Read Khoekhoegowab Genesis 11 Bible Online

Genesis 11 - Khoekhoegowab bible

Genesis 11

¹Tsî ǃhūbaib hoaragab ge ǀgui gowab ǀguib tsî ǀguiti-ī mîde ge ūhâ i.

²Tsî i ge ge ī, aiǂoasa xun ra doe hîan ge ǂgā-e ge hō Sinarǃhūb ǃnâ tsîn ge ǁnāpa ge sī ǁan.

³Tsîn ge mâ-i hoa-e ǀgūkhoe-i â-e ǃoa ge mî: Hā î da ǂgoaǀuide ǂnubi, î da ǁîde ǀaes ǀkha khauǁanǁan. Tsî ǂgoaǀuis ge ǁîna ǂnubiǀuise ge ība i tsî ǂae ra ǃhūb ge ǁîna ǂae ra ǂgoase ge ība i.

⁴Tsîn ge ge mî: Hā î da ǃā-e ǂnubibasen, tsî ǂgō-om-i ǀams â-i ǀhommi kōse nî sī-e; î da ǀon-e dībasen, î da tā ǀnîsi ǃhūbaib hoaragab ai ǀgaruǀgaruhe!

⁵ǃNubaib ge ǃKhūba ge ǁgôaxa, ǃās tsî ǂgō-ommi tsîra khoen ôan ra ǂnubirab nî kōse.

⁶Ob ge ǃKhūba ge mî: Mû, ǀgui ǁaes ǀguis tsîn ge ǀgui gowab ǀguiba ūhâ; tsî nēs ge ǁîn ra dītsoatsoasa, tsî nēsi ǁnâi ǃgaoǁnâbasen tide, dī nîsen ǂâibasen hâ xūn hoana?

⁷Hā î ge sage ǁgôa î ge ǁnāpa ǁîn di gowaba ǀhomaǀhoma, î-i mâ-i hoa-e nau khoe-i di gowaba tā ǁnâu.

⁸Nētib ge ǃKhūba ǁîna ǁnāpa xu ǃhūbaib hoaragab ai ge ǀgaruǀgaru; on ge ǃāsa ge ǂnubiǀû.

⁹ǁNā-amagas ge ǁîs di ǀonsa Babel ti ge ǂgaihe; ǁnāpab ge ǃKhūba gowab ǃhūbaib hoaragab diba ǀhomaǀhoma xui-ao, tsî ǁnāpa xub ge ǃKhūba ǁîna ǃhūbaib hoaragab ai ǀgaruǀgaru xui-ao.

¹⁰Nēdi ge ǃnaedi Semmi dide: Semmi ge ǀguikaidisi kurixao, ob ge Arpaxsada ge hō, ǀgam kurikha kai dâus khaoǃgâ.

¹¹Tsî Semmi ge Arpaxsadab ge hō hâ is khaoǃgâ korokaidisi kuriga ge ûi, tsîb ge ǀgôagu tsî ǀgôadi tsîna ge hō.

¹²Tsî Arpaxsadi ge ǃnonadisikoroǀa kuriga ûi tsî Selaxa ge hō.

¹³Tsî Arpaxsadi ge Selaxab ge hō hâ is khaoǃgâ hakakaidisi tsî ǃnona kuriga ûi tsî ǀgôagu tsî ǀgôadi tsîna ge hō.

¹⁴Tsî Selaxi ge ǃnonadisi kuriga ge ûi tsî Ebera ge hō.

¹⁵Tsî Selaxi ge Eberab ge hō hâ is khaoǃgâ hakakaidisi tsî ǃnona kuriga ûi tsî ǀgôagu tsî ǀgôadi tsîna ge hō.

¹⁶Tsî Eberi ge ǃnonadisihakaǀa kuriga ûi tsî Pelega ge hō.

¹⁷Tsî Eberi ge Pelegab ge hō hâ is khaoǃgâ hakakaidisi ǃnonadisi kuriga ûi tsî ǀgôagu tsî ǀgôadi tsîna ge hō.

¹⁸Tsî Pelegi ge ǃnonadisi kuriga ûi tsî Reguba ge hō.

¹⁹Tsî Pelegi ge Regubab ge hō hâ is khaoǃgâ ǀgamkaidisi tsî khoese kuriga ûi tsî ǀgôagu tsî ǀgôadi tsîna ge hō.

²⁰Tsî Regub ge ǃnonadisiǀgamǀa kuriga ûi tsî Seruga ge hō.

²¹Tsî Regub ge Serugab ge hō hâ is khaoǃgâ ǀgamkaidisi tsî hû kuriga ûi tsî ǀgôagu tsî ǀgôadi tsîna ge hō.

²²Tsî Serugi ge ǃnonadisi kuriga ûi tsî Nahora ge hō.

²³Tsî Serugi ge Nahorab ge hō hâ is khaoǃgâ ǀgamkaidisi kuriga ûi tsî ǀgôagu tsî ǀgôadi tsîna ge hō.

²⁴Tsî Nahori ge ǀgamdisikhoeseǀa kuriga ûi tsî Teraxa ge hō.

²⁵Tsî Nahori ge Teraxab ge hō hâ is khaoǃgâ ǀguikaidisi tsî disikhoeseǀa kuriga ûi tsî ǀgôagu tsî ǀgôadi tsîna ge hō.

²⁶Tsî Teraxi ge hûdisi kuriga ûi tsî Abrammi, Nahori tsî Haranni tsîga ge hō.

²⁷Tsî nēdi ge ǃnaedi Teraxi dide: Teraxi ge Abrammi, Nahori tsî Haranni tsîga ge hō; tsî Haranni ge Lota ge hō.

²⁸Tsî Haranni ge ǁgûb âb xa ge aiǁō, ǃnaes âb di ǃhūb ǃnâ, Urs Xaldeǃhūb dis tawa.

²⁹Tsî Abrammi tsî Nahori tsîkha ge tarara ge ūbasen; tsî taras Abrammi dis di ǀons ge Sarai tsî taras Nahori dis di ǀons ge Milka ge i, Haranni ôasa, Milkas îb tsî Jiskas îb ge a ǁî.

³⁰Tsî Sarais ge ǁora tama tsî ǀgôa-e ūhâ tama ge hâ i.

³¹Tsî Teraxi ge Abrammi ǁîb di ôab tsî Loti, Haranni ǁîb ôab di ôab, tsî Sarais ǁîb di ǀuiǀgôas, ǁîb ôab Abrammi di taras tsîna ū tsî ǁîn ǀkha Urs Xaldeǃhūb dis disa xu ge doeǂoa, Kanaanǃhūb ǃoab nî doese; tsîn ge Harans kōse sī tsî ǁnāpa sī ge ǁan.

³²Tsî Terab di tsēdi ge ǀgamkaidisi tsî koro kuri ge i; tsîb ge Teraxa Harans tawa ge ǁō.