Read Khoekhoegowab Genesis 1 Bible Online

Genesis 1 - Khoekhoegowab bible

Genesis 1

¹Tsoatsoas ǃnâb ge Eloba ǀhommi tsî ǃhūbaib tsîkha ge kuru.

²Tsî ǃhūbaib ge ǃū-aisa tsî ǀkhaiǃnâ ge i, tsî ǃkhaenab ge ǃgammi di ais ai ge hâ i, tsî Gagab Elob dib ge ǁgamgu ai gere ǀnaremas.

³Ob ge Eloba ge mî: ǃNâba ab hâ! Ob ge ǃnâba ge hâ.

⁴Tsî Elob ge ge mû, ǃnâb a ǃgâi ǃkhaisa; tsî Elob ge ǀgorasa ǃnâb tsî ǃkhaenab tsîkha ǁaegu ge dī.

⁵Tsî Elob ge ǃnâba tsēb ti ge ǂgai, tsî ǃkhaenabab ge tsuxub ti ge ǂgai. ǃNubai i ge ǃui ge i tsî i ge ǁgoa ge i; ǂguro tsēs.

⁶Ob ge Eloba ge mî: ǃĀǂuisaba ab hâ ǁgamgu ǁaegu, îb ǁîba ǀgorasa dī, ǁgamgu tsî ǁgamgu ǁaegu.

⁷ǃNubaib ge Eloba ǁnā ǃāǂuisaba ge dī, tsîb ge ǀgorasa ge dī ǁgamgu ǃāǂuisab ǃnaga hâgu tsî ǁgamgu ǃāǂuisab ǂamǃnâ hâgu ǁaegu. Tsî i ge ǁnāti ge ī.

⁸Tsî Elob ge ǃāǂuisaba ǀhommi ti ge ǂgai. ǃNubai i ge ǃui ge i tsî i ge ǁgoa ge i; ǀgamǁî tsēs.

⁹Ob ge Eloba ge mî: A gu ǁgamga ǀhommi ǃnaga ǀgui ǃkhais ǀguis tawa ǀhao, îb ǂnâsaba mûhe! Tsî i ge ǁnāti ge ī.

¹⁰Tsî Elob ge ǂnâsaba ǃhūb ti ge ǂgai, tsî ǁgamgu ǀhaosab ge hurib ti ge ǂgai. Tsî Elob ge ge mû ǃgâi i a ǃkhaisa.

¹¹Ob ge Eloba ge mî: Ab ǃhūba ūǀkhī, ǀgân tsî ǁhaon ǃkhomna ra tsoron tsî ǂûtani ra hain, ǁîn di ǃnôab ai ra ǂûtanin, ǃkhommi âna ǁîn ǃnâ ūhâna ǃhūbaib ai! Tsî i ge ǁnāti ge ī.

¹²Ob ge ǃhūba ge ūǀkhī ǀgân tsî ǁhaon, ǃkhomna ra tsorona ǁîn di ǃnôab ai tsî ǂûtani ra hain, ǃkhomna ǁîn ǃnâ ūhâna ǁîn di ǃnôab ai. Tsî Elob ge ge mû, ǃgâi i a ǃkhaisa.

¹³ǃNubai i ge ǃui ge i, tsî i ge ǁgoa ge i; ǃnonaǁî tsēs.

¹⁴Ob ge Eloba ge mî: An ǃnâna hâ ǀhommi di ǃāǂuisab tawa, ǀgorasan nî dīse tsēs tsî tsuxub tsîra ǁaegu; saosen nî īse kamagu tsî tsēdi tsî kurigu tsîn dise,

¹⁵ǃnân nîse ǀhommi di ǃāǂuisab ai, ǃhūbaiban nî ǃnâǃnâse. Tsî i ge ǁnāti ge ī.

¹⁶Tsî Elob ge ǁnā ǀgam kai ǃnâkha ge dī, ǁnā kai ǃnâba tsēsab nî gaose tsî ǁnā ǂkhari ǃnâba tsuxubab nî gaose tsî ǀgamirodi ona.

¹⁷Tsî Elob ge ǁîna ǃāǂuisab ǀhommi dib ai ge ǂnûi, ǃhūbaiban nî ǃnâǃnâse,

¹⁸tsî gaoǂamn nîse tsēs tsî tsuxub tsîra, tsî ǀgorasan nî dīse ǃnâb tsî ǃkhaenab tsîkha ǁaegu. Tsî Elob ge ge mû, ǃgâi i a ǃkhaisa.

