Read Khoekhoegowab Genesis 15 Bible Online

Genesis 15 - Khoekhoegowab bible

Genesis 15

¹Nē ǃnaeǃkhaidi khaoǃgâs ge mîs ǃKhūb disa Abramma ge ǃnaeba, ai-i ǃnâ, mî raǃâ: Tā ǃao re, Abramtse, tita ge sa khōsikhōta, sa amǃnâta, hîa kaise kaita.

²Ob ge Abramma ge mî: ǃKhūtse, ǃKhūtse, tare-ets nî mā te, ǀgôan ose gau khoeta go titao; tsî ǀgôab ti ommi dib ge nē Damaskuǁîb Eliesera.

³ǃAruǀîb ge Abramma ge mî: Mû, titats ge suri-e mā tama hâ; ǁnâi mû, ǀgôab ti ommi dib ge nî ti ǀumi-ao!

⁴Tsî mû, os ge ǃKhūb mîsa ǁîba ge hāba, mî raǃâ: Nēb ge sa ǀumi-ao kai tide; tsî sa ǀkhāba xu nîra ǀkhīb, ǁîb ge nîra sa ǀumi-ao kai.

⁵ǃNubaib ge ǃaugaba ǃoa ǂgaeǂguiǂui bi tsî ge mî: Kōkhâi re nēsi ǀhommiǀî îts ǀgamirode ǃgôa re, ǃgôa di ǁkhāts kao. Tsîb ge ǁîb ǃoa ge mî: Nētib ge surib âtsa nîra ī.

⁶Ob ge ge ǂgom ǃKhūb ǃnâ; tsî ǁîb ge ǁnāsa ǂhanu-aisise ge ǃgôaba bi.

⁷ǃAruǀîb ge ǁîb ǃoa ge mî: Tita ge ǁnā ǃKhūta, Urs Xaldeaǁîn disa xu ge ǂgaeǂguiǂui tsi ta, satsa ta nē ǃhūba nî māga, ǀumisets nî ǁîba ūhâga.

⁸Ob ge ge mî: ǃKhūtse, ǃKhūtse, mâ xū-i tawa ta nî ǂan, ǁîba ta ǀumise nîra ūhâ ǃkhaisa?

⁹Ob ge ǁîba ǁîb ǃoa ge mî: Tita ūba re ǃnona kurixa tsâus tsî ǃnona kurixa piris tsî ǃnona kurixa ǂkharapirib tsî ǂnais tsî ǂkham ǂnabus tsîna.

¹⁰Ob ge nēn hoana ǁîba ge ūsība, tsîb ge ǁîna ge ǀgoraǃā, tsîb ge mâ ǃâs hoasa naus ǃoagu ge ǁgui; xawe aninab ge ǀgora tama ge i.

¹¹Tsî ǀaun ge ǁō hâ sorodi ai hā ǁgôaxa, xawe Abrammi ge ǁîna ge ǃhaebē.

¹²Tsî i ge ge ī sores ra ǂgâ hîa i ge ǃgam ǂom-e Abrammi ai hā ǃkhaisa; tsî mû, o i ge ǃhuri-i tsî ǃkhaena-e ǁîba ge ǁgoe-ai.

¹³Ob ge ǁîba Abrammi ǃoa ge mî: ǁAposase ǂan re, sa surib ǃhaokhoese nîra hâ ǃkhaisa, ǃhū-i ǁîn dise ī tama-i ǃnâ, tsîn ge ǁîna nîra ǃoaba, tsîn ge ǁîna nîra ǁgâiǀā hakakaidisi kuriga.

¹⁴Xawe tita ge ǁkhāti ǁnā ǁaes ǁîn nîra ǃoabasa nîra ǀgoraǃgâ, tsî ǁnās khaoǃgân ge kai-am xūn ǀkha nîra doeǂoa.

¹⁵Tsîts ge satsa sa îgu ǃoa ǂkhîb ǃnâ nîra ǃgû; ǃgâi kairasib ǃnâts ge satsa nîra ǁkhōhe.

¹⁶Tsî hakaǁî ǃhaos, ǁîs ge ǁkhawa nîra oahā; ǂhanuoǃnâsib Amorǁîn dib nēs kōse ǀoa tama hâ xui-ao.

¹⁷Tsî i ge ge ī sores ra ǂgâ tsî i ra ǃkhae ǃkhaisa, mû, o i ge ǀan ra ǁganom-i tsî ǀaexa ǃamamǀae-i khami ge hā, ǃâde ra ǃgûǃnâǃganu-e.

¹⁸ǁNā tsēs ǁkhās aib ge ǃKhūba ǃgaeǀhao-e ge dī Abrammi ǀkha, mî rase: Sa suriba ta ge tita nē ǃhūba nîra mā, ǃāb Egipteba xu ǁnā kai ǃāb Eufrati kōse,

¹⁹Keniǁîn, Kenisiǁîn, Kadmoniǁîn,

²⁰Hetiǁîn, Perisiǁîn, Refaimǁîn,

²¹Amorǁîn, Kanaanǁîn, Girgasiǁîn tsî Jebusǁîn tsîna.