Read Khoekhoegowab Genesis 24 Bible Online

Genesis 24 - Khoekhoegowab bible

Genesis 24

¹Tsî Abrahammi ge kaira tsî ge kurixa; tsî ǃKhūb ge Abrahamma hoa xūn ǃnâ ge ǀkhae.

²Ob ge Abrahamma ǁîb di ǃgāb, ommi âb ǃnâ a kaib, ūb hâ xūn hoana ra dī-unub ǃoa ge mî: Sa ǃomma ǁgui re ti kamanab ǃnâ;

³î ta nū kai tsi re ǃKhūb ǀhommi di Elob tsî ǃhūbaib di Elob tawa, ti ôabats Kanaanǁîn, ǁîn ǁaegu ta ǁan hân di ôadi xa tara-e ūba tide ǃkhaisa;

⁴xawe ti ǃhūb ǃoa ǃgû, tsîts nî ti ǀaokhoen tawa sī tsî ti ôab Isaka tara-e nî ūba ǃkhaisa.

⁵Ob ge ǁnā ǃgāba ǁîb ǃoa ge mî: Okha, ǀnîsis ge ǁnā tarasa tita nē ǃhūba ǃoa sao ǂgao tama nî i, ǁnâi ta kha sa ôaba ǁkhawa ǁnā ǃhūb, sats ge ǁîba xu doeǂoaxabǀî nî ūsī?

⁶Ob ge Abrahamma ǁîb ǃoa ge mî: ǂAnbasen, îts ti ôaba tā ǁkhawa ǁnāpa ūsī!

⁷ǁNā ǃKhūb ǀhommi di Elob, tita ti îb di ommi tsî ǀaokhoen di ǃhūba xu ge ūb, tsî tita ǃoa gere ǃhoab tsî tita gere nūbab, mî raǃâ: Sa suriba ta ge tita nē ǃhūba nîra mā. ǁÎb ǂûb ge ǀhomǃgāb âba sa ais aiǃâ nîra sî, ǁnāpa xuts nî ti ôaba tara-e ūbaga.

⁸Tsî taras ga satsa sao ǂgao tama io, ots ge ti nūsa xu nî ǃnorasa, xawe ti ôaba tā ǁkhawa ǁnāpa ūsī.

⁹ǃNubaib ge ǁnā ǃgāba ǃommi âba Abrahammi ǀhonkhoeb âb di kamanab ǃnâ ǁgui tsî ǁîba ge nūba nē ǃkhais ǃaroma.

¹⁰Ob ge ǁnā ǃgāba disi ǃnaina ǀhonkhoeb âb di ǃnain xa ū tsî ge dāǁnâ; tsî xūn ǁîb ǀhonkhoeb din hoan ge ǁîb ǃomǁae ge hâ i; ob ge khâi tsî ge ǃgûsī Mesopotamiab ǁga Nahori di ǃās ǃoa.

¹¹Tsîb ge ǃnaina ǃās ǃauga ge ǃhonǁgoa kai, ǁgamǂgâ-i tawa, ǃui-am ǁaeb ai, xuri-aodi ra ǂoaxa ǁaeb ai.

¹²Tsîb ge ge mî: ǃKhūtse, ti ǀhonkhoeb Abrahammi di Elotse, a ta ǁnâi nētsē ǁîsa ǃoa re, îts ǃgâidība Abrahammi ti ǀhonkhoeb tawa dī re.

¹³Mû tita ge ǁgamǀaus tawa mâ, tsî ǀgôadi nē ǃās di aogu didi ge ra ǂoaxa ǁgama di nîse.

¹⁴A-i ǁnâi ī, îs ǁnā ǂkhamkhoes, ǁîs ǃoa ta ga: Sa xapasa ǂō î ta ā re, ti mîs, tsîs ga ǁîsa: Ā re, o ta ge ǁkhāti sa ǃnaina nî āsi, ti mîo, as ǁîsa ǁnā ǀgôa i, sa ǃgāb Isakats ǀkhae hâs ase, î ta ǁî ǃkhaisa xu ǂanǃā, ti ǀhonkhoeb tawats go ǃgâidība dī ǃkhaisa.

¹⁵Tsî i ge ge ī, ǃhoatoa tamab hâ hîas ge Rebekasa ǀkhīsa, Betuela ge ǁorabahes, Milkas, Nahori Abrahammi ǃgâsab di taras xasa, tsîs ge ǁîsa xapas âsa ǃhōb âs ai ge ūhâ i.

