Read Khoekhoegowab Genesis 12 Bible Online

Genesis 12 - Khoekhoegowab bible

Genesis 12

¹Tsî ǀnaib ge ǃKhūba Abrammi ǃoa ge mî hâ i: Doeǂoa sa ǃhūba xu tsî sa ǀaokhoexagusa xu tsî sa îb di omma xu, ǁnā ǃhūb tita nîra ǁgau tsiba ǃoa.

²Tsî ta ge tita kai ǁaese nîra dī tsi tsî nîra ǀkhae tsi, tsî kai ǀon-e nîra dība tsi; îts ǀkhaese ī!

³Tita ge nîra ǀkhae ǁnān satsa ra ǀkhaena, tsî nîra ǀâxare ǁnān satsa ra ǀâxarena, tsî sats ǃnâ di ge ǃhūbaib di ǃhaodi hoade nîra ǀkhaehe.

⁴Ob ge Abramma ge doe, ǃKhūb ge ǁîb ǃoa mî khami, tsî Loti ge ǁîb ǀkha ge doe; tsî Abrammi ge hûdisikoroǀa kurixa ge i, Haransa xub ge doeǂoa ǃnubai.

⁵Ob ge Abramma Sarais ǁîb di taras tsî Loti, ǃgâsab âb di ôaba ū tsî xūn, ǁîkha ge ǀhaoǀhaobasen xūn tsî ǀomdi, Harans ǃnâ kha ge hōdi tsîna, tsîn ge ge doeǂoa, Kanaanǃhūb ǃoan nî doese, tsîn ge Kanaanǃhūb ǃnâ ge sī.

⁶Tsî Abrammi ge ǃhūba ge doeǃnâǃganu Sexems ti ǀon hâ ǃās, terpentinhais, Mores kōse; tsî Kanaanǁîn ge ǁnā ǁaeb ai ǃhūb ǃnâ ge hâ i.

⁷ǃNubaib ge ǃKhūba Abrammi tawa ǂhai tsî ge mî: Sa suriba ta ge tita nē ǃhūba nîra mā. ǃNubaib ge ǁnāpa ǃKhūb, ǁîb tawa go ǂhaiba altar-e ge ǂnubiba.

⁸Tsîb ge ǁnāpa xu ge ǂnauǁnâ ǃhommi, Bet-Elsa xu aiǂoasǀî ǁgoeb ǃoa, tsîb ge tentoms âba ge om Bet-Els huribǀî tsî Ais aiǂoasǀî hâǃâ; tsîb ge ǁîba ǁnāpa ǃKhūba altar-e ge ǂnubiba tsî ǃKhūb ǀonsa ge ǂgaiǀî.

⁹ǁNās khaoǃgâb ge Abramma dāǁnâ tsî ǃaruǀî ǃKhawagasǃhūb ǁga ge doe.

¹⁰Tsî ǃâtsūǀkhāb ge ǃhūb ǃnâ ge hā; ob ge Abramma Egipteb ǃoa ge doeǁgôa, ǁnāpab nî ǃhaokhoese hâga, ǃâtsūǀkhāb ǁnā ǃhūb ǃnâ a ǃgom xui-ao.

¹¹Tsî i ge ge ī, Egipteb ǃnâ sīsab ge ǀgūo, ob ge Sarais ǁîb di taras ǃoa ge mî: Mû, tita ge a ǂan îsa taras a ǃkhaisa.

¹²O i ge nî ī, Egipteǁîgu ga sasa mûo, o gu ge: Nēs ge ǁîb di tarasa, ti mî tsî tita nî ǃgam tsî sasa nî ûi kai.

¹³Mî ǁnâi re ti ǃgâsas a ǃkhaisa, î ta ǃgâibahe re sas ǃaroma, îs ti ǀomsa ûi re sas ǃaroma.

¹⁴Tsî i ge ge ǃnae, Abrammi ge Egipteb ǃnâ sīo, o gu ge Egipteǁîga nē tarasa ge mû, kaises a îsa ǃkhaisa.

¹⁵ǁKhāti gu ge gaosagu Faraob diga ǁîsa mû tsî Faraob aiǃâ ge koa si, os ge tarasa Faraob ommi ǃoa ge ūsīhe.

¹⁶Tsîb ge ǁîba Abramma ge ǃgâidī ǁîs ǃaroma, ob ge gūn, goman, eselgu, ǃgāgu, ǃgādi, eseldi tsî ǃnain tsîna ge ūhâ i.

¹⁷Xawe ǃKhūb ge Faraoba ǁnora-aiǃnôan ǀkha ge ǁnora, tsî ommi âb ona Sarais Abrammi di taras ǃaroma.

¹⁸Ob ge Faraoba Abramma ǂgai tsî ge mî: Tare-e sats go dī te-e? Tarexats ǂanǂan te tama hâ, ǁîs a sa tara ǃkhaisa?

¹⁹Tare xū-i ǃaromats kha ǁîs a ti ǃgâ ti go mî, o ta go ǁîsa ǁaupe tarase ūbasen ǁga? Tsî nēsi ǁnâi, nēs hâ sa tarasa, xuige ū si îts ǃgû re!

²⁰ǃNubaib ge Faraoba aogu âba ǁîb ǃaroma ge mîmā, o gu ge ǁîba ge ǁnū tsî taras âb tsî ūb hâ xūn hoana.