Read Khoekhoegowab Genesis 23 Bible Online

Genesis 23 - Khoekhoegowab bible

Genesis 23

¹Tsî ûib Saras dib ge ǀguikaidisi tsî ǀgamdisihûǀa kurixa ge i; nēgu ge Saras ûib di kuriga ge i.

²Tsîs ge Sarasa Kirjat-Arbas, Hebrons ti ǁkhāti ǂansas tawa, Kanaanǃhūb ǃnâ ge ǁō, ob ge Abrahamma ge hā, Sarasab nî ǃgaebase tsî ǁîsab nî ābase.

³ǁNās khaoǃgâb ge Abrahamma ǁō hâs âb di aisa xu khâi tsî Hetiǁîgu ǀkha ǃhoa tsî ge mî:

⁴Tita ge ǃhaokhoe tsî ǁanǂgā-aota sadu tawa; ǁkhōǃkhai-e mā te re sadu tawa, î ta ti ǁō hâsa ti ais aiǃâba xu ǁkhō re.

⁵O gu ge Hetiǁîga Abrahamma ǃeream tsî ǁîb ǃoa ge mî:

⁶ǃGâ ge re, ǃkhūkhoetse, sats ge gaosats Elob ditsa sida ǁaegub ǃnâ, sa ǁō hâsa hoan xa ǃgâi ǀhobadi sida didi ǃnâ ǁkhō re, khoeb sige dib xareb ge ǂkhā tsi tide, sa ǁō hâsa ǁkhōsa.

⁷Ob ge Abrahamma khâi tsî ge ǃgamǃgâ ǁnā ǃhūb di ǁaes aiǃâ, Hetiǁîgu aiǃâ,

⁸tsîb ge ǁîgu ǀkha ǃhoa tsî ge mî: Sago ǂâis ga īo, ti ǁō hâsa ta ti ais aiǃâba xu nî ǁkhō ǃkhaisa, ǁnâi ǃgâ te re î go Efronni Sohari ôab tawa ǃhoaba te re,

⁹îb ǁîba ǁhoaǃnāb Maxpelab, ǁîb dib, ǃhanab âb ǁaegu ǁgoeba tita mā re ǀoasa marin ama, ǀumiǁkhōǃkhaise sadu ǁaegub ǃnâ.

¹⁰Tsî Efronni ge Hetiǁîgu ǁaegu ge ǂnôa i; ob ge Efronni Hetiǁîba Abrahamma ge ǃeream Hetiǁîgu tsî ǁnān ǁîb ǃās di dao-ams ǃnâ gere ǂgân hoan ǂgaedi ǃnâ, mî rase:

¹¹Hî-î ti ǃkhūkhoetse, ǃgâ te re, ǃhanaba ta ra ǀkhae tsi, ǁkhāti ǁhoaǃnāb ǁîb ǃnâ hâba ta ra ǀkhae tsi, ti ǁaes di ôagu mûǁae ta ge ǁîkha ra ǀkhae tsi: ǁKhō re sa ǁō hâsa.

¹²Ob ge Abrahamma ge ǃgamǃgâ ǁnā ǃhūb ǁaes di ais aiǃâ;

¹³tsîb ge Efronni ǀkha ǁnā ǃhūb ǁaes di ǂgaedi ǃnâ ǃhoa tsî ge mî: Aio, satsa kha ǁîtsa? ǀNamsabetse, îts ǁnâi ǁnâuǃgâ te re: Tita ge ǃhanab di mariba nî mā; îts ǁnâi ǁîba tita xu ū, î ta tita ti ǁō hâsa ǁnāpa sī ǁkhō.

¹⁴Ob ge Efronna Abrahamma ǃeream tsî ǁîb ǃoa ge mî:

¹⁵Ti ǃkhūkhoetse, ǃgâ te re: ǃHana-i hakakaidisi sikeln ǃurimarib din di ǀgause ī-e, tare-i a ǁî-e tita tsî sats tsîkhom ǁaegu? ǁKhō ǁnâi re sa ǁō hâsa!

¹⁶Ob ge Abrahamma Efronna ge ǃgâba; tsîb ge Abrahamma Efronna ǁnā marib, ǁîb xab goro ǃhoaba, Hetiǁîgu di ǂgaedi ǃnâ ge māǁnâ, hakakaidisi sikeln ǃurimarib dina, ǁamagu-aob ǃnâ i ra dīhe khami.

¹⁷Nē dommi aib ge ǃhanab Efronni dib Maxpelas ǃnâ hâb, Mamres ǃoa-ai ǁgoeb, ǃhanab tsî ǁhoaǃnāb ǁîb ǃnâ hâb tsî haidi hoadi, ǃhanab ǃnâ mâdi, ǁnā ǀkharib hoab ai ǁapoǁapohe hâdi tsîn:

¹⁸ǁÎn ge ge Abrahammi di kai Hetiǁîgu di mûǁae, ǁnān ǁîb ǃās di dao-ams ǃnâ gere ǂgân hoana.

¹⁹Tsî ǁnās khaoǃgâb ge Abrahamma Saras, taras âba, Maxpelas ǃhanab di ǁhoaǃnāb ǃnâ ge ǁkhō, Mamres, ǁnās ge a Hebron, ǃoa-ai ǁgoeb, Kanaanǃhūb ǃnâ.

²⁰Nētib ge ǁnā ǃhanab tsî ǁnā ǁhoaǃnāb ǁîb ǃnâ hâba Hetiǁîgu xa ǀumiǁkhōǃkhaise Abrahamma ge ǁapoǁapobahe.