Read Khoekhoegowab Genesis 22 Bible Online

Genesis 22 - Khoekhoegowab bible

Genesis 22

¹Tsî i ge nē ǃnaeǃkhaidi khaoǃgâ ge ī, Elob ge Abrahamma ǃâitsâ ǃkhaisa; ob ge ǁîb ǃoa: Abrahamtse! ti ge mî. Ob ge ǁîba: Mû, nē ta a, ti ge mî.

²ǃNubaib ge ǁîba ge mî: Sa ôab ǀguise ǃnae hâb, ǀnamts ab, Isaka ū îts ǃgû Moriaǃhūb ǃoa, îts ǁnāpa khauǁguibase sī ǁguiba bi ǁnā ǃhomgu di ǀguib, tita nîra mîba tsib ai.

³Ob ge Abrahamma ǃnauǁgoaga khâi tsî eseli âba ǃgaeǃgâ tsî ge ūǀhao ǀgam ǃgākha tsî Isaki ǁîb di ôab tsîga; tsîb ge ǀaena ge ǁhāǃā khauǁguibas ǃoa tsî khâi, tsîb ge ǃgûsī ǁnā ǃkhais Elob go mîba bis ǃoa.

⁴ǃNonaǁî tsēs aib ge Abrahamma ǃgapakhâi tsî ǁnā ǃkhaisa ǃnūseba xu ge mû.

⁵Ob ge Abrahamma ǃgākha âb ǃoa ge mî: Sakho nēpa hâ re eseli ǀkha, î khom tita tsî ǀgôab tsîkhoma ǁnāpas kōse ǃgû, tsî ǀgoreǀîtoa khom kao, o khom ge ǁkhawa sakho ǃoa nî oahā.

⁶Ob ge Abrahamma ǀaen khauǁguibas dina ū tsî ǁîna Isaki, ǀgôab âb ai ge ǁgui; tsîb ge ǀaes tsî gôas tsîra ǃomǁae ū, tsî kha ge ǁî ǀgamkha ge ǃgû.

⁷ǃNubaib ge Isaka ǁgûb Abrahammi ǃoa: Ti îtse, ti ge mî. Ob ge Abrahamma: Nē ta a, ti ôatse, ti ge mî. Ob ge: Mû, nēn hâ ǀaen tsî ǀaes tsîna, tsî mapa i ǁnâi ǁkhao-i khauǁguibas di-e hâ?

⁸Ob ge Abrahamma ge mî: Elob kom aitsama ǁkhao-i khauǁguibas di-e nîra ǁhûiǂuibaseno, ti ôatse. Tsî ǁnāti kha ge ǁî ǀgamkha ge ǃgûǀhao.

⁹Tsî kha ge ǁnā ǃkhais, ǃKhūb go ǁîba mîbas tawa ge sī; ob ge Abrahamma ǁnāpa altar-e ǂnubi tsî ǀaena ǁî-i ai ǁgui tsî ǁîb di ôab Isaka ǃgae tsî altars ai ge ǁgui bi, ǀaen ǀgapise.

¹⁰Tsî Abrahammi ge ǃommi âba ǀhōǂui tsî gôasa ge ū, ǁîb di ôabab nî ǂāse.

¹¹Xawe ǀhomǃgāb ǃKhūb dib ge ǀhomma xu ǂgaiǀî bi tsî: Abrahamtse, Abrahamtse, ti ge mî. Ob ge ǁîba: Mû, nē ta a, ti ge mî.

¹²Ob ge ge mî: Sa ǃomma tā ǀhōǂui ǀgôabǀî, îts tā tsūdī bi. Nēsisa ta ge tita a ǂan, eloǃaoǃgâxats a tsî sa ôab ǀguisets ūhâbats tita xu ūdawa tama hâ ǃkhaisa.

¹³ǃNubaib ge Abrahamma ǃgapakhâi tsî ge kō, tsî mû, naupab ge ǂkharagūba ǀgom ǃharahain ǃnâ ǁnâkha âb ǀkha tamisenǁapo ge hâ i, ob ge Abrahamma ǃgû tsî ǁnā ǂkharagūba ū tsî khauǁguibase ge ǁguiba bi ǁîb ôab di amǃnâs ai.

¹⁴Tsî Abrahammi ge ǁnā ǃkhais di ǀonsa: ǃKhūb ra mû ti ge ǂgai. ǁÎ ǃkhais ǃaromas ge nētsēs kōse: ǃHommi ǃKhūb dib ai i ge nîra aimûǂanhe, ti ra mîhesa.

¹⁵Ob ge ǀhomǃgāb ǃKhūb diba Abrahamma ǀgamǁî ǃnās ai ǀhomma xu ǂgaiǀî

¹⁶tsî ge mî: Tita ǂûta tawa ta ge tita ra nū, tib ra ǃKhūba mî: Nē ǃkhaisats go dī amaga tsî sa ôab ǀguisets ūhâbats go ūdawaxu te tama i amaga

¹⁷ta ge Tita ǂanǂansase nîra ǀkhae tsi, tsî sa suriba nîra ǂguiǂguiba tsi ǀhommi di ǀgamiron khami tsî ǀgopab hurib amǃgâ ǁgoeb khami, tsî sa surib ge khākhoen âb di dao-amsa nîra ūhâ.

¹⁸Tsî sa surib ǃnâ di ge ǃhūbaib di ǁaedi hoade nîra ǀkhaehe, ti dommats go ǁnâuǀnam hâ i amaga.

¹⁹ǃNubaib ge Abrahamma ǁkhawa ǁîb di ǃgākha ǃoa ge oa; o gu ge khâi tsî ǀhûpe Bersebas ǃoa ge ǃgû; tsîb ge Abrahamma Bersebas tawa ge ǁan.

²⁰Tsî i ge nē ǃnaeǃkhaidi khaoǃgâ ge ī, khoen ra Abrahamma ǂhôa sī tsî mî ǃkhaisa: Mû, Milkas ge ǁkhāti Nahori sa ǃgâsaba ǀgôaga ge ǁoraba:

²¹Usi, ǂguroǃnaesab âb tsî Busi, ǁîb di ǃgâsab tsî Kemueli, Arammi îb,

²²Kesedi, Hasob, Pildasi, Jidlafi tsî Betueli tsîga.

²³Tsî Betueli ge Rebekasa ge hō. Nē ǁkhaisagas ge Milkasa Nahora ge ǁoraba, Abrahammi ǃgâba.

²⁴Tsî ǀgamitaras âb Reuma ti ǀon hâs ge ǁkhāti Tebaxi, Gahammi, Tahasi tsî Maaxab tsîga ge ǁora.