Read Khoekhoegowab Genesis 19 Bible Online

Genesis 19 - Khoekhoegowab bible

Genesis 19

¹Tsî ǁnā ǀgam ǀhomǃgākha ge ǃuia Sodoms tawa ge sī; tsî Loti ge Sodoms di ǁāb tawa ge ǂnôa i; tsî Loti ge ǁîkha mûo, ob ge khâi tsî ge ǃgûǃoa kha tsî ais âb ǀkha ǃhūb ai ge ǃgamǃgâ.

²Tsîb ge ge mî: Kō re, ti ǃkhūkhoekho, sakho ǃgāta di ommi tawa sī, î kho hâǂkhai re î kho ǂaidi âkho ǁā re; o kho ge ǃnauǁgoaga khâi tsî nî ǃgû sakho di daoba. O kha ge: Hî-î, a khom ǃās ǃganni ai hâǂkhai ti ge mî.

³Tsîb ge ǁîkha kaise ge ǁgūǀkhā, o kha ge ǁîb tawa ge ǂgâ tsî ommi âb ǃnâ ge sī; ob ge ǁîkha ǂûǁae-e ge dība, tsîb ge ǀkhuruǀkhuruhe tama ǁganperede ge dī, tsî kha ge ge ǂû.

⁴Tsî ganupe ǁîkha ǁomǃgû tama hâ hîa gu ge ǁnā ǃās di khoegu Sodoms diga, ǂkhamma xu hoan xa kaib kōse, ǁnā omma ge ǃnamiǂgā, ǁaes hoasa, ǀuniga khoeb kōse.

⁵On ge Lota ǂgai tsî ge mîǀî bi: Mapa kha hâ ǁnā aokha, nē tsuxub ǃnâ sa tawa go hākha? Sige ǁîkha ūǀkhība, î ge ǁîkha ǂangu-ū.

⁶ǃNubaib ge Lota ǁîna ǃoa dao-ams tawa ǂoa tsî ǁāba ǁîb khaoǃgâ ge ǂganam;

⁷tsîb ge ge mî: Ti ǃgâsago, tā tsūdī go re!

⁸Kō re, tita ge ǀgam ǀgôara ūhâ, ao-e ǂangu-ū tama hâra; tita ge ǁîra sago nî ūǂoaxaba, î go ǁîra ǀkha dī sago mûǁae a ǃgâi khami, xawe nē khoekha tā xū-e dī, ǁî ǃkhais ǃaroma kha ti ǂamaib di sommi ǃnâ go hā xuige.

⁹On ge ge mî: Daoba xu bē! ǃNubain ge ǃaruǀî ge mî: Nē ǀguib ge ge hā ǃhaokhoeseb nî nēpa ǁanse, tsî ǁîba hoaragaseb nî gaoǂam da? O da ge nēsi satsa ǁîkha ǃgâ-ai nî tsūdī. On ge nē aob Lota ǁgūǀkhā tsî dāsī tsî dao-amsa gere khôaǁkhowa-am ǂgao.

¹⁰Xawe kha ge ǁnā khoekha ǃommi âkha ǀhōǂui tsî Lota ǁîkha tawa ommi ǃnâ ge ūǂgâxa, tsî dao-amsa ge ǂganam.

¹¹Tsî kha ge khoegu ommi dao-ams tawa hâga ǂgīsib ǀkha ge ǂnau, ǂkhamma xu hoan xa kaib kōse, on ge ega ge ǀhupu dao-amsa hōsa.

¹²ǃNubai kha ge ǁnā khoekha Loti ǃoa ge mî: ǀNî khoe-e ganupe ūts hâ nēpa. ǀUiǀgôab kas, ǀgôagu âts kas, ǀgôadi âts kas hoasa? ǁÎna nē ǃās ǃnâts ūhân hoana ūǂoaxa nē ǃāsa xu;

¹³sikhom ge nē ǃāsa ra hîǀhuruǃgû xuige, ǁîn di gommi ge ǃKhūb di ais aiǃâ kai amaga, tsî ǃKhūb ge sikhoma go sîǂui, hîkākā si khom nîse.

¹⁴Ob ge Lota ǃgûǂoa tsî ǁîb di ǀuiǀgôakha ǁîb di ôara ūhâkha ǀkha ǃhoa tsî ge mî: Khâi, î kho nē ǃāsa xu ǂoa, ǃKhūb ge nē ǃāsa nîra hîkākā xuige. Xaweb ge ǀuiǀgôakha âb di mûǁae gara rase ge ī.

¹⁵Tsî ǁgoaǂnobos ge ǁhaio, o kha ge ǀhomǃgākha Lota ǁgūǀkhā tsî ge mî: Khâi îts ū sa taras tsî sa ǀgam ǀgôara hîa sa ǃomǁae hâra, ǂhanuoǃnâsib nē ǃās dib ǃnâts kā tidega.

¹⁶Xaweb ge ge ǀhana; o kha ge ǁnā aokha ǃommi âba ge ǃkhō tsî taras âb di ǃommi tsî ǀgam ǀgôara âb di ǃomga, ǃKhūb ra ǁîna sâu ǂgao amaga; tsî kha ge ǁîba ūǂoa tsî ǃās ǃauga ge mâi bi.

¹⁷Tsî i ge ge ī ǁîna kha ge ǃaugaba ǃoa ūǂoao, ob ge ǁîba ge mî: Sâusen sa ûib ǃaroma, tā khaosǀî kō, îts nē ǂgāb hoaragab ai tā mâ; sâusen ǃhommiǀî, îts tā kā!

