Read Khoekhoegowab Genesis 17 Bible Online

Genesis 17 - Khoekhoegowab bible

Genesis 17

¹Tsî Abrammi ge khoesedisikhoeseǀa kurixa ǃnubaib ge ǃKhūba Abrammi tawa ǂhai tsî ǁîb ǃoa ge mî: Tita ge ǃKhūta, Hoaǀgaixa ta, ti ais aiǃâ ǃgû îts ūose ī re.

²Tsî tita ge ti ǃgaeǀhaosa nîra dī, tita tsî sats tsîkhom ǁaegu, tsî tita ge kaise nîra ǂguiǂgui tsi.

³ǃNubaib ge Abramma ais âb ai ge ǁnā; tsî Elob ge ǁîb ǀkha ǃhoa tsî ge mî:

⁴Tsî mû, tita xasa, ti ǃgaeǀhaos ge sa ǀkha hâ; tsîts ge nîra kaise kai ǂguib ǁaedi dib di ǁgû kai.

⁵Tsî sa ǀons ge ǃaruǀî Abrammi ti ǂgaihe tide, tsîs ge ǀons âtsa Abrahammi ti nîra ǂgaihe, tita ge ǁgûts kai ǂguib ǁaedi dib dits ase mâi tsî xui-ao.

⁶Tsî tita ge kaise nîra ǂûǂûxaǃnâ kai tsi tsî tita ge ǁaedi di îse nîra mâi tsi, tsî gao-aogu ge satsa xu nîra ǀkhī.

⁷Tsî tita ge ti ǃgaeǀhaosa nîra ǂnûikhâi tita tsî sats tsîkhom ǁaegu, tsî sa surib ǁaegu sa khaoǃgâ, ǁîn di ǃhaodi ǃnâ, ǀamo ǃgaeǀhao-i ase, î ta satsa Elose ība tsî sa suriba sa khaoǃgâ.

⁸Tsî tita ge sats tsî sa suriba sa khaoǃgâ sa ǃgûkhoesis di ǃhūba nîra mā, Kanaanǃhūb hoaragaba ǀamose sa dib ase; tsî tita ge ǁîna Elose nîra ība.

⁹ǃAruǀîb ge Eloba Abrahammi ǃoa ge mî: Ots ge satsa ti ǃgaeǀhaosa nî ǃkhōǀgaipe, sats tsî surib âtsa sa khaoǃgâ, ǁîn di ǃhaodi ǃnâ.

¹⁰Nēs ge ti ǃgaeǀhaos, sadu nî ǃkhōǀgaipesa, tita tsî sats tsîkhom ǁaegu, tsî sa surib ǁaegu sats khaoǃgâ: Mâ aoreb hoab âdo ab ǃgaohe!

¹¹O du ge aikhōb sadu ǁgans diba nî ǃgaohe; tsî ǁîs ge sao-i ase nîra hâ, tita tsî sats tsîkhom ǁaegu hâ ǃgaeǀhaos di-i ase.

¹²Mâ aore ǀgôarob ǁkhaisa tsēdi â-ib hoaba du nî ǃgaohe, aore-i sadu di ǃhaodi ǃnâ hâ-i hoa-i, ommi ǃnâ ǃnae hâ-i karao, mâ ǃhaokhoe-i hoa-i xa marib ǀkha ǁamahe hâ-i karao, sadu surib di tama i ga i xawe;

¹³ommi âdu ǃnâ ǃnae hâb tsî sadu marib ǀkha ǁamahe hâb, ǁîb ge ǂanǂansase nîra ǃgaohe; tsî ti ǃgaeǀhaos ge sadu ǁgans ǃnâ nîra hâ ǀamo ǃgaeǀhao-i ase.

¹⁴Tsî aoreb aikhōba ūhâb hoab, aikhōb di ǁgansa ǃgaohe tideb, ǁîb di ǀoms ge ǁîs di ǁaede xu nîra ǃhūǃnomasihe, ti ǃgaeǀhaosab go khôa xui-ao.

¹⁵ǁKhātib ge Eloba Abrahammi ǃoa ge mî: ǀOns sa taras Sarais disats ge Sarai ti ǂgai tide, tsîts ge ǀons âsa Sara ti nî ǂgai.

¹⁶Tita ge ǁîsa nîra ǀkhae tsî ǁîsa xu satsa ǀgôaba nîra mā, ā, tita ge ǁîsa nîra ǀkhae, os ge nîra ǁae kaihe; o gu ge gao-aogu ǁaedi diga ǁîsa xu nîra ǀkhī.

¹⁷Ob ge Abrahamma ais âb ai ǁnā tsî ge âi; tsîb ge ǂgaob âb ǃnâ ge mî: Xareb kha ǀguikaidisi kurigu â-i khoeba ǀgôa-e nî ǁorabahe? Xares kha Sarasa khoesedisi kurixas a hîa nî ǁora?

¹⁸Ob ge Abrahamma Elob ǃoa ge mî: Ae! Îb ga Ismaela sa ais aiǃâ ûio.

¹⁹Ob ge Eloba ge mî: Amase, Saras, sa taras, ǁîs ge satsa ǀgôaba nî ǁoraba, tsîts ge ǀons âba Isak ti nî ǂgai. Tita ge ti ǃgaeǀhaosa ǁîb ǀkha nîra ǂnûikhâi, ǀamo ǃgaeǀhao-i ase surib âba ǁîb khaoǃgâ.

²⁰Tsî Ismaeli xasa ta ge go ǁnâu-am tsi, mû, tita ge ǁîba ge ǀkhae, tsî ta ge ǁîba nîra ǂûǂûxaǃnâ kai tsî îbe nîra ǂguiǂgui bi; disiǀgamǀa gaosagab ge nîra hō, tsî tita ge ǁîba kai ǁaese nîra mâi;

²¹xawe ǃgaeǀhaos tisa ta ge Isaki ǀkha nîra ǂnûikhâi, Saras nau kurib ǃnâ mîmâihesa ǁaeb ai nîra ǁoraba tsiba.

²²Tsîb ge ǁîba ǁîb ǀkha ge ǃhoaǀû; tsîb ge Eloba Abrahamma xu ge ǃapa.

²³ǃNubaib ge Abrahamma ǁîb di ôab Ismaeli tsî ǁîb ommi ǃnâ ǃnae hân hoan tsî marin âb ǀkhab ge ǁaman hoan, aoregu hoagu Abrahammi ommi ǃnâ hâ khoen diga ū tsî ǁgans ǁîgu aikhōb disa ge ǃgao ǁnā tsēs ǁkhās ai, Elob ge ǁîb ǀkha ǃhoa khami.

²⁴Tsî Abrahammi ge khoesedisikhoeseǀa kurixa ge i, ǁgans aikhōb âb disab ge ǃgaohe ǃnubai.

²⁵Tsî ǁîb di ôab Ismaeli ge disiǃnonaǀa kurixa ge i, aikhōb âb di ǁgansab ge ǃgaohe ǃnubai.

²⁶ǁNā tsēs ǁkhās aib ge Abrahamma ge ǃgaohe tsî Ismaeli ǁîb ôab on,

²⁷tsî aore khoegu hoagu ǁîb ommi digu hoagu, ommi ǃnâ ge ǃnaegu tsî marib ǀkha ǃhaokhoeba xu ge ǁamahegu hoagu ge ǁîb ǀkha ge ǃgaohe.