Read Khoekhoegowab Genesis 26 Bible Online

Genesis 26 - Khoekhoegowab bible

Genesis 26

¹Tsî i ge ǃâtsūǀkhā-e ǁnā ǃhūb ǃnâ ge hā, nau ǃâtsūǀkhāb Abrahammi di tsēdi ǃnâ ge hâ iba ǃnā hâ-e. Ob ge Isaka Abimelexi Filisteǁîn di gao-aob ǁga Gerars ǃoa ge doe.

²ǃNubaib ge ǃKhūba ǁîb tawa ǂhai tsî ge mî: Tā doeǁgôa Egipteb ǃoa, îts ǁnā ǃhūb tita nîra mā tsib ǃnâ ǁan.

³ǃHaokhoese ǁan ǁnā ǃhūb ǃnâ, o ta ge tita sa ǀkha hâ tsî nîra ǀkhae tsi; sats tsî sa suriba ta ge tita nē ǃhūgu hoaga nîra mā, tsî nîra ǀgaiǀgai ǁnā nūs, Abrahammi sa îba ta ge nūbasa.

⁴Tsî tita ge sa suriba nîra ǂguiǂgui ǀhommi di ǀgamirodi khami, tsî ta ge sa suriba nē ǃhūgu hoaga nîra mā, tsî sa surib ǃnâ di ge ǃhūbaib di ǁaedi hoade nîra ǀkhaehe;

⁵Ti dommab ge Abrahamma ge ǁnâuǀnam hâ i amaga, tsî ti mîmās, ti ǃkhâikhomdi, ti ǂnûiǂgādi tsî ti ǂhanugu tsînab ge ǃkhōǀgaipe hâ i amaga.

⁶Tsîb ge Isaka Gerars tawa ge ǁan.

⁷Tsî ǁnā ǃās khoegu ge taras âb xa dîo, ob ge: Ti ǃgâsas ge, ti ge mî; ti taras a ti mîsab ge ǃao xui-ao; î gu ǁnā ǃās khoega tā ǀnîsi ǃgam te tib ge ge ǂâi, Rebekas ǃaroma, îsa aisa-îs ge i amaga.

⁸Tsî i ge ge ī, ǂomxa ǁaebab ǁnāpa ge hâ is khaoǃgâ, ob ge Abimelexi Filisteǁîn di gao-aoba mûǂuidaosa xu ǂui tsî ge mû, Isaki, Rebekas, taras âb ǀkha ra gara ǃkhaisa.

⁹ǃNubaib ge Abimelexa Isaka ǂgai tsî ge mî: Okha, amases go a sa tarao, tarexats ǁnâi: Ti ǃgâsas ge, ti ge mî? Ob ge Isaka ǁîb ǃoa ge mî: Nēti ta ge ǂâi xui-ao: Î ta tā ǀnîsi ǁîs ǃaroma ǁō!

¹⁰Ob ge Abimelexa ge mî: Tare xū-e kha nē-e sats go dī da-e? Supuseb ga nē ǁaes aore khoegu di ǀguiba sa taras ǀkha ǁgoe hâo, ots kom ga ǀhapi-e sida ai ūhā hâo.

¹¹ǃNubaib ge Abimelexa ǁaes hoasa ǃkhâi tsî ge mî: Nē aob kas, taras âb kas hoasa ga tsâǀkhā-i hoa-i, ǁî-i ge amase nîra ǃgamhe.

¹²Tsîb ge Isaka ǁnā ǃhūb ǃnâ gere tsoro, ob ge ǁnā kurib ǁkhāb ǃnâ kaidisiǃnâguse ge hō, ǃKhūb ge ǁîba ǀkhae amaga.

¹³Nētib ge nē aoba ge kai, ā, ǃaruǀîǀguib ge kai, kaiseb ge kais kōse.

¹⁴Tsîb ge ǂgui gūn tsî goman tsîna ge ūhâ i, tsî ommi âb din ge ǂgui ge i, Filisteǁîn ge suri bis kōse.

¹⁵Tsî ǂgâdi ǁîb îb di ǃgāgu ge ǁîb îb Abrahammi di tsēdi ǃnâ gere khaodi hoaden ge Filisteǁîna ge ǂgan tsî ǃhūb ǀkha ǁîde ge ǀoaǀoa.

¹⁶ǁKhātib ge Abimelexa Isaki ǃoa ge mî: Doe re sida xu, sida ǃnā hâsets go ǀgaisa xuige.

¹⁷ǃNubaib ge Isaka ǁnāpa xu doe tsî Gerars di ǃgoaǃnāb ǃnâ ǁgoe tsî ǁnāpa sī ge ǁan.

