, naiuso apa khaiunia lemkü asao- thang shankü noiküla.

⁶Nungai Davidüh Hit hai nou Ahimelek naiuso Joab dei nou Abishai (ngüso nyiu Zuria) netü sang, “Aje ongko tsak sau ngüko Saul nejenkhio nai khuha-e?” Abishaiüh thalakü ngiom, “Ngo khuha-e.”

⁷Nungsoh nai David si Abishai ne Saul saothang nai nap, nungai Saul apa lai khaiu dongko goh ai taiukü asaothang awemtingko saikü ep, Abner naiuso süpaihoi nouso apa lemkü saikü noiküla.

⁸Abishaiüh David tü ngiom, “Goa nou a ehso lüsoh a oukong ko kiuwaniu Nungtiphe lo, ngo apa lai loküta apa tü chhi- naiuso ngo apa tü müjam poshiao ti tsüpokü sün tsaklu nou apa goh nou tü lepkü langlute!”

⁹Lüko Davidüh ngiom, “Ni apa tsüloatao noin! Sauhaiüh Goa nou chosantsün nokpao loat-e APAOU nou apa hau atsüoting angja kiu-e.

¹⁰Davidüh ngiom, Aa noitsün APAOU nou tilai Saul eao atao kanjikane, emeiüh ee süne, ehli nai eane süne, tiüh loate nung APAOU nou chhi-e ta ngo ngeji.

¹¹APAOU nou chosantsün nokpao loatao kowetsün ainou APAOU nou ngü alolaokiu! Samüh apa lai naiuso khiam meng loküta khuwanko.

¹²Nungti Davidüh Saul khaiu dongko taiutsün apa lai naiuso khiam meng loküta apa naiuso Abishai khuwan. Nung sauüh tsüep tsüdekünai ti thawao sauüh tsünge, atsüoting tsüchungekü ngüso apem niongau cheikü saianao oukong APAOU nou hongkü noiküla.”

¹³Küta David asoloau intso jetekü nung ainou amao tsamei tsakai khuküta kingson tsakai noi-iu,

¹⁴küta Saul süpaihoi nouso naiuso Abner tü sang songkü wekü ngiom, “Abner! Ni jüsang lula ao shiojimo?” Abnerüh sangkü ngiom, “Nokpao thachukü nung sauüh weji?”

¹⁵Davidüh thalakü ngiom, “Abner, Israel nai asongting khaiunia nou ni tsüde süne? Nungaito, ni, ni ün APAOU, nokpao nou tiauta tsüsojeiji? Loteng khaiunia ajantso ni ün APAOU loatao asaothang nai napiu.

¹⁶Ni achhi nai ashio nou tsüep, Abner! Asam apem eao maikü noin ta ngo aa noitsün APAOU nianko ngiomong shingkü ngioji, tiautenai APAOU nou chosantsün nokpao ni tsüsolo. Athaplu! nokpao lai naiuso apa khaiuphi ko taiutsün khiam meng nou tiai noin!”

¹⁷Saulüh David sang ii ngesan küta sangkü ngiom, “Jüthso David, nung ni so?” Davidüh thalakü ngiom, “Ah, Asuhattsün Nokpao,” nung ngü noin.

¹⁸Naiuso apaüh ngioshin, “Tiau, APAOU, ni lonyi saokü ngo atsamki tü komkeiji? Ngo ti-in aphio chhikü noin?

¹⁹Asuhattsün Nokpao, Ngo ti ngioau noin nung tü anglu: Ni ngü tü khengshitsün APAOU tsangkü naito, apa hau chaithio tsak kiutsün nou apa mong phokle-e; lüko nung khaiunia chhisiya noi naito, APAOU ün athesan ngüso tü lünoi. Tititenai ngüsoüh ngü APAOU ün goumchi ai- nou gohmao goa amkhamao noitsün nai koman.

²⁰APAOU ainou jetekü ngü gohmao goumchi naito laloatani. Chileen tsakli ngü li nou loatao tiau- ta Israel nokpao shiji? Liu waio tsak khekkü ngü tiauta apaüh homate?”

²¹Saulüh thalakü ngiom, “Ngo phiokü chhianiu. Jüthso, David laokü ashi! Ngo ni hau tilaitso angja tsükiushi-e, tiautenai ni lüsoh jü aa nou jasankiu. Ngo mainga noiküla! Ngo thsüokü tsaokü nou chhisiya chhianiu!”

²²Davidüh thalakü ngiom, “Alai nungko noin, Asuhattsün Nokpao. Asam ongko khaiunia tsaküh nung ashilo.

²³Sauhai mongsai thakü naiuso siokü noin, APAOU nou amai nou kiuji. Lonyi apaüh ni jüpha- mongai kiuwan küla lüko APAOU nou chosantsün nokpao tü ngo angja tsükiu.

²⁴Ngo ni aa nou lonyi jasantsünli, APAOU nou ngü ajasan, naiuso angja chikü ainou athakhu-i!”

²⁵Saulüh David tü ngiom, “Ni chhitsün alum ko ashio eppe!” Nungti David meshen yamai khuwan, naiuso Saul apa tsamai laokü shin.