Read Khoekhoegowab Genesis 21 Bible Online

Genesis 21 - Khoekhoegowab bible

Genesis 21

¹Tsî ǃKhūb ge Sarasa ge sari, ǁîb ge mî khami; tsî ǃKhūb ge Saras tawa ge dī ǁîb ge ǃhoa khami.

²Tsî Saras ge ǀgamǀkhā tsî Abrahamma ǀgôaba ge ǁoraba kairasib âb ǃnâ, mîmâihesa ǁaeb Elob ge ǁîba mîbab ai.

³Tsî Abrahammi ge ǁnā ǀgôab âb, ǁorabaheb ge Saras xab di ǀonsa Isaki ti ge ǂgai.

⁴Tsî Abrahammi ge ǁîb di ôab Isaka ǁkhaisa tsēdi â-iba ge ǃgao, Elob ge ǁîba mîmās ǃoa.

⁵Tsî Abrahammi ge ǀguikaidisi kurixa ge i, Isaki ǁîb di ôabab ge ǁorabahe ǃnubai.

⁶Tsî Saras ge ge mî: Elob ge âixū-e tita go dība, ǁî-i xa ga ǁnâu-i hoa-i tita nî âi-e.

⁷ǃAruǀîs ge ge mî: Tari-e dītsâ tsî ga Abrahamma mîba hâ Saras ge ǀgôaga daisi hâ? Tita ge ǀgôaba ǁora kairasib âb ǃnâ amaga.

⁸Tsî ǀgôab ge kai tsî ge ǀōǀōhe; ǃnubaib ge Abrahamma kai ǂûǁae-e ge dī, Isaki ge ǀōǀōhe tsēs ai.

⁹Tsî Saras ge ge mû, Hagars Egipteǁîs di ôab, Abrahammas ge ǁorabab ra ǃhō ǃkhaisa,

¹⁰os ge Abrahammi ǃoa ge mî: ǃHaeǂui re nē ǃgās tsî ǁîs di ôab tsîra; nē ǃgās di ôab ti ôab Isaki ǀkha ǀumi tide xuige.

¹¹Tsî nē mîs ge kaise karosa ge i Abrahammi mûǁae, ǁîb di ôab a ǃkhais ǃaroma.

¹²Xawe Elob ge Abrahammi ǃoa ge mî: ǁÎ ǃkhaisa tā karosase ī kai sa mûǁae ǀgôab âts ǃaroma, tsî ǃgās âts ǃaroma; Saras ga mî xū-i hoa-i ǃnâ ǃgâ re ǁîs di dommi ai, Isaki ǃnâts sa ǃkhomma nîra ǂgaibahe xuige.

¹³Tsî ta ge tita ǁkhāti nē ǃgās di ôaba ǁaese nîra mâi, sa surib a amaga.

¹⁴ǃNubaib ge Abrahamma ǃnauǁgoaga khâi tsî pereba ge ū, tsî ǁgam-i ǁhōsa, tsî ǁîna Hagarsa ge mā, ǁîna ǃhōb âs ai ra ǁguiǃâ, tsî ǀgôaba mā tsî ge sîbē si. Os ge ǃgû tsî ǃgaroǃhūb Bersebas dib ǃnâ gere kāma.

¹⁵Tsî ǁhōs di ǁgam-i ge toao, os ge ǀgôaba haidi ǃnâ ge aoǁgui.

¹⁶Tsîs ge ǃgû tsî ǃoa-ai ge ǂnû, khā-i ǀkhats ǁaupe ǁkhâu ǁkhās kōse ra ǁgôase; nētis ra mî xui-ao: Tā î ta ǀgôab ra ǁō ǃkhaisa mû; tsîs ge ǃoa-ai ǂnû tsî dommi âsa ǃhâkhâi tsî ge ā.

¹⁷Ob ge ǃKhūba ǀgôab di domma ge ǁnâu; tsî ǀhomǃgāb Elob dib ge Hagarsa ǀhomma xu ǂgaiǀî tsî ǁîs ǃoa ge mî: Tare-es hō hâ, Hagarse? Tā ǃao re, Elob ge ǀgôab di domma go ǁnâu hâb a ǃkhais ai xuige.

