Read Khiamniungan Naga 1 Sam 7 Bible Online

1 Sam 7 - Khiamniungan Naga bible

1 Sam 7

¹Nungtiphe Kiriat Jearim haiüh APAOU ün Athalou-e Ngiokhem Paidan loküta choi nai kihtsün khaiunia tsak nian nou Abinadab tsamai taiu. Nungko ngüsoüh apa thso Eleazar losioküta nung tü pao- tsangao taiukiu.

²APAOU ün Athalou-e Ngiokhem Paidan Kiriat Jearim nai pon khei ngoikü atao laiukü taiuwan. Nung taoko Israel hai apemüh APAOU tü ahachu thaiutha wekü noiküla.

³Samuelüh Israel hai tü ngiom, “Asam APAOU dongai mong apem nou phokle-e tünaito, asamüh gohmao goa nouso apem naiuso Astart menyiu sotsom nou wanao noin. Asam APAOU hau thumkü kiukü lülosiolo, naiuso apa lu lüamkham, nungai apaüh asam Filistia hai oukong ainou kipsane.”

⁴Nungtiphe Israel haiüh Baal naiuso Astart sotsom nouso wanan, küta APAOU lu amkham.

⁵Nungai Samuelüh Israel hai apem Mizpa nai kamshiao jon küta, “Ngo nungko asam thaiutha APAOU tü misao-e ta ngiom,”

⁶Nungtiphe ngüso apem Mizpa nai kamshin, nungko ngüsoüh khiam intso khaiulo küta nung APAOU khako chaithio tsakli satpeng, naiuso ngüso nung ajekhaiu thumkü keithon noiküla. Ngüsoüh ngiom, “Samüh APAOU thako angei sunlo-iu.” (Israel hai ongko tsüngela-ekü sungtsün nung Samuelüh Mizpa nai lotsamkiu.)

⁷Tilai Filistia haiüh Israel hai Mizpa nai kamshikü noin ta lula, Filistia hai nokpao pungo nouso ngüso khaiuniahoi hakü Israel hai komao tsalo. Israel haiüh nung lula nai hatkü noiküla,

⁸küta Samuel tü ngiom, “Filistia hai ainou sam kipsanao APAOU sam Goa tü tsülaokü misao asao.”

⁹Samuelüh onnemok- thso tsak loat küta nung thumkü jahkü APAOU hau chaithio tsak kium. Küta apaüh APAOU tü Israel hai tü ahachu ta misao sao, naiuso APAOU nou apa misao thala.

¹⁰Samuelüh aloat chaithio kiutsün taoko, Filistia hai ngüso komao shin; lüko nung taoting ko nai APAOU nou ngüso thako aün ainou ahmok moklut. Ngüso thsüokü henyi naiuso lekkatkü khupeng.

¹¹Israel hai Mizpa ainou tsalokü Filistia hai tü Betkar saokü kumkü khu, naiuso ngüso yam thathonkü loatkü wan.

¹²Nungai Samuelüh lung tsak loküta Mizpa si Shen ne jetko kitaiu küta nungtü Ebenezer ta ngiom athat: “Nung saokü nouko APAOU nou sam hachukü shin,”- naiuso apaüh nungtü “Ahachutsün Lung” ta jon.

¹³Nungti Israel haiüh Filistia hai shiolo, naiuso APAOU nou Samuel aa noitsün lektso ngüso hau Israel hai goumchi tsüjohe-iau loyangkü wan.

¹⁴Ekron si Gat ne jetko noitsün Filistia haiüh thalowantsün noknio nouso apem Israel hai hau laokü kiushin, naiuso Israel haiüh nungso goumchi apem epshin. Naiuso Israel hai si Kanan hai jetko lüko nokmei noiküla.

¹⁵Samuelüh Israel nai apa aakihtsün lektso nokshing shing.

¹⁶Pon pungkü apaüh Bethel, Gilgal, naiuso Mizpa noknio nouso ko tsüngela-ekü noitsün mi apem lotsamkiu.

¹⁷Küta apa meshen tsam Rama nai laokü khukü mikhem chhi chhikü noiküla. Apaüh Rama nai APAOU hau amthang tsak shan.