Read Khoekhoegowab Genesis 18 Bible Online

Genesis 18 - Khoekhoegowab bible

Genesis 18

¹ǁNās khaoǃgâb ge ǃKhūba ǁîb tawa ge ǂhai terpentinhaidi Mamres didi tawa, tentoms di dao-ams ǃnâb ǂnôa hîa, tsēs ge ǀgamsa i ǃnubai.

²Tsîb ge ǃgapakhâi tsî ge kō; tsî mû, ǃnona aogu ge ǁîb aiǃâ ge mâ i, tsî ǁîgab ge mûo, ob ge ǁîga ge ǃkhoeǃoa tentoms di dao-amsa xu tsî ǃhūb ai ge ǃgamǃgâ,

³tsî ge mî: ǃKhūtse, ǀkhomma ta ga sa mûǁae hō, o tā ǁnâi sa ǃgāta ǃgû-īǀkhā go re!

⁴Î go ǁgamro-e ūhābahe î go sago ǂaide ǁā, î go nē hais ǃgao ǃgâsen re!

⁵O ta ge tita pereǃâro-e nî ūǀkhī, sago ǂgaoba go nî ǀgaiǀgaise; ǁnās khaoǃgâ go ge nî ǃgû, sago ǃgāta ǃoa go go hā amaga. O gu ge: Mîts go khami dī re, ti ge mî.

⁶Ob ge Abrahamma Saras ǃoa tentoms ǃnâ ǃhaeǃhaesen tsî ge mî: ǃHae îs ǃnona ǀguirode tsampereb xa ū, îs ǀhomam tsî ǁganperede dī re!

⁷Ob ge Abrahamma goman ǃoa ǃnoe tsî tsâu-i hîa tsam tsî ǃgâi-e ū tsî ǁî-e ǃgāba ge mā; ǁîb ge ǃhaeǃhaesen tsî ǁî-e ge ǁanǁan.

⁸Ob ge ora ǁnui-i tsî dai-i xa ū, tsî tsâu-i ǁîb goro ǁāǁā-e, tsîb ge ǁîna ǁîga ge mâi-aiǃâ; tsîb ge ǁnā hais ǃgao ge mâ, ǁîgu ra ǂû hîa.

⁹ǃNubai gu ge ǁîb ǃoa ge mî: Mapas Saras sa tarasa hâ? Ob ge: ǁNā hâ tentoms ǃnâ, ti ge mî.

¹⁰Ob ge ǁîba ge mî: Tita ge ǂanǂansase ǁkhawa nîra hā, ǁaupe nē ǁaeb ûib dib ǁkhāb ai; tsî mû, os ge sa taras Sarasa ǀgôaba nîra ūhâ. Tsî Saras ge ǁîsa tentoms di dao-ams, ǁîb khaoǃgâ hâs ǃnâ ge ǁnâu.

¹¹Tsî ra ge Abrahammi tsî Saras tsîra kaira tsî ge kurixa i; Saras ge ǀû ge hâ i tararekhoe dommi ai ībahesa.

¹²Os ge Sarasa ǁîs ǂûs ǃnâ âi, tsî ge mî: Okha, xare ta kha tita turaba nî sîsenū kaira ta ges khaoǃgâ, tsî ti ǀhonkhoeb ge ǁkhāti a kaira?

¹³Ob ge ǃKhūba Abrahammi ǃoa ge mî: Tare xū-i ǃaromas ra âi Sarasa, mî raǃâ: Amase ta kha ganupe nî ǁora, kaira ta hâ hîa?

¹⁴Xū-i ǃKhūba nî dā-e hâ i a? Mîmâihesa ǁaeb ai ta ge tita ǁkhawa sa tawa nîra hā, ǁaupe nē ǁaeb ûib dib ǁkhāb ai, os ge Sarasa ǀgôaba nîra ūhâ.

¹⁵Os ge Sarasa ǀoa tsî ge mî: Âi tama ta hâ ti, ǃaos gere amaga. Ob ge ǁîba: Hî-î, âis go, ti ge mî.

¹⁶ǃNubai gu ge ǁnā aoga ǁnāpa xu khâi tsî Sodomsǀî ge ūnusen; ob ge Abrahamma ǁîgu ǀkha ge ǃgû ǁîgab nî ǁnūse.

¹⁷Ob ge ǃKhūba ge mî: Gaugau ta nî tita Abrahammi aiǃâ dī ǂgao ta ra-e?

