Read Khiamniungan Naga 1 Sam 28 Bible Online

1 Sam 28 - Khiamniungan Naga bible

1 Sam 28

¹Atao intso noiküta, Filistia haiüh ngüso süpaihoi Israel haiko ehli ao kamshin, naiuso Akisüh David tü ngiom, “Ni naiuso akhaiuniaso to jü dongai ngüko hakü ehli-e ta ni ngeji.”

²Davidüh thalakü ngiom, “Nungti to nungtila.” “Ngo ni yathsüotsün noin, naiuso athaiutha ngo ti chhiao shio-e nung ni nge-e.” Akisüh ngiom, “Mein! Ngo ni asaita ngü tü hüao the-i-e.”

³Lo Samuel eankü noiküla, küta Israel hai apem apa thaiutha mongsaiukü apa meshen noknio Rama nai khanan. Saulüh ashiao tao thaiutha aküo chitetsünso naiuso eanhai on ko chitekiutsünso apem Israel goumchi ainou komankü noiküla.

⁴Filistia hai süpaihoi kamshi küta Shunem noksong shimkü ngüso shamnoi, naiuso Saulüh Israel hai kamloküta Gilboa King ai ngüso noiau athang shan.

⁵Tilai Saulüh Filistia hai süpaihoi ep, apa hatat,

⁶küta apaüh APAOU nou ta titi chhi-e ta sang. Lüko APAOU nou meamean tsangkü tsüdekünai Urim si Thum- mim kankeitsün tsangkü naiuso e-po hoi tsangkü lüko athashi tsaktso tsükiu.

⁷Nungai Saulüh apa khemko noitsün asonghoi nouso tü ngiokhem kiukü ngiom, “Ethso haiko chitetsün nyiuhai tsak ngü hau ayamsankiu, küta ngo khukü apa tü sanglu-e.” Ngüsoüh thalakü ngiom, “Endor ai menyiu tsak noin.”

⁸Nungtiphe Saulüh meshen chija kausaikü, neshe amao tholo, küta anyakhem taoko apa khaiuniaso ongko nime hakü nung menyiu ko epeau khu. Apaüh nung menyiu tü ngiom, “Ni thawaoao noin ta ean hai on ta jü thaiutha sangkiukü nung ngü hau achite.” “Ngo nian jonsantsün khaiunia ethso nou ajonshikiu.”

⁹Nung menyiu nou thalakü ngiom, “Nokpao Saulüh ti chhikü noin, apaüh ashiao tao thaiutha aküo chitetsünso naiuso ethso ko chitetsünso Israel ainou koman ta ni nung atsüoting ngekü noin. Nungaito ni ngo jin nai monao naiuso loatao tiauta koweji?”

¹⁰Nungai Saulüh asio ngiomong shing tsak shankü ngiom, “Aa noitsün APAOU nianko nung chhisiyatsün thaiutha ni angja tsü eppe” ta apaüh menyiu nou tü ngiom.

¹¹Nungai menyiu nou sangkü ngiom, “Ngo athaiutha sau ethso jonkiu-e?” Apaüh thalakü ngiom, “Samuel.”

¹²Tilai nung menyiu nou Samuel ep, apa lekkatkü wekü ta Saul tü ngiom, “Tiauta ni ngü tü kausaiji? Ni Nokpao Saul noin!”

¹³Nokpao nou nyiuhai nou tü ngiom, “Ni ti epji?” “Hatkü lanoi” Nyiuhai nou thala, “Ngo onthso tsak goh khei ainou sungtsün epji.”

¹⁴Apaüh sangkü ngiom, “Nung ti khekkü epji?” Nyiuhai nou thalakü ngiom, “Nung petche khaiunia tsak sungkü noin. Apaüh phalaiu phakhut tsak khutkü noin.” Nungai Saulüh nung Samuel ta ngeküta apaüh asuhat kiukü goh ai kauthio.

¹⁵Samuelüh Saul tü ngiom, “Ni ngo tiau jonjek kiuji? Ni ngo tiau laokü shi-ishiji?” Saulüh thalakü ngiom, “Ngo thatü angja nai noin! Filistia hai ngü ko ehli ao tsalokü noin, naiuso Goa nou ngü leaniu. Apaüh ngü tü e-pohoi tsüdekünai mea mean tsangkü lüko loto athalatsün tsünoishi. Nungtiphe ngo ni tü ngo ti chhi-e ta chite-iao thaiutha jonkü noin.”

¹⁶Samuelüh ngiom, “Tilai APAOU nou ni lean küta apa a ehso iula, nungai ni tiauta ngü tü jonji?

¹⁷APAOU nou nitü ngü tsangkü ti ngiokü noiküla, nung chhi-iu; apaüh nokshing oukong nou ni ainou loküta David hau kiuwaniu.

¹⁸Ni APAOU athoilut angio tsüang naiuso Amalek hai si ngüsoüh taiutsün apem moisemkü tsülomo. Nung shioko APAOU nou lo nung ni tü chhiji.

¹⁹Apaüh ni naiuso Israel hai Filistia hai hau kiuwane. Lühom ni, naiuso athso melothso nouso ngüko ha ane, naiuso Israel hai süpaihoi lüko Filistia hai hau kiuwane.”

²⁰Samuelüh ti ngiom, nung tsangkü ahat nou Saul alekta goh ai tsolakü yaktaiukü loian. Apa outsükongkü noiküla, tiautenai apaüh asoh si anyi chikü titso tsüheshiu.

²¹Menyiu nou apa dongai sung nai apa hatatkü ep, nungtiphe nyiuhai nou apa tü ngiom, “Atsüojin, APAOU, ni sangtsün tsangkü ngo thsale lokü chhiji.

²²Nungtiphe lo, tsüojinyangko, ngo ti sangji nung achhikiu. Ngo athaiutha eheshiu intso khemsane, ni kongkü tsakeiao ni nung lühe.”

²³Saulüh titso tsühe-e ta nan, apa khemko noitsün asonghoi nousoüh lüko apa tü lühe ta koja. Apaüh aphiteng nai anglo küta goh ainou tsakü chukü then ai mokkü noi.

²⁴Nung nyiuhai nou apaüh thatsa taiutsün jangtso liukü loat, küta nyiuhai nou wonne ajantso lokü nung phoplao tsüthiokün themtsai intso tsaisan.

²⁵Nyiuhai nou nung eheshiu nou Saul naiuso apa khemko noitsün asonghoi nouso khako taiukiu, küta ngüsoüh nung heshiu. Naiuso nungsoh lu ngüso khuwan.