¹⁶Tsîs ge ǂkhamkhoesa kaise îsa aisa-î ǀgôa ge i, ǂkhamkhoes hîa ao-i xa ǂanhe tama ge hâ is; tsîs ge ǂgâs ǃnâ ǁgôa tsî xapas âsa ǁai tsî ge ǂoaxa.

¹⁷ǃNubaib ge ǃgāba ǁîsa ǃkhoeǃoa tsî ǁîs ǃoa ge mî: A ta āro re ǁgam-i xa sa xapas ǃnâ.

¹⁸Os ge ǁîsa: Ā re, ti ǃkhūkhoetse! ti mî tsî xapas âsa ǃhaese ǃommi âs ai ǁgôa kai tsî ge ā kai bi.

¹⁹Tsî āsi bi toas geo, os ge ge mî: Tita ge ǁkhāti sa ǃnaina nî xuriba, hoatsaman nî ātoas kōse.

²⁰Os ge ǃhae tsî xapas âsa āǃnâǃoreb ǃnâ ǂnâǂui tsî ǁkhawa ǂgâs ǃoa ge ǃkhoe, ǃkhā nîse, tsîs ge ǃnain hoana gere xuriba.

²¹Ob ge khoeba ǁîs ǂama burugâ tsî ge ǃnō, hōǃâb nîse, īseb ǃKhūba ǁîb di daoba amǁnā kai tama hâsa.

²²Tsî i ge ge ī, ǃnain ge ātoao, ob ge ǁnā khoeba ǃhuniǀurib di î-îxūs ǃūs dis, ǃkhare sikels kōse ǃgomsa ū, tsî ǀgam ǃganura ǁîs ǃomkha anu hâra, ǃhuniǀurib xa disi sikeln kōse ǃgomra.

²³Nētib ge mî xui-ao: Tarib ôasa sasa? ǂAnǂan te re ǁîsa! Saob ommi tawa ǁkhāti hâǃkhai-e hâ i a, sige nî ǁomga?

²⁴Os ge ǁîsa ǁîb ǃoa ge mî: Tita ge Betueli, Milkas ôab, Nahoras ge ǁorabab di ôa ta.

²⁵ǃAruǀîs ge ǁîb ǃoa ge mî: ǃHoroǃgaodan tsî ǂgui ǃû-ain ge ǁkhāti sida tawa hâ, ǁkhāti ǃkhai-i hâǁgoaǃnâhe nî-e.

²⁶ǃNubaib ge ǁnā khoeba danas âba ǃgam tsî ǃKhūba ǀgoreǀî

²⁷tsî ge mî: Ab koahe ǃKhūb, ti ǀhonkhoeb Abrahammi di Elob, ǃgâidīb tsî amab âba ǁnākhao tama hâba ti ǀhonkhoeb tawa. Tita xasa: ǃKhūb ge tita nē daob ai go ǂgaeǂguihā ti ǀhonkhoeb ǃgâgu di ommi ǃoa.

²⁸Os ge ǁnā ǀgôasa ǃkhoe tsî ǁgûs ommi tawa ge sī ǂanǂan, nē go ǃnae xūna.

²⁹Tsî Rebekas ge ǃgâsaba ge ūhâ i, Labanni ti ǀon hâba, tsîb ge Labanna ǁnā khoeb ǃoa ge ǃkhoe ǂgâs ǃoa.

³⁰Tsî i ge ge ī, ǃūs di î-îxūsab ge mûo, tsî ǃganura ǃgâsas âb di ǃomkha tawa hâra, tsî ǁnâub geo ǁîb ǃgâsas Rebekas di mîdi hîas ra mîde: Nētib ge ǁnā khoeba tita ǁga go ǃhoa, ob ge ǁnā khoeb tawa ge sī, ǃnain ǀkhab ǂgâs tawa mâ hîa.

³¹Tsîb ge ge mî: ǂGâ re sats ǃKhūb xa ǀkhaehe hâtse, tare xū-i ǃaromats kha ǃauga nî mâ? Omma ta go ǂhomi xuige tsî ǃnain di hâǃkhais ona.

³²ǃNubaib ge ǁnā khoeba ommi tawa ge sī, tsîb ge Labanna ǃnaina ge oreǃgâ, tsîn ge ǃnaina ǃhoroǃgaodan tsî nau ǃûxūn tsîna ge mā; tsî ǁgam-e, ǂaira âb nî ǁāhese tsî ǂaidi ǁnā khoegu ǁîb ǀkha hâgu dide.

³³ǁNās khaoǃgâb ge ǂûna ge mâi-aiǃâhe; xaweb ge ǁîba: Tita ge ǂû tide, ti mîde ta nî ǃhoas kōse, ti ge mî. Ob ge: ǃHoa re, ti ge mî.

