Read Khiamniungan Naga 1 Sam 30 Bible Online

1 Sam 30 - Khiamniungan Naga bible

1 Sam 30

¹Ajekhaiu nenyi phiai David naiuso apa khaiuniaso Ziklak ai shin. Amalek haiüh Yihuda goumchi ajepekki naiuso Ziklak yampekkü komheankü noiküla. Ngüsoüh noksong nou jekthiowan

²naiuso menyiuhoi apem thalouwan, ngüso tsaktso tsüloat, lüko ngüso khuwantsün ko aikü apem ngüsoko kankü khuwan.

³Tilai David naiuso apa khaiuniasoüh shisaom, ngüsoüh noksong nou jekthiowankü ep, naiuso ngüso tsammongnyiuso, melothsoso, naiuso menyiuthsoso, kanlükhunankü noiküla.

⁴David naiuso apa khaiuniaso shapao yachu, naiuso ngüso ashapao tsüshiokü mo-iulakün lektso shap.

⁵David tsammongnyiu Ahinoam si Abigail ne lüko kanlükhunan hakü noiküla.

⁶Lo to David thatü ayangelat nai noiküla, tiautenai apa khaiuniaso ngüso thsoso mowantsün thaiutha thatü khosakkü yangkü noiküla, naiuso ngüsoüh apa lung nou yakkatkü wanao lohat; lüko APAOU apa Goaüh apa mong losongkiu.

⁷Davidüh Ahimelek thso Abiathar meson tü ngiom, “Ngü hau meson asio phakhut nou kankü ashikiu,” naiuso nung Abiatharüh apa hau kankü shikiu.

⁸Davidüh APAOU tü sangkü ngiom, “Ngo nung ayanheantsünso phiai khu-e süne? naiuso ngo ngüso tha-iu-emo?” APAOU nou thalakü ngiom, “Ngüso phiai komkü lükhu, ni ngüso tha-iu-e, naiuso sua nouso kipsane.”

⁹Nungtiphe David naiuso apa khaiunia tsom luok tsalokü khu, naiuso tilai ngüso Besor haiuthso ai shisaom, ngüso ajantso nungko noian.

¹⁰David apa khaiuniaso tsom püle hakü tsülaokü khu, nungko khaiunia tsom nime to haiuthso yanao thatü tanantsün tsangkü tsüyankü phiai laowan.

¹¹David ko hakü noitsün khaiuniahoi nousoüh Ijip hai melothso tsak kengpun nai eploküta apa David dongai nialokü shin. Ngüsoüh apa hau eheshiu intso naiuso khiam ashiuao kiu,

¹²loüh phio eiu won ajantso naiuso sainaoshep apung nime ta kium. Nung hekütün phiai, apa oukongkü iula, samnyi thumkü apaüh titso tsüheshiukü noiküla.

¹³Davidüh apa tü sangkü ngiom, “Ni nou APAOU sau, naiuso ni ti ainou?” Apaüh thalakü ngiom, “Ngo Amalek hai sua Ijip hai tsak noin.” “Jü APAOU üh ngo samnyi khako leankü khuwan, tiautenai ngo akia noiküla.

¹⁴Samüh Yihuda ajepek nai Keret hai goumchi, naiuso Kaleb kau goumchi yampekkü kom, naiuso samüh Ziklak noksong jekthiowan.”

¹⁵Davidüh apa tü sangkü ngiom, “Ni ngo nungso ayampekkantsünso tü nialut ao shio-emo?” Apaüh thalakü ngiom, “Ni Goa nianko ngo tsüloate naiuso jü APAOU hau tsükiuwane ta thalou naito ngo nialute.”

¹⁶Naiuso apaüh David ngüso dongai nialut. Ngüsoüh Filistia naiuso Yihuda nai thaloutsün jengtsaiu thsüokü piakü nung shioko ayampek khaiuniahoi nousoüh athang apemai hekü naiuso shiukü monglingekü pengpunkü noiküla.

¹⁷Nungthan ajekhaiu ah-shiochan ko aikü David ngüso tü po, naiuso asham thalutkü ehlikü noiküla. Oum khaiunia hoi tsom püle nouso ut chiai moknoikü khuwantsünso tü simkü ngüso khaiunia tsaktso tsüjah.

¹⁸Davidüh Amalekhaiüh kankü khuwantsün alum jengtsaiu naiuso khaiunia apem thaloshi, nungko apa tsam- mongnyiu ne lüko hakü noiküla;

¹⁹apaüh titso tsülomowankü epshin. Davidüh apa khaiuniaso apem ün melothso nouso, menyiuthso nouso, naiuso Amalek haiüh yanlükhunan- tsün jengtsaiu apem laokü epshin.

²⁰Apa thainianso, won hoi, naiuso jang hoi apem eploshin, apa khaiuniasoüh nungso apem ngüso khako kamloküta ngiom, “Nungso to David ün noin!”

²¹Nungai David khaiuniaso tsom nime sauhai apako khuha ao outsükongkü Besor haiuthso sai ai laowan ngüso dongai laokü khu. Ngüso David ko pheteao kha ai shi, naiuso David naiuso apa khaiuniaso ngüso dongai sungküta ngüso mong- lingkü naiuso mongchiokü loum.

²²Lüko khaiunia atheao tsünoikün ajantso sauhai David ko hakü khukü noiküla ngüsoüh ngiom, “Ngüso samko tsükhuha, nungtiphe samüh ngüso hau akamhetsün jengtsaiu titso tsükiuha-e. Ngüsoüh ngüso tsammongnyiuso naiuso methso nouso loküta khuwanao shio-e.”

²³Lüko Davidüh thalakü ngiom, “Jü deisinioso, asamüh APAOU nou sam hau ti kiuwaniu nungtü nungti chhiau tsüshio-e! Apaüh sam hau yampekkü komheantsünso khako ashiolotsün kium naiuso sam eanao ainou lolaokü taiukiu.

²⁴Asamüh ti ngioji nungtü sautso tsümongchio-e! Apemüh wekülu janao noin: eheshiu thatwaotsün nai sauhai noian nung- soüh lüko sauhai ehlithang nai khun nungso ko wekülu eppe.”

²⁵Davidüh nung ngiokhem tsakli shankü noiküla, naiuso nungai yanou Israel haiüh lonyi saokü kankeikü shiji.

²⁶Tilai Ziklak ai shisaom, apa ngiongem nouko hakü Yihuda hai, aheihoi naiuso apa haiso dongai jengtsaiu ajantso hong, “Samüh APAOU ün ehoi ainou lotsün jengtsaiu ainou asam thaiutha hau nungko paopei tsak hongji.”

²⁷Apaüh nungso Bethel nai noitsün khaiuniahoi dongai, Rama nai noitsün khaiuniahoi dongai, Yihuda goumchi ajepekki nai noitsünso dongai, naiuso Jatter noksong nouso ai noitsün khaiuniahoi dongai,

²⁸Aroer nai noitsün khaiuniahoi dongai, Sipmot nai noitsün khaiuniahoi dongai, Estemoa nai noitsün khaiuniahoi dongai,

²⁹naiuso Rakal nai noitsün khaiuniahoi dongai, Jerameel kau dongai, Ken hai dongai,

³⁰Horma noksong nai noitsün khaiuniahoi dongai, Borashan nai noitsün khaiuniahoi dongai, Athak nai noitsün khaiuniahoi dongai,

³¹naiuso Hebron nai noitsün khaiuniahoi dongai, tilüsongai pengpunkü noin nung athang apem nai kiupeng.