Read Khiamniungan Naga 1 Sam 6 Bible Online

1 Sam 6 - Khiamniungan Naga bible

1 Sam 6

¹APAOU ün Athalou-e Ngiokhem Paidan Filistia nai alei chinyat taiu kütün phiai,

²Khaiunia hoi nousoüh mesonhoi naiuso alonga chhitsünso tü jonkü sang, “Samüh APAOU ün Athalou-e Ngiokhem Paidan nou tü ti chhi-e? Samüh nung tiai noiküla nungai laokü hongshi- etünai to, samüh nungko hakü ti hong-e?”

³Ngüsoüh thalakü ngiom, “Asamüh Israel ün Athalou-e Ngiokhem Paidan laokiu shi-etünaito, asamüh titilünou asam angei mai apa hau paopei tsak to sunkü hongau noin. Nung Athalou-e Ngiokhem Paidan paopei tsüsunkü to laokü tsükhu-iau noin. Nung tsangkü asam alumei eppe, naiuso asamüh apaüh ti thaiutha asam hau angja kiukü noiküla nung epsane.”

⁴Khaiunia hoi nousoüh sangkü ngiom, “Samüh apa hau ti paopei honge?” Ngüsoüh thalakü ngiom, “Filistia nokpao nouso pungkü thaiutha chaiou lakkeng nou langkü chaikia mou pungo, naiuso chaiou lakkeng nou langtsün sao sotsom pungo ta lühong. Nungli imkia asam apem chiai naiuso nokpungo nouso chiai shin.

⁵Nungtiphe asamüh asam chaikia mou nouso naiuso goumchi lotheantsün sao sotsom shanküta Israel Goa hau asuhat kiuao lu noin. Apaüh asam hau, asam goa hau, naiuso asam goumchi hau angja kiutsün ainou laoloau shiom.

⁶Tiauta asam Ijip nokpao naiuso Ijip haili mong kongkü noiji? Israel haiüh Ijip goumchi moleankün lektso Goa nou ngüso titi loaiukü noiküla nung labean.

⁷Nungtiphe mokthso nou tenkeitsün tsamkei ayan tsak naiuso khe jam lüko tsüpi-itingkü jangtso nime ta lükhemlo, küta jangtso nime nou tsamkei nou ta lüphanlut, naiuso jangtso tsam nai lemshikü lütaiu.

⁸APAOU ün Athalou-e Ngiokhem Paidan nou alou, küta nung tsamkei nai athio, naiuso asamüh asam aphio mai chaiou lakkeng nou sotsom shankü apa hau paopei hongtsün nung Paidan dongko thiokü ataiu; küta nung tsamkei nou jangtso hau tenikü lühongan.

⁹Nungai akhutsün tü thapkü lünoi; nung Bet Shemes noksong dongai khunaito, nungüh sam tü aküothe thsüokü hongshitsün nung Israel hai Goa ta hane. Lüko nungli tsükhu künaito, nung imkia Israel Goa üh to tsühong; lüko nungto aküo nou kankü shin ta samüh nge-e.”

¹⁰Ngüsoüh ti ngiokü noiküla nung ngüsoüh chhin. Nungko ngüsoüh jangtso nime loküta nung tsamkei nou tü phanlut, naiuso athso nouso tsamai kiapkü wanan.

¹¹Ngüsoüh Athalou-e Ngiokhem Paidan nou tsamkei nai thio, nungko hakü sao naiuso chaikia mou sotsom chaiou lakkeng nou lang nou thiotaiutsün paidan nou thioha.

¹²Nung jangtso nime nou Bet Shemes yamai tsüsameshikü saitha ngao kü khuwan. Filistia hai nokpao pungo nousoüh Bet Shemes elung saokü thaiukü khu.

¹³Bet Shemes khaiunia nouso tsamei nai whet tso be-eiuyam tao noiküla, ngüsoüh alekta langsankü thapnai Athalou-e Ngiokhem Paidan nou ep. Nung epnai ngüso thatü monglingkü noiküla.

¹⁴Nung tsamkei nou Bet Shemes nai kihtsün khaiunia tsak nian Yihusua, apa eiu ai shin, nungai nung Paidan kankü shitsün lung asong tsak shimkü lao. Nungko nung khaiunia hoi nousoüh Paidan soppek küta jangtso nouso loatkü APAOU tü ajahtsün aloat chaithio kiu.

¹⁵Levi hoi nousoüh nung APAOU ün Athalou-e Ngiokhem Paidan nou, naiuso chaiou lakkeng nou langkü sotsom thiotsün paidan lokü ta lung asong chiai letaiu. Nungai Bet Shemes haiüh ajah chaithio naiuso amao chaithio nouso APAOU hau thio.

¹⁶Filistia hai nokpao pungo nousoüh nung chhi nou tü thapkü noi küta nung ajekhaiu kolu Ekron nai laokü khuwan.

¹⁷Filistia haiüh APAOU tü aphio mai chaithio thaiutha laokü kiutsün chaiou lakkeng nou langtsün chaikia mou nouso ngüso noknio Asdod, Gaza, Askelon, Gat, naiuso Ekron nungso thaiutha noiküla.

¹⁸Lüko Filistia hai nokpao pungoüh shingkü noitsün noknio pungo sübao bejeikü tsüdekünai tsübejeikü noin nungso thaiutha ko chaiou lakkeng nou langtsün sao sotsom nouso noiküla. Lonyi saokü Bet Shemes hai nou Yihusua sau eiu ai lung asong tsak chiai ngüsoüh APAOU Athalou-e Ngiokhem Paidan letaiuküla nung mitha tsak noin.

¹⁹Bet Shemes haiüh Athalou-e Ngiokhem Paidan mongai thap- thiotsün shioko, APAOU nou khaiunia aochinyat loatkü wan. Naiuso APAOU nou nungti apiating chaoat nou shioko ngüso mongsaiukü noi.

²⁰Nungtiphe Bet Shemes haiüh ngiom, “Nung asio Goa APAOU khako sau tsa au shio-e? Apa sam ainou honganao shio-e mo?”

²¹Ngüsoüh Kiriat Jearim hai tü ngioau ngiongem kantsünso hong, “Filistia haiüh APAOU ün Athalou-e Ngiokhem Paidan laoshikü noin, saoküta nung alou.”