Read Khiamniungan Naga 1 Sam 4 Bible Online

1 Sam 4 - Khiamniungan Naga bible

1 Sam 4

¹Nung taoko nai Filistia hai Israel thako ehli iuao kamsan, nungtiphe Israel hai lüko ngüso ko li ao tsalou. Israel haiüh ngüso saothang Ebenezer ai shan, naiuso Filistia haiüh ngüso saothang Aphek nai shan.

²Filistia hai Israel haiko thatü thsüokü li-ekü phiai ngüsoüh Israel hai shiolo, naiuso nung ehlithang nai khaiunia heng püle 4, 000 thatso loatkü wan.

³Tilai athakhutsünso ngüso saothang nai laokü shin, Israel hai ahei nousoüh ngiom, “Tiau APAOU nou lonyi sam Filistia hai hau shiolowan-in? Sam Shilo nai khuküta, Athalou-e Ngiokhem Paidan nou lokü shiko, nungaito apa sam ko khuha-e, naiuso sam eh so ainou sam kipsane.”

⁴Nungtiphe ngüsoüh ngiongem kan- tsünso Shilo nai hong, naiuso APAOU ün Athalou-e Ngiokhem Paidan sübao chiai Cherubim noiji nung kankü shin. Naiuso Eli thso Hopni naiuso Phinehas ne nung Athalou-e Ngiokhem Paidan ko hakü shin.

⁵Tilai Athalou-e Ngiokhem Paidan shingoin, Israel haiüh amongling nou goh tü dankü sang songkü wekü noiküla.

⁶Filistia haiüh nung sang songkü wetsün lula küta ngiom, “Ibri hai saothang nai wetsün apem tü anglu! Nung ti athat?” Tilai ngüsoüh Ibri hai saothang nai APAOU ün Athalou-e Ngiokhem Paidan nou shingoi-iu ta ngesan,

⁷ngüso hatkü noiküla, naiuso ngiom, “Ngüso saothang nai Goa tsak shikü noin! Inyate! Nungti nou sam tü tilaitso tsüthawaode!

⁸Nung oukong goa nouso ainou sam sauüh kipsanao shio-e? Ijip hai liutsa nai loattsün nung goa nouso noin!

⁹Filistia hai, mong lüsong! Melo khekkü ehli lüli, tsüdekünaito, ngüso sam sua ao thekü shitsünli, sam Ibri hai sua ao iula-e. Nungtiphe melo khekkü ehli lüli!”

¹⁰Filistia hai oukongkü eh li, naiuso Israel hai shiohean, ngüso momo nokai khulükhunan. Nungko Israel süpai heng aosam 30, 000 loat- tan, nungai nung achaoattsün thatü songkü noiküla.

¹¹Goa ün Athalou-e Ngiokhem Paidan nou thalowan, naiuso meson Eli thso Hopni si Phinehas ne nemthso loattan.

¹²Benjamin kau ainou khaiunia tsak ehlithang ainou Shilo saokü yam apem jingkü nung ajekhaiu kolu Shilo ai shingoi. Apa mongsaiutsün hankü, apaüh meshen neshe chipek küta apa khaiuai pu nou lamlut.

¹³Eli, sau Athalou-e Ngiokhem Paidan thaiutha thatü yangkü yamtsai ai thapkü moknoiküla, nung khaiunia nou noksong thapekkü ngiongem lopeng, naiuso khaiunia pungkü ahat nou wekü noiküla.

¹⁴Eliüh nung ngem lula küta sangkü ngiom, “Nung ti thaiutha ngemji?” Nung khaiunia nou ngiongem chiteao Eli dongai liukü khu.

¹⁵“Nung taoko Eli achet pon aolükaokü petjei (98) sonkü naiuso niovei pekkankü noiküla.”

¹⁶Nung khaiunia nou ngiom, “Ngo ehlithang ainou thakhu küta lonyi nungai nung yam thathonkü jingkü shingoikü noin.” Eliüh apa tü sang, “Jüthsone, tü ti thawaokü noin?”

¹⁷Nung ngiongem kantsün nou thalan, “Israel hai Filistia hai ainou khupenganiu, naiuso sam thatü thsüokü shioheani-iu! Nungko hakü athso Hopni naiuso Phinehas ne loat- taniu, naiuso Goa ün Athalou-e Ngio- khem Paidan nou thalolükhunaniu!”

¹⁸Tilai nung khaiunia nou Atha- lou-e Ngiokhem Paidan thaiutha chiten, Eli, apa noikham ainou phiai sheikü bekhan dongko loian.Apa thatü sonkü lethsangkü phe, apa loiantsün taoko sang nou ngekkü ean. Apa Israel nai ahei pon aopüle thekü noiküla.

¹⁹Meson Eli thso Phinehas tsam- mongnyiu pem tsükengkü noiküla, naiuso apaüh methso chettao atao saowankü noiküla. Tilai apaüh Goa ün Athalou-e Ngiokhem Paidan tha- lolükhunantsün, naiuso apa kaio Eli naiuso apa tsammongpo Phinehas eanio ta lula, apa alekta methso chetao kiakü sung naiuso methso chetkiu.

²⁰Küta apa eantsün taoko, menyiu sauüh apa methso chet taoko hachukü noiküla, apaüh ngiom, “Mong songkü athe! Athso nung melothso noin!” lüko apaüh nungtü ti tsüthashi.

²¹Nungai nung melothso nian Ikhabod ta niankiu, athat: “Goa ün ajinka nou Israel leaniu” nung Goa ün Athalou-e Ngiokhem Paidan sübao ehoi nousoüh thalowan naiuso apa kaio Eli naiuso apa tsammongpo Phinehas eantsün tsangkü noiküla.

²²Apaüh ngiom, “Goa ün ajinka nou Israel leaniu,” “tiautenai Goa ün Athalou-e Ngiokhem Paidan thalo- lükhunaniu.”