Read Khoekhoegowab Genesis 25 Bible Online

Genesis 25 - Khoekhoegowab bible

Genesis 25

¹Tsî Abrahammi ge ǁkhawa taras, Keturas ti ǀon hâsa ge ū.

²Tsîs ge ǁîsa ge ǁoraba bi Simranni, Joksanni, Medanni, Midianni, Jisbaki tsî Suaxi tsîga.

³Tsî Joksanni ge Sebab tsî Dedanni tsîkha ge hō, tsî Dedanni di ôan ge Assurǁî, Letusiǁî tsî Leumiǁî ge i.

⁴Tsî Midianni di ôagu ge Efab, Eferi, Henoxi, Abidab tsî Eldaab tsîga ge i. Nēgu hoagu ge Keturas di ôa ge i.

⁵Tsî Abrahammi ge Isaka ūb hân hoana ge mā.

⁶Tsî ǀgamitaradi Abrahammi ūhâdi di ôagab ge Abrahamma ǀkhaexūna ge mā, tsîb ge ǁîga ǁîb di ôab Isaka xu ge sîbē, ganupeb ûi hâ hîa, aiǂoasǀî, aiǂoas ǃhūba ǃoa.

⁷Tsî nēdi ge tsēdi Abrahammi ûib di kurigu dide: ǀGuikaidisi tsî hûdisikoroǀa kuriga.

⁸Tsî Abrahammi ge gagasa mā tsî ge ǁō ǃgâi kairasib ǃnâ, kaira tsî ûib xa ǁâ hâse, tsîb ge ǁaedi âb tawa ge ǀhaoǀhaohe.

⁹Tsî ǁîb di ôakha Isaki tsî Ismaeli tsîkha ge ǁîba ge ǁkhō, ǁhoaǃnāb Maxpelab, Efronni di ǃhanab ǃnâ hâb, Sohari ôab Hetiǁîb, Mamres ǃoa-ai ǁgoeb ǃnâ.

¹⁰ǁNā ǃhanab, Abrahammi ge Hetiǁîga xu ǁamab, ǁîb ǃnâb ge Abrahamma ǁkhōhe hâ tsî Saras taras âb ona.

¹¹Tsî i ge Abrahammi di ǁōb khaoǃgâ ge ǃnae, Elob ge Isaki ǁîb di ôaba ǀkhae ǃkhaisa. Ob ge Isaka ǂgâs Lahai-Rois tawa ge sī ǁan.

¹²Tsî nēdi ge ǃnae-aidi Ismaeli dide, Abrahammi ôab, Hagars Egipteǁî ǃgās Saras dis Abrahamma ge ǁorababa.

¹³Tsî nēdi ge ǀondi Ismaeli ôagu dide, ǁîgu ǃnaes ǃoa gu ūhâ ǀondi ǀkha: ǂGuroǃnaesab Ismaeli dib ge Nebajot; ǁnās khaoǃgâ Kedari, Adbeeli, Mibsammi,

¹⁴Mismab, Dumab, Masab,

¹⁵Hadadi, Temab, Jeturi, Nafib tsî Kedmab tsîga.

¹⁶Nē gu ge Ismaeli di ôaga, tsî nēdi ge ǁîgu di ǀonde, ǁîgu di ǁgoeǃkhaidi tsî î-omgu ǃoa, disiǀgamǀa gaosagu ǁîgu di ǁaedi ǃoa.

¹⁷Tsî nēgu ge kurigu Ismaeli ûib diga: ǀGuikaidisi tsî ǃnonadisihûǀa kuriga; tsîb ge gagasa mā tsî ge ǁō, tsîb ge ǁaedi âb tawa ge ǀhaoǀhaohe.

¹⁸Tsîn ge Havilasa xu Surs kōse ge ǁan, Egipteb ǃoagu ǁgoes, Asiriab ǃoats ra ǃgû xase; ǁîb ǃgâsagu hoagu di ais aiǃâb ge ǁîba ge ǁnāǁgôa.

