Read Khoekhoegowab Genesis 20 Bible Online

Genesis 20 - Khoekhoegowab bible

Genesis 20

¹Tsî Abrahammi ge ǁnāpa xu ǃkhawagasǀî ǁgoe ǃhūb ǃoa ge dāǁnâ, tsîb ge Kades tsî Surs tsîra ǁaegu ge sī ǁan; tsîb ge ǃhaokhoese Gerars tawa ge hâ.

²Tsî Abrahammi ge Saras, taras âb xa mîo: Nēs ge a ti ǃgâ, ob ge Abimelexi, Gerars gao-aoba sî tsî Sarasa ge ūbē.

³Xawe Elob ge Abimelexi tawa ge hā tsuxuba ǁhapo-i ǃnâ, tsîb ge ǁîba ge mîǀî: Mû, sats ge nî ǁō, ǁnā tarasats go ūbēs ǃaroma, aob ǀkhas ǃgame hâ xui-ao.

⁴Tsî Abimelexi ge ǁîs tawa ǀgūǀgūsen tama ge i; ǁnā-amagab ge ge mî: ǃKhūtse, ǂhanu-ai ǁaesats ǁnâi nî ǃgam?

⁵ǁÎ-aitsama mîba te tamab hâ: Nēs ge a ti ǃgâsa? Tsî ǁîs on ge: Ti ǃgâsab ge a ǁî, ti ge mî. ǂHauǃnâsib ti ǂgaob dib ǃnâ tsî ǃanusib ti ǃomkha dib ǃnâ ta ge nē ǃkhaisa go dī.

⁶Ob ge Eloba ǁîb ǃoa ge mî ǁhapos ǃnâ: Tita ge ǁkhāti ǂan go i, nē ǃkhaisats ge satsa ǂhauǃnâsib sa ǂgaob dib ǃnâ go dī ǃkhaisa, tsî tita ge ǁkhāti go ǂhani tsi ti ǃoagu ǁoresa; ǁnā-amaga ta ge mā-am tsi tama go i, ǁîsa tsâǀkhāsa.

⁷Nēsi ǁnâi nē aob di tarasa mādawa re, kēbo-aob a ǁî tsîb nîra ǀgoreba tsi ûits nîga xuige; xawe ǁîsats ga mādawa tama io, ǂan amasets nîra ǁō ǃkhaisa, sats tsî sa din hoana.

⁸ǃNubaib ge Abimelexa ǃnauǁgoaga khâi tsî ǃgāgu âb hoaga ǂgai tsî nē mîdi hoade ǁîgu ǂgaedi ǃnâ ge mî. O gu ge ǁnā aoga kaise ge ǃao.

⁹Tsî Abimelexi ge Abrahamma ǂgai tsî ǁîb ǃoa ge mî: Tare-ets dī da hâ? Tsî tare-e ta tita sa ǃoagu go ǁore, ots tita tsî ti gaosis ǂama kai ǁore-ai-e go ūhā? Sats ge dī ǃkhaide tita ǀkha go dī, dīhe ga tide hâde.

¹⁰ǃAruǀîb ge Abimelexa Abrahammi ǃoa ge mî: Tare-ets mû hâ, ots nē ǃkhaisa go dī?

¹¹Ob ge Abrahamma ge mî: Nēti ta go ǂâi xui-ao: ǀNîsi i ge eloǃaoǃgâxasi-e hâ tama hâ nē ǃās ǃnâ, on ge ti taras ǃaroma nî ǃgam te.

¹²Tsîs ge ǁkhāti amase a ti ǃgâ, ti îb di ôas a xawes ge ti îs di ôa tama hâ, tsîs ge ge ti tara kai.

¹³Tsî i ge ge ī, Elob ge tita ti îb di omma xu ǂgaeǂguima ǃnubai ta ge ǁîs ǃoa ge mî: Nēb ge ǃgâidīb, titas nî dī-ūba: ǁÎs tawam ga sī ǃkhais hoas ai tita xa ǁîb a ti ǃgâ, ti mîsa.

¹⁴Ob ge Abimelexa gūn tsî goman tsîna ū, ǁkhāti ǃgāgu tsî ǃgādi tsîna, tsî ǁîna Abrahamma ge mā; tsîb ge ǁîba Saras, taras âba ǁkhawa ge mā-oa.

¹⁵Tsîb ge Abimelexa ge mî: Mû, ti ǃhūb ge sa ais aiǃâ hâ; ǁan re sa mûǁae a ǃgâi ǃkhais hoas ai.

¹⁶Tsî Saras ǃoab ge ge mî: Mû, sa ǃgâsaba ta ge ǀoadisi ǀhaiǀurimarina go mā; kō, an ǃgū-aixū-i mûra di-i axase ība si re sa ǀkha hân hoan tawa; ā, hoan tawa as ǂhanu-ai kaihe hâse i.

¹⁷Tsî Abrahammi ge Eloba ge ǀgore; ob ge Eloba Abimelexi tsî taras âb tsî ǃgādi âb tsîna ge ǂgauǂgau, o di ge ge ǁora.

¹⁸ǃKhūb ge Abimelexi ommi di ǁhādi hoade hoaragase ǂganam hâ i xui-ao, Saras, Abrahammi di taras ǃaroma.