Read Khoekhoegowab Genesis 14 Bible Online

Genesis 14 - Khoekhoegowab bible

Genesis 14

¹ Tsî i ge ǁnā tsēdi ai ge ǃnae, Amrafeli, gao-aob Sinari dib tsî Arioxi gao-aob Elasari dib tsî Kedorlaomeri, gao-aob Elammi dib tsî Tidali, gao-aob ǁaedi dib didi ai,

²nēgu ge toro-e ge dī ǃkhaisa Berab, gao-aob Sodoms dib tsî Birsab gao-aob Gomoras dib tsî Sinab, gao-aob Admas dib tsî Semeberi, gao-aob Seboims dib tsî Belas, ǁîs ge Soars di gao-aob tsîgu ǀkha.

³Nēgu hoagu ge ge ǀhû ǃgoaǃnāb Sidims dib, nēsib ǂŌxahuriba hâǃnâb ǃnâ.

⁴ǁÎgu ge Kedorlaomera disiǀgamǀa kuriga ge ǃoaba; xawe disiǃnonaǀaǁî kurib ǃnâ gu ge ge ǁnāǁgôa.

⁵Ob ge Kedorlaomera disihakaǀaǁî kurib ǃnâ ge hā, tsî ǁnā gao-aogu ǁîb ǀkha hâgu tsîga, tsî gu ge Refaimǁîna ge ǂnau Asterot-Karnaims ǃnâ, tsî Susiǁîna Hams ǃnâ, tsî Emiǁîna Skave-Kirjataims ǃnâ,

⁶tsî Horiǁîna ǁîn di ǃhommi Seiri ai, ǂhaba ǃaub Parans dib, ǃgaroǃhūb tawa ǁgoeb kōse.

⁷ǁNās khaoǃgâ gu ge ǁkhawa oa tsî En-Mispas, ǁîs ge Kades kōse sī tsî hoaraga ǃhūb Amalekǁîn diba ge ǂnau, tsî ǁkhāti Amorǁîn, Haseson-Tamars tawa ǁan hâna.

⁸ǃNubaib ge gao-aob Sodoms diba ge doebē tsî gao-aob Gomoras dib, tsî gao-aob Admas dib, tsî gao-aob Seboims dib, tsî Belas, ǁîs ge Soars di gao-aob tsîga; tsî gu ge torob ǃoa ge ǂhomisen, ǃgoaǃnāb Sidims dib ǃnâ,

⁹Kedorlaomeri, Elammi di gao-aob, tsî Tidali, ǁaedi di gao-aob, tsî Amrafeli, Sinari di gao-aob, tsî Arioxi, Elasari di gao-aob tsîgu ǃoagu; haka gao-aoga korogu ǃoagu.

¹⁰Tsî ǃgoaǃnāb Sidims dib ge ǂgâdi ǀaeǃhūb didi xa ge ǀoa hâ i, ob ge gao-aob Sodoms tsî Gomoras tsîra diba ǁhâ tsî ǁnāpa ge ǁnā; tsî ǃgau gen ge ǃhommi ǃoa ge ǁhâ.

¹¹O gu ge xūn Sodoms tsî Gomoras tsîra din hoana ge ū, tsî ǂûn ân hoana, tsî ge dāǁnâ.

¹²ǁKhāti gu ge Loti Abrammi ǃgâsab di ôab tsî xūn âba ū tsî ge ǂnauǁnâ, Sodoms ǃnâb ge ǁan hâ i xui-ao.

¹³ǃNubaib ge ǀguib hîa ge ûiǂoaba hā tsî ǁîsa Abrammi Hebreǁîba ge ǂhôa, terpentinhaidi Mamres didi tawa ǁan hâb, Amorǁîb, Eskoli tsî Aneri tsîkha ǃgâsab, Abrammi ǃgaeǀhaos di ge iga.

¹⁴Tsî Abrammi ge ǁnâuo, ǃgâsab âb go ǃkhōhe ǃkhaisa, ob ge ǁkhā ǃgāgu âb, ommi âb ǃnâ ge ǃnaegu, ǃnonakaidisi tsî disiǁkhaisaǀaga, ǁâtanina ana kai tsî ǁîga ge sauruǃgon Dans kōse.

¹⁵Tsîb ge tsuxuba ǁîgu ǃoa-ai ǀgoraǃāsen, ǁîb tsî ǁîb di ǃgāgu tsîn, tsîb ge ǁîga ǂnauǂkhū tsî ǁîga ge sauruǃgon Hobas, Damaskus di ǁareǀkhāb ai ǁgoes kōse.

¹⁶Tsîb ge xūn hoana ǁkhawa ge ūhā tsî ǃgâsab Loti tsî xūn âb onab ge ǁkhawa ge ūhā, tsî taradi on tsî ǁaesa.

¹⁷Ob ge gao-aob Sodoms diba ge ǂoa, ǃgûǃoa bib nîse, Kedorlaomeri tsî ǁîb ǀkha hâ gao-aogu di ǂnausa xub ge ǁkhawa hā ǃnubai, ǃgoaǃnāb Skaveb, ǁnāb ge gao-aob di ǃgoaǃnāb kōse.

¹⁸Tsî Melxisedeki, gao-aob Salems dib ge pereb tsî ǂauxûib tsîkha ge ūǀkhī; tsîb ge ǁîba pristeri Hoan xa ǀGapi Elob di ge i.

¹⁹Tsîb ge ǀkhae bi tsî ge mî: Ab Abramma ǀkhaehe hâse ī Elob, Hoan xa ǀGapib, ǀhommi tsî ǃhūbaib tsîkha ūhâba!

²⁰Îb karehe hâse ī Hoan xa ǀGapi Elob, khākhoen âtsa sa ǃomǁae go māba! Tsîb ge disiǁî ǃâsa ǁîba ge mā xūn hoan xa.

²¹Tsîb ge gao-aob Sodoms diba Abrammi ǃoa ge mî: Khoena tita mā re; îts satsa xūna ūbasen re!

²²Xawe Abrammi ge Sodoms di gao-aob ǃoa ge mî: Tita ge ti ǃomma go ūkhâi ǃKhūb Hoan xa ǀGapi Elob, ǀhommi tsî ǃhūbaib tsîkha ūhâbǀî.

²³Amase ta ge ǀgui ǁaparo-e xu ǁharoǃhâuro-i kōse ǁnā xūn hîa sa din hoan xa ū tide, îts tā: Abramma ta go ǃkhū kai, ti mî.

²⁴Tātsē ī tides ge ǃkhaisa! Nēs ǀguis: ǂKhamkhoegu goro ǂû ǂûn tsî ǁnā amǃnâs, nē aogu tita ǀkha go ǃgûǂoagu, Aneri, Eskoli tsî Mamreb tsîgu disa, a gu ǁîgu di amǃnâsa hō re!