¹⁹Tsî nēdi ge ǃnae-aidi Isaki Abrahammi ôab dide. Abrahammi ge Isaka ge hō.

²⁰Tsî Isaki ge hakadisi kurixa ǃnubaib ge Rebekas, Betueli, Siriaǁîb, Padan-Aramǃhūǃâs dib di ôas, Labanni Siriaǁîb di ǃgâsasa tarase ge ūbasen.

²¹Tsî Isaki ge ǃKhūba kaise gere ǀgore, taras âb hâ hîa, ǁora tamas hâ xui-ao; tsî ǃKhūb ge ǁîb xa ge ǀgorehōkaisen, os ge Rebekas taras âba ge ǀgamǀkhā.

²²Tsî ǀgēkha ge ge ǂgâugu ǃnāb âs ǃnâ. Os ge ǁîsa ge mî: ǁNāti i kha ǁnâi ī? Tare xū-i ǃaroma ta ûi hâ? ti, tsî ge ǃgû, ǃKhūbas nî dîga.

²³Ob ge ǃKhūba ǁîs ǃoa ge mî: ǀGam ǁaera ge sa ǃnāb ǃnâ hâ tsî ǀgam ǃhaora ge sa ǃnāba xu nîra ǀgoraǃā; tsî ǀgui ǁaes ge nau ǁaes xa nîra ǀgaisa; tsî kaib ge ǂkhamma nîra ǃoaba.

²⁴Tsî ǁoras nî tsēdi ge ǀoao, o kha ge ǀgēkha ǃnāb âs ǃnâ hâ ge i.

²⁵Tsî ǂgurob ge ǀapaǃnâse ge ǀkhī, ǀûxa khō-i khami; ǁnā-amagan ge ǀons âba Esau ti ge ǂgai.

²⁶Tsî ǁnās khaoǃgâb ge ǃgâsab âba ge ǂoaxa, ǃommi âb ǀkha Esaub di ǃnôasa ǃkhōǀgara hâse, ǁnā-amagan ge ǀons âba Jakob ti ge ǂgai. Tsî Isaki ge ǃnanidisi kurixa ge i ǁîkhab ge hōbahe ǃnubai.

²⁷Tsî nē ǀgôakha ge ge kai, ob ge Esauba ge gā-ai ǃau-ao tsî ǃgarob di ao kai, tsî Jakob ge ge ǃaoǃgâxa ao kai, tentomdi ǃnâ ǁan hâba.

²⁸Tsî Isaki ge Esauba ge ǀnam hâ i, xamariǁgan-eb ra ǂû ǂgao amaga; xawe Rebekas ge Jakoba ge ǀnam hâ i.

²⁹Tsî Jakob ge ǂû-ai-e ge sâibasen; ob ge Esauba ǃauba xu ge hā tsau hâse.

³⁰Ob ge Esauba Jakob ǃoa ge mî: A ta tsâtsâ re ǁnā ǀapa ǂû-i xa, tsau ta hâ xuige. ǁNā-amagan ge Edom ti ge ǂgai bi.

³¹ǃNubaib ge Jakoba: ǁAmaxū-ai te re nētsēs ai sa ǂguroǃnaesisa, ti ge mî.

³²Ob ge Esauba: Kō, tita kom ǁōǃgûgauo, tare-es ǂguroǃnaesisa nî hui te? ti ge mî.

³³Ob ge Jakoba: Nūba te re aibe, ti ge mî; ob ge ge nūba bi; tsîb ge ǁnāti ǂguroǃnaesis âba ge ǁamaxū.

³⁴ǃNubaib ge Jakoba Esauba pereb tsî lensiǂû-i xa ge mā; ob ge ǂû tsî ge ā; tsî khâi tsî ge ǃgû. Nētib ge Esauba ǂguroǃnaesisa ge ǃharaxū.