Read Khoekhoegowab Genesis 16 Bible Online

Genesis 16 - Khoekhoegowab bible

Genesis 16

¹Tsî Sarais, Abrammi taras ge ǁoraba bi tama ge hâ i; tsîs ge ǁîsa Egipteǁî ǃgās, Hagars, ti ǀon hâsa ge ūhâ i.

²Os ge Saraisa Abrammi ǁga ge mî: Mû, ǃKhūb ge tita ǂganam hâ, o ta ǁora tama hâ; ǂgâ ǁnâi re ti ǃgās tawa, î ta ga ǀnîsi ǁîsa xu ǀgôahōbasen. Ob ge Abramma Sarais di domma ge ǁnâu.

³ǃNubais ge Sarais Abrammi tarasa Egipteǁî ǃgās âs Hagarsa ū tsî Abrammi aob âsa tarase ge mā si, disi kurigab ge Abramma Kanaanǃhūb ǃnâ ǁan hâ is khaoǃgâ.

⁴Ob ge Hagars tawa ge ǂgâ, tsîs ge ge ǃkhōǃoa. Tsî mûs geo ǃkhōǃoas ge ǃkhaisa, os ge ǀhonkhoes âsa ge ǃharaxūsa ǁîs di mûǁae.

⁵Os ge Saraisa Abrammi ǃoa ge mî: Ti ǂkhabadīsa as sa ai hâ; tita ge ti ǃgāsa sa tîǂams ǃnâ go mā; os ge ǃkhōǃoas go ǃkhaisa go mû tsî tita ra sora; ab ǃKhūba ǀgora tita tsî sats tsîm ǁaegu!

⁶Ob ge Abramma Sarais ǃoa ge mî: Mû, sa ǃgās ge sa ǃomǁae hâ; dī-ū si re, sa mûǁae a ǃgâi khami! Os ge Saraisa ǁîsa tsūse ge ûi-ū, tsîs ge ǁîsa ais âsa xu ge ǁhâ.

⁷Tsî ǀhomǃgāb ǃKhūb dib ge ǁîsa ǁgam-i ǀau-i tawa ǃgaroǃhūb ǃnâ ge hō, ǀaus Surs ǃoa gau daob ǃnâ hâs tawa.

⁸Tsîb ge ge mî: Hagarse, Sarais di ǃgāse, mapa xus ra hā tsî mâǀîs gau? Os ge: ǁHâ ta ra ti ǀhonkhoes Sarais di aisa xu, ti ge mî.

⁹Ob ge ǃKhūb di ǀhomǃgāba ǁîs ǁga ge mî: ǃHoba sa ǀhonkhoes ǃoa î ǃgamǃgamsen ǁîs di ǃomkha ǃnaga.

¹⁰ǃAruǀîb ge ǃKhūb di ǀhomǃgāba ǁîs ǃoa ge mî: Tita ge sa suriba kaise nîra ǂguiǂgui, ǂguib ǃaromab ǃgôahe ǁoase nî īs kōse.

¹¹ǁKhātib ge ǀhomǃgāb ǃKhūb diba ǁîs ǃoa ge mî: Mû, sas ge a ǀgamǀkhā tsîs ge ǀgôaba nîra ǁora, tsîs ge Ismaeli ti ǀons âba nîra ǂgai, ǃKhūb ge sa ǃgomsiba go kōǀî amaga.

¹²Tsîb ge ǁîba ǃgoreb khami nîra ǃkhausa; ǁîb di ǃommi ge hoan ǃoagu nîra hâ, tsî hoan di ǃomma ǁîb ǃoagu; tsîb ge ǃgâsagu âb hoagu di ais aiǃâ nîra ǁan.

¹³Os ge ǀons ǃKhūb dis, ǁîs ǀkha goro ǃhoasa, sats ǃgapaǀîs di Elots ti ge ǂgai; nētis ge mî xui-ao: Xare kōǀî bi ta go, ǁîb tita ra ǃgapaǀîba?

¹⁴ǁNā-amagab ge ǁnā ǂgâba, Saxai-Rois di ǂgâb, ti ge ǂgaihe; Kades tsî Bereds tsîra ǁaegub ge ǁîba hâ.

¹⁵Tsîs ge Hagarsa Abramma ǀgôaba ge ǁoraba, tsî Abrammi ge ǀons ǁnā ǀgôab âb, Hagars ge ǁoraba bib disa Ismael ti ge ǂgai.

¹⁶Tsî Abrammi ge ǁkhaisadisiǃnaniǀa kurixa ge i, Hagars ge Ismaela ǁoraba bi ǃnubai.