¹⁹ǃNubai i ge ǃui ge i tsî i ge ǁgoa ge i, hakaǁî tsēs.

²⁰Ob ge Eloba ge mî: A gu ǁgamga ǃnāǂamsase ūǀkhī gons ûitsama ǀomdi disa, în anina doe ǃhūbaib ǂamǃnâ ǀhommi di ǃāǂuisab ǃnâ!

²¹Tsî Elob ge kai ǂkharaga ge dī tsî ûitsama gon ra ǀoms hoas, ǁgamgu ge ǃnāǂamsase ūǀkhīsa ǁîs di ǃnôab ǃoa, tsî ǁgaboxa anin hoana ǁîn di ǃnôaba ǃoa. Tsî Elob ge ge mû ǃgâi i a ǃkhaisa.

²²Tsî Elob ge ǁîna ǀkhae tsî ge mî: ǂÛǂûxaǃnâ î du ǂguiǂguisen, î du ǁnā ǁgamgu, hurigu ǃnâ hâga ǀoaǀoa; în anina ǂguiǂguisen ǃhūbaib ai.

²³ǃNubai i ge ǃui ge i tsî i ge ǁgoa ge i; koroǁî tsēs.

²⁴Ob ge Eloba ge mî: Ab ǃhūba ūǀkhī ûitsama ǀomde ǁîdi di ǃnôaba ǃoa, tsî ǂhanaben tsî ǀgurun ǃhūbaib din tsîna ǁîn di ǃnôaba ǃoa! Tsî i ge ǁnāti ge ī.

²⁵Tsî Elob ge ǀgurun ǃhūbaib dina ge dī, ǁîn di ǃnôaba ǃoa, tsî ǀgoana ǁîn di ǃnôaba ǃoa, tsî ǂhanaben ǃhūbaib din hoana ǁîn di ǃnôaba ǃoa. Tsî Elob ge ge mû, ǃgâi i a ǃkhaisa.

²⁶Tsîb ge Eloba ge mî: A ge khoena dī, sage di īb ǃoa, sage di ǀguiti-ība ǃoa, în gaosîsen ǁaun hurib din ǂama, tsî anin ǀhommi din ǂama, tsî ǀgoan ǂama, tsî ǃhūbaib hoaragab ǂama, tsî ǂhanaben, ǃhūb ai ra ǂhanan hoan ǂama.

²⁷Ob ge Eloba khoeba ge ǂnubi ǁîb di ība ǃoa. Īb Elob dib ǃoab ge ǁîba ge ǂnubi, aob tsî taras tsîra aseb ge ǁîra ge ǂnubi.

²⁸Tsî Elob ge ǁîra ǀkhae tsî ge mîǀî: ǂÛǂûxaǃnâ, î ro ǂguiǂguisen, î ro ǃhūbaiba ǀoaǀoa î ro ǁîba saro ǃnaga dībasen, î ro gaosîsen ǁaun hurib din ǂama, tsî anin ǀhommi din ǂama, tsî mâ ǀguru-i ǃhūb ai ra ǂhana-i hoa-i ǂama.

²⁹Tsîb ge Eloba ge mî: Tita ge saro ǃkhomna ra tsoro ǁhaon hoana ge mā, ǃhūbaib hoaragab ai hâna, tsî haiǃnôa-i hoa-i tsoro ra ǂûna ǁî-i ǃnâ ūhâ-i hoa-i tsîna, î ro ǁîna ǂûse ūhâ!

³⁰Xawe mâ ǀguru-i ǃhūbaib di-i hoa-i tsî mâ ani-i ǀhommi di-i hoa-i tsî mâ ǂhanabe-i ǃhūb ai ra ǂhana-i, ûitsama ǀoms hâǃnâ-i, ǁî-e ta ge tita ǃam ǁhaona ǂûse ge mā. Tsî i ge ǁnāti ge ī.

³¹Tsîb ge Eloba dīb gen hoana ge kōǀî, tsî mû, kaisen ge ǃgâi ge i. ǃNubai i ge ǃui ge i tsî i ge ǁgoa ge i; ǃnaniǁî tsēs.