¹⁸Amaseb Abrahamma nîra kai tsî ǀgaisa ǁae kai tsî ǁaedi ǃhūbaib didi hoadi ǁîb ǃnâ nîra ǀkhaehe amaga.

¹⁹ǂAn bi ta a xui-ao, ǁîb di ôan tsî ommi âbab nîra ǁîb khaoǃgâ mîmā ǃkhaisa, în ǃKhūb di daoba ǃkhōǀgaipe ti, ǂhanu-aisib tsî ǀgoraǃgâs tsîra nî dīse, ǃKhūb nî Abrahammi ǂamai hā kaiga, ǁîb ge ǁîb xa mîsa.

²⁰ǃAruǀîb ge ǃKhūba ge mî: Gommi Sodoms tsî Gomoras tsîra dib a kai amaga tsî ǁîra di ǁoreb a ǃgom amaga,

²¹ǁnā-amaga ta ge tita nēsi ǁgôa tsî nî mû, isen ǁîn di gommi, ti tawa go hāb ǃoa dīǀamǀam hâ ǃkhaisa; tsî ǁnāti i ga ī tama hâ io, o ta ge tita nî ǂan.

²²ǃNubai gu ge ǁnā aoga ǁnāpa xu ūnusen tsî Sodoms ǃoa ge ǃgû; xawe Abrahammi ge ǃKhūb di ais aiǃâ ge mâ i.

²³Tsîb ge Abrahamma dāsī tsî ge mî: Tsîts kha ǁnâi satsa ǂhanu-aiba eloxoresab ǀkha nî hîkākā?

²⁴ǀNîsin nî korodisi ǂhanu-aina ǁnā ǃās ǃnâ hâ: ǁÎn onats kha nî hîkākā tsî ǃāsa sâu tide korodisi ǂhanu-ain ǁîs ǃnâ hân ǃaroma?

²⁵Tātsēts ge satsa ǁîsa hî tide, ǂhanu-aiba eloxoresab ǀkha ǃgamsa, ǂhanu-aib nî eloxoresab ǀkha ǀguiti-īsa; tātsēts ge satsa hî tide! ǁNâi ǂhanuǂhanu-aob ǃhūbaib hoaragab diba kha ǂhanuseb sîsen tide?

²⁶ǃNubaib ge ǃKhūba ge mî: Sodoms tawa ta ga tita ǃās ǃnâ korodisi ǂhanu-aina hō-o, o ta ge tita ǃās hoaragasa nî ǃkharesi ǁîn ǃaroma.

²⁷Ob ge Abrahamma ǃeream tsî ge mî: Kō re, dītsâ tsî ta ge ǃKhūb ǀkha goro ǃhoa, tsara ta tsî tsao ta a xawe.

²⁸ǀNîsi nî ǁnā korodisi ǂhanu-ain tawa korona tôasi; ǁnâits kha satsa koron ǃaroma ǃās hoaragasa nî hîǀhuru? Ob ge ge mî: Tita ge hîkākā si tide, hakadisikoroǀana ta ga hō-o.

²⁹Ob ge ǃaruǀî ǁîb ǀkha ǃhoa tsî ge mî: ǀNîsin nî ǁnāpa hakadisina hōhe. Ob ge: Tita ge ǁîsa dī tide hakadisin ǃaroma, ti ge mî.

³⁰Ob ge ge mî: Ab ǃKhūba tā ǁaixa ǃaruǀî ta ra ǃhoas xa: ǀNîsin nî ǁnāpa ǃnonadisina hōhe. Ob ge: Tita ge ǁîsa dī tide ǃnonadisina ta ga ǁnāpa hō-o, ti ge mî.

³¹Ob ge ge mî: Kō re, dītsâ tsî ta ge ǃKhūb ǃoa goro ǃhoa: ǀNîsin nî ǀgamdisina hōhe. Ob ge: Tita ge ǁîsa hîkākā tide ǀgamdisin ǃaroma, ti ge mî.

³²Ob ge gorose ge mî: Ab ǃKhūba tā ǁaixa re nē ǃnās ǀguisa ta ga ǃhoao: ǀNîsin nî disina hōhe. Ob ge: Tita ge ǁîsa hîkākā tide disin ǃaroma, ti ge mî.

³³ǃNubaib ge ǃKhūba ge ǃgûbē, Abrahammi ǀkhab ge ǃhoatoao; tsî Abrahammi ge ǁkhawa ǁîb di ǃās ǃoa ge oa.