³⁴Ob ge ge mî: Tita ge Abrahammi ǃgāta.

³⁵Tsî ǃKhūb ge ti ǀhonkhoeba kaise ge ǀkhae, kaib ges kōse; tsîb ge ǁîba ge mā gūn, goman, ǀhaiǀurib, ǃhuniǀurib, ǃgāgu, ǃgādi, ǃnain tsî eseln tsîna.

³⁶Tsî Saras ti ǀhonkhoeb di taras ge ti ǀhonkhoeba ǀgôaba ge ǁoraba kairasib âs ǃnâ; tsîb ge ǁîba ūb hâ xūn hoana ge mā.

³⁷Tsî ti ǀhonkhoeb ge ge nū kai te mî raǃâ: Sats ge ti ôaba tara-e ūba tide Kanaanǁîn ǃhūb ân ǃnâ ǁan hân di ôadi xa.

³⁸Xawe ǃgû ti îb di ommi ǃoa tsî ti ǃhaosa ǃoa, îts ti ôaba ǁnāpa xu tara-e ūba.

³⁹ǃNubai ta ge ti ǀhonkhoeb ǃoa ge mî: ǀNîsis ge ǁnā tarasa tita sao ǂgao tama nî i.

⁴⁰Ob ge tita ǃoa ge mî: ǁNā ǃKhūb, ǁîb di ais aiǃâ ta ge tanisenni ge ǀhomǃgāb âba sa ǀkha nîra sî, tsîb ge ǁîba sa daoba nîra ǃgâiǃō kai, ots ge ti ôaba tara-e nî ūba, ti ǃhaos tsî ti îb di omma xu.

⁴¹ǁNāǃnubaits ge ti nūsa xu nî ǃnorasa: Ti ǃhaos tawa sī tsîn ga ǁîsa mā tsi ǂgao tama io, ots ge nî ǃnorasa ti nūsa xu.

⁴²O ta ge nētsē ǂgâs tawa hā tsî go mî: O, ǃKhūtse, ǀhonkhoeb tib Abrahammi di Elotse, ti daob ǁîb ai ta nēsi ǃgûgaubats ga ǃgâiǃgâ kai ǂgao-o:

⁴³Mû tita ge ǁgamǂgâs tawa mâ hâ; a-i ǁnâi ī, îs ǁnā ǂkhamkhoes xuri nîse ra ǂoaxas tsî ta ga tita ǁîs ǃoa mîo, mā te, î ta ǁgamro-i xa ā re sa xapas ǃnâ,

⁴⁴tsîs ga ǁîsa tita ǃoa mîo, ā re satsa, o ta ge ǁkhāti sa ǃnaina nî xuriba, îs ǁîsa ǁnā tara i, ǃKhūb ga ti ǀhonkhoeb di ôaba ǁgau hâsa.

⁴⁵Tita ganupe ǃhoa tama hâ hîas ge Rebekasa go ǂoaxa, xapas âsa ǁîs di ǃhōs ai ūhâse, tsîs ge ǂgâs ǃnâ ǁgôa tsî go ǃkhā; o ta ge tita ǁîs ǃoa: Mā te î ta ā re! ti ge mî.

⁴⁶Os ge ǃhae tsî xapas âsa ǁgôa kai tsî ge mî: Ā re satsa o ta ge ǁkhāti sa ǃnaina nî āsi; o ta ge goro ā, tsîs ge ti ǃnaina ǁkhāti goro āsi.

⁴⁷ǃNubai ta ge dî si tsî: Tarib ôasa? ti ge mî. Os ge Betueli, Nahori ôab, Milkas ge ǁîba ǁorabab ôata ti go mî. ǃNubai ta ge ǃūs di î-îxūsa ais âs ai go ǂgā tsî ǃganude ǁôakha âs ai;

⁴⁸tsî ta ge tita ti danasa ǃgam tsî ǃKhūba ǀgoreǀî tsî ta ge ǃKhūba goro koa, ti ǀhonkhoeb Abrahammi di Elob, ǂhanu daob ai ge ǂgaeǂgui teba, ti ǀhonkhoeb ǃgâsab di ôasa ta ǁîb di ôaba tarase nî ūbase.

⁴⁹Tsî nēsi ǁnâi, ǃgâidīb tsî îǂhôasib tsîkha du ga ti ǀhonkhoeba dī-ū ǂgao, o ǁîsa ǂanǂan te re, î ta amǀkhāb ǃoas kas, ǁareǀkhāb ǃoas kas hoasa dabasen.