¹⁸Ob ge Lota ǁîkha ǃoa ge mî: Hî-î, ǁnātis ose, ǃKhūtse!

¹⁹Mû, sa ǃgāta ge ǀkhomma go hō sa mûǁae, tsîts ge ǃgâidīb âtsa go kaikai, ti tawats go dība, ti ǀomsats nî ûib ǃnâ sâuga; xawe ta ge ǃhommiǀî a sâuhe ǁoa, î ta ǀnîsi tā ǂkhabab xa hāǂamhe, î ta tā ǁō.

²⁰Kō re, nē ǃās ge a ǀgū, ǁîs ǃoa ǁhâsa tsîs ge a ǂkhari; a ta ǁnâi ǁnāǀî sâusen, (ǂkhari tamas hâ?) îs ti ǀomsa ûi!

²¹Ob ge ǁîba ge mîǀî bi: Mû, tita ge sa aisa ǁkhāti nē ǃkhais ǃnâ go ǃkhōǃoa, o ta ge nē ǃāsa dabaǃkhuni tide, sats go ǁîs xa mîsa.

²²ǃHae îts ǁnāǀî sâusen; xū-i xare-e ta a dī ǁoa, ǁnāpats nî sī ǂgâs kōse xuige. ǁNā-amagas ge ǀons ǁnā ǃās disa Soars ti ge ǂgaihe.

²³Sores ra ǃhūbaib ǂamai ǁhai hîab ge Lota Soars ǃnâ ge ǂgâ.

²⁴ǃNubaib ge ǃKhūba sulfuri tsî ǀaes tsîra Sodoms tsî Gomoras tsîra ai ge ǀapi kai, ǃKhūba xu, ǀhomma xu.

²⁵Tsîb ge ǁîba nē ǃāra ge dabaǃkhuni, tsî ǁnā ǂgāb hoaragab tsî ǁansaben ǁnā ǃāra din hoana, tsî ǃhūb ra ūǀkhīn tsîna.

²⁶Tsî taras âb ge ǂnan, os ge ge ǂōǂkhâǃnâ kai.

²⁷Tsî Abrahammi ge ǃnauǁgoaga khâi tsî ge sī, ǁnā ǃkhais, ǁîs aib ge ǃKhūb di ais aiǃâ mâ is ǃoa.

²⁸Tsîb ge ge kō Sodoms tsî Gomoras tsîraǀî tsî ǁnā ǂgāb hoab di ǃhūbǀî, tsî mû, ob ge ǀanna ǁnā ǃhūba xu ge ǃapa, kai ǁganommi di ǀanni axase.

²⁹Tsî i ge ge ī Elob ge nē ǂgāb di ǃāde hîǀhuruo, ob ge Eloba Abrahammi xa ge ǂâi, ob ge ǁîba Lota nē dawaǃkhunis di ǁaeguba xu ge ǂgaeǂguiǂui nē ǃāra, Loti ǁîra ǃnâ ǁan go hâ ira di dawaǃkhunihesa xu.

³⁰Tsî Loti ge Soarsa xu doeǃapa tsî ǃhommi ai sī ge ǁan, ǀgam ǀgôara âb ǁîb ǀkha, Soars ǃnâ ǁansa ra ǃao hâ amaga. Tsîb ge ǁhoaǃnā-i ǃnâ ge ǁan, ǁîb tsî ǀgam ǀgôara âb tsîna.

³¹Os ge ǂguroǃnaesasa ǂkhams ǃoa ge mî: Sam di îb ge a kaira, tsî aore khoe-i xare-i ge nē ǃhūb ǃnâ hâ tama hâ, sam tawa nî ǂgâ-e, ǃhūbaib hoab di dommi ǃoa.

³²Hā îm sam di îba ǂauxûib xa āsi, îm ǁîb tawa ǁgoe, sam îba xum nî suri-e ûib ǃnâ sâuga.

³³O ra ge ǁnā tsuxub ǁkhāb ǃnâ ǁgûba ǂauxûib xa ge āsi; ǃnubais ge ǂguroǃnaesasa hā tsî ǁgûb tawa ge ǁgoe, tsî ǁîb ge ǁgoes âs tsî khâis âsa hōǃâ tama ge hâ i.

³⁴Tsî i ge ge ǃnae sao ra tsēs ai, os ge ǂguroǃnaesasa ǂkhams ǁga ge mî: Mû tita ge ǁari tsuxub ǃnâ ti îb tawa go ǁgoe i; am ǁkhāti nē tsuxub ǃnâ ǁîba ǂauxûib xa āsi, îs sasa ǂgâ îs ǁîb tawa ǁgoe, îm sam îba xu suri-e ûib ǃnâ sâu, ti.

³⁵O ra ge ǁgûba ǁnā tsuxub ǁkhāb ǃnâ ǂauxûib xa ge āsi, tsî ǂkhams ge khâi tsî ǁîb tawa ge ǁgoe. Tsîb ge ǁîba ǁgoes âs tsî khâis âsa hōǃâ tama ge hâ i.

³⁶Nēti ra ge ǀgam ǀgôara Loti dira ǁgûba xu ge ǀgamǀkhā.

³⁷Tsî ǂguroǃnaesas ge ǀgôaba ge ǁora, tsîs ge ǀons âba Moab ti ge ǂgai; nēb ge Moabǁîn di îba nētsēs kōse.

³⁸Tsî ǂkhams ge ǁkhāti ǀgôaba ge ǁora, tsîs ge ǀons âba Ben-Ammi ti ge ǂgai; nēb ge Amonni ôan di îba nētsēs kōse.