¹⁸Tsî Isaki ge oao, ob ge ǁgamǂgâdi, ǁîb îb Abrahammi ǁaeb ain gere khaodi, tsî Filisteǁîn ge Abrahammi di ǁōb khaoǃgâ ǂgande ge xora; tsîb ge ǁîdi di ǀonde ǁnā ǀondi, ǁgûb ge ǁîdi ǀkha ǂgaidi ǃoa ge ǂgai.

¹⁹Tsî gu ge Isaki ǃgāga ǃgoaǃnāb ǃnâ xora tsî ǁnāpa ǂgâ-e ge hō, ûitsama ǁgam-i ǀkha.

²⁰Tsî ǃûi-aogu Gerars digu ge Isaki di ǃûi-aogu ǀkha ǂnoagu tsî ge mî: Nē ǁgam-i ge a sige di. ǁNā-amagab ge ǀons ǁnā ǂgâs disa Eseks ti ge ǂgai, ǁîb ǀkha gu ge ǂnoagu hâ i xui-ao.

²¹ǃNubai gu ge ǀnî ǂgâsa ge xora, tsî ǁîs ǂama gu ge ǁkhāti ge ǂnoagu. ǁNā-amagab ge ǀons âsa Sitnas ti ge ǂgai.

²²Ob ge ǁnāpa xu khâi tsî ǀnî ǂgâsa ge xora, tsî gu ge ǁîs ǂama ǂnoagu tama ge i. ǁNā-amagab ge ǀons âsa Rehobot ti ǂgai tsî ge mî: Nēsib ge ǃKhūba ǃkhai-e go dība da xui-ao, tsî da ge go ǀom nē ǃhūb ǃnâ.

²³ǃNubaib ge ǁnāpa xu Bersebas ǃoa ge doeǃapa.

²⁴Ob ge ǃKhūba ǁîb tawa ǁnā tsuxub ǁkhāb ǃnâ ǂhai tsî ge mî: Tita ge Elota sa îb Abrahammi dita, tā ǃao re, tita sats ǀkha hâ xuige tsî tita ge satsa nîra ǀkhae tsî sa suriba kaise nîra ǂguiǂgui Abrahammi, ti ǃgāb ǃaroma.

²⁵ǃNubaib ge ǁnāpa altarsa ǂnubi tsî ǃKhūb di ǀonsa ge ǂgaiǀî; tsîb ge ǁnāpa tentoms âba ge ǂnaumâi, tsî Isaki di ǃgāgu ge ǁnāpa ǂgâ-e ge xora.

²⁶Tsî Abimelexi ge ǁîb ǃoa ge ǃgû Gerarsa xu Ahusab ǀhōsab âb tsî Pixoli toroǂamkhoeb âb tsîkha ǀkha.

²⁷Ob ge Isaka ǁîb ǃoa ge mî: Tare xū-i ǃaroma go ti tawa go hā tita go ra ǁkhan hîa, tsî tita go ge sîbēs khaoǃgâ?

²⁸O gu ge ge mî: Mûmûsase da ge go mûhō, ǃKhūb sa ǀkha hâsa; ǁnā-amaga da ge sida goro mî: A-i nū-e sada ǁaegu hâ, sida tsî sadu ǁaegu; î da sadu ǀkha ǃgaeǀhao-e dī,

²⁹sida du tsūdī tide ǃkhaisa, sida ge sado tsâǀkhā tama hâ i khami, tsî sado da ge sida ǃgâidīs ǀguisa ge hî, tsî ǂkhîb ǃnâ ge doe kai du khami. Sats ge a nēsi ǃKhūb di ǀkhaesabe.

³⁰ǃNubaib ge ǁîga ǂûǁae-e ge dība, o gu ge ǂû tsî ge ā.

³¹Tsî gu ge ǃnauǁgoaga khâi tsî ge nūbagu; ǁnās khaoǃgâb ge Isaka ǁîna ge ǃgû kai, tsîn ge ǂkhîb ǃnâ ǁîba xu ge ǃgû.

³²Tsî i ge ǁnā tsēs ǁkhās ai ge ī, o gu ge Isaki di ǃgāga ge hā tsî tsaus, khao gu ges di ǃnaeǃkhais xa ge ǂhôa bi tsî ǁîb ǃoa: ǁGam-e ge ge go hō, ti ge mî.

³³Ob ge ǁîsa Sibas ti ge ǂgai, ǁnā-amagas ge ǁnā ǃāsa Bersebas ti ǀon hâ nētsēs kōse.

³⁴Tsî Esaub ge hakadisi kurixa ob ge Judits, Beerib, Hetiǁîb di ôas, tsî Basemats, Elonni, Hetiǁîb di ôas tsîra tarase ge ū.

³⁵Tsî ra ge ǁîra Isaki tsî Rebekas tsîra gagas di ǂgaotsûb ase ge ība i.