⁵⁰ǃNubai kha ge Labanni tsî Betueli tsîkha ǃeream tsî ge mî: Nē ǃkhais ge ǃKhūba xu go hāsa, sida ge tsū-i kas ǃgâi-i kas hoasa sa ǀkha a ǃhoa ǁoa.

⁵¹Mû, Rebekas ge sa ais aiǃâ hâ, ǁîsa ū î ǃgûsī, îs sa ǀhonkhoeb ôab tara kai, ǃKhūb go mî khami.

⁵²Tsî i ge ge ī, Abrahammi ǃgāb ge ǁîb di mîde ǁnâuo, ob ge ǃhūb ai ge ǃgamǃgâ ǃKhūb aiǃâ,

⁵³tsîb ge ǃgāba ǀhaiǀuriǀgapiǃgôasan tsî ǃhuniǀuriǀgapiǃgôasan tsî saran tsîna ūǀkhī tsî ǁîna Rebekasa ge mā; tsîb ge ǁkhāti ǃgâsab âs tsî ǁgûsa ǀgapiǃgôasa xūna ge mā.

⁵⁴ǃNubai gu ge ǂû tsî ge ā ǁîb tsî khoegu, ǁîb ǀkha hâgu tsîga; tsî gu ge ǁomǂkhai tsî gu ge ǃnauǁgoaga ge khâi tsîb ge: A ta doe re ti ǀhonkhoeb ǃoa, ti ge mî.

⁵⁵ǃNubai ra ge ǁîs di ǃgâsab tsî ǁgûs tsîra ge mî: As ǀgôasa disi tsēdi xawede sida ǀkha hâ re; ǁnās khaoǃgâts ge a ǃgû ǁkhā.

⁵⁶Xaweb ge ǁîba ǁîna ǃoa ge mî: Tā ǀhapeǀhape te re, ǃKhūb go ti daoba ǃgâiǃgâ kai xuige; a ta doe, î ta ti ǀhonkhoeb tawa sī re.

⁵⁷On ge ge mî: ǀGôasa ǂgai, î da ǁîs ai dî re.

⁵⁸On ge Rebekasa ǂgai tsî ǁîs ǃoa ge mî: Doe ǂgaos ra nē khoeb ǀkha? Os ge: Doe ǂgao ta ra, ti ge ǃeream.

⁵⁹ǃNubain ge Rebekas, ǁîn di ǃgâsas tsî kaikaikhoes âsa ge doe kai tsî Abrahammi ǃgāb tsî ǁîb di khoegu tsîna.

⁶⁰Tsîn ge Rebekasa ǀkhae tsî ǁîs ǃoa ge mî: Sida ǃgâse, kaiǀoadisi kai, îb sa suriba khākhoen âb di ǁāga ūhâ!

⁶¹Os ge Rebekasa khâi ǂkhamkhoedi âs ǀkha, tsî di ge ǃnain ai ǃgapi tsî khoeba ge sao. Tsî ǁnā ǃgāb ge Rebekasa ū tsî ge doe.

⁶²Tsî Isaki ge ge sī ǂgâs Lahai-Rois ǃoa gau daob kōse, tsîb ge ǃkhawagasǀî ǁgoe ǃhūb ǃnâ ge ǁan.

⁶³Tsîb ge Isaka ǃgûǂoa ge hâ i ǃaub ǃnâb nî ǀgorese ǃui-am ǁaeb ai; tsî ǃgapakhâi tsîb ge mû, on ge ǃnaina ǃgoaxa.

⁶⁴Tsî Rebekas ge ǁkhāti ǃgapakhâi tsî Isaka mû os ge ǃnaiba xu ge ǁgôa.

⁶⁵Tsîs ge ǃgāb ǃoa ge mî: Tariba ǁnā khoeb ǃaub ǃnâ sada ra ǃgûǃoaba? Ob ge ǃgāba: Ti ǀhonkhoeb ge a ǁî, ti ge mî. ǃNubais ge ǃgū-aixūsa ū tsî ge ǃgū-aisen.

⁶⁶Tsî ǃgāb ge Isaka dīǃkhaidi ǁîb ge dīdi hoadi xa ge ǃhoaba.

⁶⁷Ob ge Isaka ǁîsa ǁîb îs Saras di tentoms ǃnâ ge ūǂgâ, tsîb ge Rebekasa ge ū, tsîs ge ǁîsa ge ǁîb di tara kai, tsîb ge ǁîsa ge ǀnam hâ i. Nētib ge Isaka ge ǁkhaeǂgaohe ǁîb îs di ǁōb ǃaroma.