¹⁸Khâi îs ǀgôaba ūkhâi îs ǃommi âs ǀkha ǁîba ǃkhōǀgaipe, tita ge ǁîba kai ǁaese nîra mâi xuige.

¹⁹Tsî Elob ge ǁîsa mûra ge khowaba, os ge ǁgamxa ǂgâ-e ge mû, os ge ǃgû tsî ǁhōsa ǁgam-i ǀkha ǀoaǀoa tsî ǀgôaba ge āsi.

²⁰Tsî Elob ge ǀgôab ǀkha ge hâ i, ob ge kai tsî ǃgaroǃhūb ǃnâ ǁan tsî ge khāǁkhâu-ao kai.

²¹Tsîb ge ǃgaroǃhūb Paranni dib ǃnâ ge ǁan; tsî ǁgûs ge tarasa ge ūba bi Egipteǃhūb disa.

²²ǁNā ǁaeb ǁkhāb ai i ge ǃaruǀî ge ī, o kha ge Abimelexi tsî Pixoli toroǂamkhoeb âb tsîkha Abrahammi ǁga ǃhoa tsî ge mî: Elob ge sa ǀkha hâ, dīts ra xū-i hoa-i ǃnâ.

²³ǁNâi nēsi nūba te re nēpa Elob aiǃâ, ǂkhabasets sîsenū tide ǃkhaisa tita kas, ti ôab kas, ti ǁnurib kas hoasa; xawe ǁnā ǃgâidīb tita ge satsa sîsenūb ǃoats nî dī ǃkhaisa tita tawa tsî nē ǃhūb, ǁîb ǃnâts ǃhaokhoese hâb tawa.

²⁴Ob ge Abrahamma: Nū ta nî, ti ge mî.

²⁵Tsî Abrahammi ge Abimelexa ge ǀau ǁnā ǂgâ-i hîa gu ge Abimelexi di ǃgāga ǀgaib ǃnâ ūǀhana-i ǃaroma.

²⁶Ob ge Abimelexa ge mî: Tita ge ǀū go i, tari-i nē xū-e go dī ǃkhaisa; tsîts ge ǁkhāti satsa tita mîba tama hâ, tsî ta ge ǁkhāti ǁî-i xa ǁnâu tama go hâ i nētsēs kōse.

²⁷Ob ge Abrahamma gūn tsî goman tsîna ū tsî ǁîna Abimelexa ge mā; tsî kha ge ǁî ǀgamkha ǃgaeǀhao-e ge dī.

²⁸Tsî Abrahammi ge hû ǁkhaodi gūn dide ǀguri ge mâi,

²⁹ob ge Abimelexa Abrahammi ǃoa ge mî: Tare-e di nē hû ǁkhaodi, ǀgurits go mâide ra ǂâibasen?

³⁰Ob ge ge mî: Nē hû ǁkhaodets ge ti ǃomǁaeba xu nî ū, ǀhûǀguitimîse i nî ība tese, tita ge nē tsausa khao ǃkhaisa.

³¹ǁNā-amagan ge ǁnā ǃāsa Bersebas ti ge ǂgai, ǁî ǀgamkha ge ǁnāpa nū amaga.

³²Nēti kha ge ǃgaeǀhao-e ge dī Bersebas tawa. ǁNās khaoǃgâb ge Abimelexa ge khâi tsî Pixoli toroǂamkhoeb âb ona, tsî kha ge ǁkhawa Filisteǁîn di ǃhūba ǃoa ge oa.

³³Tsîb ge ǀnomahai-e ge ǂgā Bersebas tawa, tsîb ge ǁnāpa ǀons ǃKhūb ǀamo Elob disa gere ǂgaiǀî.

³⁴Tsî Abrahammi ge ǂgui tsēde ǃhaokhoese Filisteǁîn di ǃhūb ǃnâ ge ǁan.