Read Khoekhoegowab Genesis 2 Bible Online

Genesis 2 - Khoekhoegowab bible

Genesis 2

¹ǁNāti kha ge ǀhommi tsî ǃhūbaib tsîkha ge dītoahe tsî ǁîkha di ǂnubis hoasa.

²Tsî Elob ge ǁnāti hûǁî tsēs ai sîsenni âba dītoa, ǁîb gere dība, ob ge hûǁî tsēs ai ge sâ, sîsenni dīb geb hoaba xu.

³Tsî Elob ge hûǁî tsēsa ǀkhae tsî ge khai, ǁîs aib ge ǁîba sâ amaga ǁîb di sîsenni hoaba xu, Elob ge kuruba, dītoab nîse.

⁴Nēdi ge ǃnaeǃkhaidi ǀhommi tsî ǃhūbaib tsîkha dide, ǁîkha ge kuruheo, ǁnā tsēs ǃKhūb Elob ge ǁîs ai ǃhūbaib tsî ǀhommi tsîkha dīs ai,

⁵tsî mâ hai-i ǃaub di-i hoa-i ǃhūb ǃnâ i gorose hâ tama hîa, tsî mâ ǁhao-i ǃaub di-i hoa-i ganupe i ǀkhī tama hâ hîa; ǃKhūb Elob ge ǃhūbaib ai ǀapi kai tama ge i, tsî khoe-i ge ǀkhai i ǃhūba ga sîsen hâ i-e xui-ao.

⁶Xawe ǃnū-i ge ǃhūba xu ǀkhī tsî ǃhūbaib hoaragaba ge ǀâǀâ.

⁷Tsî ǃKhūb Elob ge khoeba ǃhūb tsaraba xu ge ǂnubi, tsîb ge ǂgui-āra âb ǃnâ ǀoms ûib disa ge ǃnâiǂgā, ǁnātib ge khoeba ge ûitsama ǀom kai.

⁸Tsîb ge ǃKhūb Eloba ǁkhāti ǃhanaba ge ǂgā, Edenni ǃnâ aiǂoas ǀkhāb ai, tsîb ge ǁîba khoeba ǁnāpa ge ǂnûi, ǁîb ge ǂnubiba.

⁹Tsî ǃKhūb Elob ge haiǃnôan hoana ǃhūba xu ge ǀkhī kai, ǃgapaǀîsa anun tsî ǂûhesa ǃgâibana; tsî hais ûib disa ǃhanab di ǁaegub ǃnâ, tsî hais ǃgâib tsî ǂkhabab tsîkha ǂans disa.

¹⁰Tsî ǃāb ge Edenna xu ge dâuǂoaxa, ǁnā ǃhanabab nî ǀâǀâga; tsîb ge ǁnāpa ǀgora tsî ge haka danaǃā kai.

¹¹ǂGuro ǃāb ge Pisonni ti ǀon hâ; nēb ge ǁnāb, Havilaǃhūb hoaragaba ra dâuǂnamipeb, ǃhuniǀurib hâǃnâba.

¹²Tsî ǃhuniǀurib ǁnā ǃhūb dib ge a ǃgâi; tsî ǁnāpas ge ǁkhāti bedolas tsî ǀuis sardoniks ti ra ǂgaihesa hâ.

¹³Tsî ǀgamǁî ǃāb ge Gihonni ti ǀon hâ; nē ǃāb ge hoaraga ǃhūb Kus diba ra dâuǂnami.

¹⁴Tsî ǃnonaǁî ǃāb ge Tigris ti ǀon hâ; nēb ge ǁnāb, Asiriaba xu aiǂoasǀî ra dâuba. Tsî hakaǁî ǃāb ge Eufrata.

¹⁵Tsî ǃKhūb Elob ge khoeba ū tsî Edenǃhanab ǃnâ ge ǂnûi, ǁîbab nî sîsense tsî ǁîbab nî ǃûise.

¹⁶Tsî ǃKhūb Elob ge khoeba mîmā tsî ge mî: Mâ hai-i ǃhanab di-i hoa-i xats ge ǃnorasase a ǂû ǁkhā;

¹⁷xawe ǁnā hais ǃgâib tsî ǂkhabab tsîkha ǂans dis xats ge ǂû tide; ǁîs xats ga ǂû tsēs hoas aits nî ǁō xui-ao.

¹⁸Tsîb ge ǃKhūb Eloba ǁkhāti ge mî: ǃGâi tama i ge hâ khoeb nî ǀguri hâsa; xui-ao ta ge tita hui-aosa nî dība bi, ǁîb ǂnamipe nî hâsa.

¹⁹ǃKhūb Elob ge ǃhūba xu ǀgurun ǃaub din hoan tsî anin ǀhommi din hoana ǂnubi tsî ǁîna Adammi ǃoa ge ūhā, mûb nîga, matib nî ǁîna ǀonǂgaisa; tsî Adammi ge ûitsama ǀoms hoasa ǂgai khami, ǁnātin nî ǂgaihe xui-ao.

²⁰Nētib ge Adamma ǀonde mâ ǀgoa-i hoa-i tsî mâ ani-i ǀhommi di-i hoa-i tsî mâ ǀguru-i ǃaub di-i hoa-e ge mā; xawe khoeb ge hui-aosa hōbahe tama ge hâ i, ǁîb ǂnamipe nî hâsa.

²¹ǃNubaib ge ǃKhūb Eloba ǃgam ǂomsa Adammi ǂama ge hā kai, tsîb ge ǁîba ge ǁom; ob ge ǁîba ǀaragu âb di ǀguiba ū tsî ǁnā ǃkhaisa ǁgans ǀkha ge ǂganam.

²²Tsî ǃKhūb Elob ge ǁnā ǀarab Adamma xub ge ūba xu tarasa ge kuru, tsîb ge ǁîsa Adammi ǃoa ge ūhā.

²³ǃNubaib ge Adamma ge mî: Nēs ge a nē ǃnās ai ti ǂkhōgu di ǂkhō tsî ti ǁgans di ǁgan, tsîs ge khoes ti nî ǂgaihe, khoeba xus ūhe hâ amaga.

²⁴ǁNā-amagab ge khoeba ǁgûb tsî ǁgûs tsîra ǁnāxū tsî nî ǁîb di taras tawa ǂgāmâisen, o ra ge ǁîǀgamra nî ǀgui ǁgan.

²⁵Tsî ra ge ǁîǀgamra ǀōǀkhā ge hâ i, Adammi tsî taras âb tsîra, xawe ra ge tao tama ge hâ i.