Read Khoekhoegowab Genesis 13 Bible Online

Genesis 13 - Khoekhoegowab bible

Genesis 13

¹Nētib ge Abramma Egipteba xu ge doeǃapa ǃkhawagasǀî, ǁîb tsî taras âb tsî ūb hâ xūn hoan tsî Loti ona ǁîb ǀkha.

²Tsî Abrammi ge kaise ǃkhū ge hâ i ǀgoan, ǀhaiǀurib tsî ǃhuniǀurib ǃnâ.

³Tsîb ge doemas âb ǃnâ ǃkhawagasǀî Bet-Els kōse ge sī ǁnā ǃās tentoms âb tsoatsoas ǃnâ ge hâ is kōse, Bet-Els tsî Ais tsîra ǁaegu;

⁴ǁnā ǃkhais, ǁnā altars ǂguroseb ge dīs dis kōse; tsî Abrammi ge ǁnāpa ǃKhūb di ǀonsa gere ǂgaiǀî.

⁵Tsî Loti, Abrammi ǀkha ge doeb ge ǁkhāti gūn, goman tsî tentomdi tsîna ge ūhâ i.

⁶Ob ge ǁnā ǃhūba ǁîkha tani tama ge hâ i ǁanǀhaosa; xūn âkha ge ǂgui ge i, ǁanǀhao ǁoa kha ge is kōse.

⁷O i ge ge ī, Abrammi ǀgoan di ǃûi-aogu tsî Loti ǀgoan di ǃûi-aogu ǁaegu i ǁhaiǃāgu-e ge hā ǃkhaisa. Tsîn ge ǁkhāti Kanaanǁîn tsî Perisiǁîn tsîna ǁkhā ǁaeb ai ǁnā ǃhūb ǃnâ ge ǁan.

⁸Ob ge Abramma Loti ǃoa ge mî: A-i tā ǂnoagu-e hâ tita tsî sats tsîkhom ǁaegu, tsî ti ǃûi-aogu tsî sa ǃûi-aogu ǁaegu, sakhom a khoeǃgâgu xuige.

⁹ǃHūb hoaragaba kha sa ais aiǃâ hâ tamab hâ? ǁNâi ǀgoraxū te re! Sats ga ǁareǀkhābǀî ǃgû ǂgao, o ta ge tita amǀkhābǀî nî ǃgû, tsî sats ga amǀkhābǀî ǃgû ǂgao, o ta ge tita ǁareǀkhābǀî nî ǃgû.

¹⁰Ob ge Lota ǃgapakhâi tsî Jordanǃāb di ǂgāb hoaragaba ge mû, kaiseb a ǁgamxa ǃkhaisa: ǃKhūb ge Sodoms tsî Gomoras tsîra hîkākās aiǃâb ge ǃKhūb di ǃhanab xase ge ī i, Egipteǃhūb xase, Soars tawats ra sī khami.

¹¹Nētib ge Lota Jordanǃāb ǂgāb hoaragaba ge ǁhûiǂuibasen, tsî Loti ge aiǂoasǀî ge doe, tsî kha ge ǁî ǀgamkha nē dommi ai ge ǀgoraxūgu.

¹²Tsî Abrammi ge Kanaanǃhūb ǃnâ ge ǁan; tsî Loti ge ǂgāb di ǃādi ǃnâ ǁan tsî Sodoms kōse tentomde ge om.

¹³Tsî khoegu Sodoms digu ge ǂkhaba tsî kai ǁore-ao ge i ǃKhūb ǃoagu.

¹⁴Tsîb ge ǃKhūba Loti ge ǁîba xu ǀgoras khaoǃgâ Abrammi ǃoa ge mî: ǃGapakhâi îts nēsi ǁîs aits hâ ǃkhaisa xu kō ǀapasǀî tsî ǃkhawagasǀî, tsî aiǂoasǀî tsî huriǂoasǀî.

¹⁵Nē ǃhūb sats ra mûb hoaragaba ta ge tita satsa nîra mā tsî sa suriba ǀamosib kōse.

¹⁶Tsî tita ge sa suriba nîra mâi ǃhūbaib di tsarab khami, o i ge khoe-e tsarab ǃhūb dib ga ǃgôahe ǁkhā, o ǁkhāti sa suriba nî ǃgôa ǁkhā.

¹⁷Khâi îts nē ǃhūba ǃgûmaǃnâ, gaxu tsîb a ǂhaba khami; satsa ta ge tita ǁîba nîra mā xuige.

¹⁸Tsî Abrammi ge tentomde ge ǂnaumâi tsîb ge Mamres Hebrons tawa hâs di terpentinhaidi tawa sī ge ǁan; tsîb ge ǁnāpa ǃKhūba altar-e ge ǂnubiba.