Read Khiamniungan Naga 1 Sam 8 Bible Online

1 Sam 8 - Khiamniungan Naga bible

1 Sam 8

¹Tilai Samuel sonkü iula, apaüh apa thsoso Israel nai mikhemhoi shankiu.

²Niochong nou Yoel, naiuso anio nou Abija, naiuso ngüso Bersheba nai mikhemhoi noiküla.

³Lüko ngüsoüh ngüso poüh tsandetsün tü tsühoilut, ngüso chaisiou tü lu mongkiukü noiküla, nungtiphe ngüsoüh nekhem paopei nouso lou, naiuso mi nouso ngiotsüo nai tsükhemkiu.

⁴Nungai Israel hai aheihoi apem kamshi küta Rama nai Samuel dongai khu,

⁵kü apa tü ngiom, “Athaplu, ni sonanji, naiuso athsosoüh ni tsandetsün tü tsühoilut. Nungtiphe sam tü shingao nokpao tsak achokiu, nungaito me goumchi ai noitsünli samüh lüko nokpao noi-e.”

⁶Ngüsoüh nokpao tsak akiu ta kojatsün ko Samuel tsümonglingkü noiküla; nungtiphe apaüh APAOU tü misao sao,

⁷naiuso APAOU nou ngiom, “Khaiuniahoi nousoüh ni tü ngiotsün alum tü lüang. Ngüsoüh wanantsün nung ni tsüde, lüko ngo, ngüso nokpao ngüsoüh wananji.

⁸Ngo ngüso Ijip ainou niasantsün tao nai yakü, ngüso ngü ainou phoklekü khuwan küta amaohai goa nouso amkhamji, naiuso ngüsoüh asaita ngü tü ti chhikü noiküla, nung lo ni tü lüko chhiji.

⁹Nungtiphe ngüso tü lü anglu, ngüso hau alotsüo kongkü lükiu naiuso ngüso nokpao nousoüh ngüso titi kankei-e nung ngüso hau lüchite.”

¹⁰Sauhaiüh nokpao tsak akiu ta saoji, ngüso tü APAOU nou ngiotsün Samuelüh alum chiten.

¹¹Apaüh nungti chitekü noiküla: “Asam nokpaoüh asam tü nungti kankei-e” “Apaüh asam thsoso süpaihoi shane, ajantso apa ün ehli tsamkei nai the-e, naiuso amao nousoüh apa mokthso nou tenkeitsün tsamkei khako jinge.

¹²Apaüh ngüso ajantso heng tsak chiai asong shankiu-e, naiuso amao ajantso aopungo chiai asong shan- kiu-e. Asam thsoüh apa eiu nouso ah kiu-e, apa khülam be-eiuyam kiu-e, naiuso apa hau dun nouso shankiu-e, naiuso apa mokthso nou niakeitsün tsamkei jengtsaiu shankiu-e.

¹³Asam menyiuthsosoüh apa thaiu- tha angannyam nouso shansane naiuso apa chih thengkiu-e, naiuso apa themtsai tsaikiu-e.

¹⁴Apaüh asam eiu ameiting, sainaoshep eiu nouso, naiuso Olip pai nouso lowane, küta apa khemko aheihoi hau kiuwane.

¹⁵Apaüh asam khülam ainou ekwe, naiuso apa mikhemthang ai aheihoi hau asam ün sainaoshep lowane.

¹⁶Apaüh asam tsamki nouso, jangtso ameiting nouso, naiuso gado nouso lowane, küta nungso hau apa chhi chhi-i-e.

¹⁷Apaüh asam onnemok hoi ainou ekwe lou-e; naiuso asam apa sua iula-e.

¹⁸Tilai nung atao shi-e, asamüh asam chija chosantsün asam nokpao shioko thatü nam name, lüko asam nam namtsün tü APAOU nou tsüanglu-e.”

¹⁹Samuelüh ngiotsün tü khaiuniahoi nousoüh mong tsükiukü, nungtibao thashikü ngiom, “Tsüde! Samüh nokpao tsak aiuji,

²⁰nungaito sam lüko me mele khekkü noi-e, sam nokpaoüh sam tü nokshinge naiuso sam thaiutha ehli likiu-e.”

²¹Samuelüh ngüso ngio alum anglu küta khukü APAOU hau chiten.

²²Nungai APAOU nou thalakü ngiom, “Nungsoüh ti aiuji nung lüchhi naiuso ngüso hau nokpao tsak lüchokiu.” Nungai Israel hai apem tü momo tsamai laokü lükhu ta Samuelüh ngiom.