Read Khoekhoegowab Genesis 27 Bible Online

Genesis 27 - Khoekhoegowab bible

Genesis 27

¹Tsî i ge ge ī, Isaki ge kaira tsî mûra âb ge ǃkhaeo, mû ǁoab ge is kōse, ob ge Esaub, ǁîb di ôab kaiba ǂgai tsî ǁîb ǃoa: Ti ôatse, ti ge mî. Ob ge ǁîba: Mû, nē ta a, ti ge mî.

²Ob ge: Kō, ti ge mî, tita ge go kaira, ǀū ta ge a ti ǁōtsēsa.

³Îts ǁnâi ū sa ǃauxūn, sa ǁhōs tsî sa khās tsîna, îts ǃgarob ǃoa ǃgû, îts amǀnē-e ǃauba te re.

⁴Îts ǁkhoaxa ǂû-aina dība te re îts ǁîna ūhāba te re, î ta ǁîna ǂû; îs ti ǀomsa satsa ǀkhae, ǁō tama ta hâ hîa.

⁵Tsî Rebekas ge ge ǃgâǁnâ, Isaki ǁîb di ôab Esaub ǀkha gere ǃhoa ǃnubai; tsî Esaub ge ǃgarob ǃoa ǃgû hâ io, amǀnē-eb nî ǃauga, hā-ūb nîse,

⁶ǃnubais ge Rebekasa Jakob ǁîs di ôab ǀkha ǃhoa tsî ge mî: Kō, tita ge go ǁnâu, saob go Esaub sa ǃgâsab ǃoa ǃhoa ǃkhaisa, nēti ra mîse:

⁷Amǀnē-e ūhāba te re, îts ǁkhoaxa ǂû-aina ǂhomiba te re, î ta ǂû; o ta ge satsa ǃKhūb di ais aiǃâ nî ǀkhae ti ǁōb aiǃâ.

⁸Nēsi ǁnâi, ti ôatse, ǁnâu re ti domma mîmā tsi ta nîn hoan ǃnâ.

⁹ǃGû ǁnâi ǀgoan ǃoa îts ǁnāpa xu ǀgam ǃgâi pirirona ūhāba te re, o ta ge tita ǁîna saoba ǁkhoaxa ǂû-aise nî dība, ǂgaob ra khami.

¹⁰Ots ge satsa ǁî-e saoba nî ūsība, ob ge nî ǂû, ǀkhae tsib nîga ǁōb âb aiǃâ.

¹¹ǃNubaib ge Jakoba ǁgûs Rebekas ǃoa ge mî: Kō, ti ǃgâsab Esaub ge a ǀûxaǀkhā tsî tita ge a ǂkhanu khoe;

¹²ǀnîsib ge ti îba tita nî tsânana, o ta ge gāxaǃnâ-aose ǁîb mûǁae nî ī; ǃnubai ta ga ǀâxare-e ti ai hā kai ǀkhaeb amǃnâs ai.

¹³Os ge ǁgûsa ǁîb ǃoa ge mî: Ab sa ǀâxareba ti ai hā, ti ôa, ǁnâus ǀguisa hîba ti domma îts ǃgû, îts ǁîna ūhāba te!

¹⁴Ob ge ǃgû tsî ǁîna ū tsî ǁgûsa ge ūhāba; tsî ǁgûs ge ǁkhoaxa ǂû-aina ge dī, ǁgûb ra ǂgao khami.

¹⁵ǁNās khaoǃgâs ge Rebekasa ǃgomǀgausa saran Esaub, ǁîs ôab kaib din, ommi ǃnâs ǁîs ǀkha ūhâna ū tsî ǁîna Jakob, ǁîs di ôab ǂkhamma ge ǂgaeǂgā.

¹⁶Tsî khōn piriron dinas ge ǃomkha âb tsî ǃaob âb di ǂkhanu ǃkhaisa ge anaǂamū.

¹⁷Tsîs ge ǁkhoaxa ǂû-ain tsî pereb tsîn, hîas goro dīna Jakob, ǁîs ôab di ǃomǁaeb ǃnâ ge mā.

¹⁸Ob ge ǁgûb tawa sī tsî: Ti îtse, ti ge mî. Ob ge ǁîba: Mû nē ta a; tarits a satsa, ti ôa? ti ge mî.

¹⁹Ob ge Jakoba ǁgûb ǃoa ge mî: Tita ge Esauta, sa ǂguroǃnaesabeta; tita ge go dī, sats go mîmā te khami; ǂnûkhâi îts ti amǀnē-i xa ǂû re, îs sa ǀomsa tita ǀkhae!

²⁰ǃNubaib ge Isaka ǀgôab âb ǃoa ge mî: Okha, mati i ī, ots ǁnātikōse ǃhaese hō hâ, ti ôa? Ob ge: ǃKhūb sa Elob kom ǁî-e ti aisa go ǃgûǃoa kaio, ti ge mî.

²¹Ob ge Isaka Jakob ǃoa ge mî: ǀGū tsigo ti ôa, î ta tsânana tsi, isets a amase ti ôa Esau ǃkhaisa, isets ǁî tama ǃkhaisa.

²²ǃNubaib ge Jakoba Isaki, ǁgûba, ge ǀgū, ob ge ge tsânana; ob ge: Dommi ge Jakob di domma, xawe ǃomkha ge Esaub di ǃomkha, ti ge mî.

²³Xaweb ge ǂan bi tama ge i, ǃomkha âb ge ǃgâsab âb di ǃomkha khami ǀûxa i xui-ao; ob ge ge ǀkhae bi.

²⁴Ob ge: Ti ôa Esauts ǂûtsa ǁnâi satsa? ti ge mî. Ob ge: ǁÎ ta komo, ti ge mî.

²⁵ǃNubaib ge ǁîba ge mî: Ūhāba te ǁnâi ǀgūse, î ta ti ôab di amǀnē-i xa ǂû, îs ti ǀomsa ǀkhae tsi! Ob ge ǁî-e ǀgūse ge ūsība bi, tsîb ge ge ǂû; ob ge ǂauxûib xa ǁkhāti ge ūhā tsîb ge ge ā.

²⁶Tsî Isaki, ǁgûb, ge ǁîb ǃoa ge mî: Hā îts ǁoa te re, ti ôa!

²⁷Ob ge ǃgûsī tsî ge ǁoa bi; ǃnubaib ge saran âb di ǁamaba ǃkhao tsî ǁîba ge ǀkhae; ob ge ge mî: Mû, ǁamab ti ôab dib ge ǁnā ǃaub ǃKhūb xa ǀkhaehe hâb di ǁamab khami ī.

²⁸Îb ǁnâi Eloba satsa mā ǀhommi di ǀaub xa, tsî ǃhūbaib di kaub xa tsî ǂguib ǃhorob tsî ǂkhon ǂauxûib tsîkha dib xa.

²⁹ǁAedi ge satsa nîra ǃoaba, tsî ǃhaodi ge sa aiǃâ nîra ǃhonǁgoa; îts ǃkhūse ī sa ǃgâsagu ǂamai, î gu saos di ôaga sa aiǃâ ǃhonǁgoa! A-i ǀâxarexūhe satsa ra ǀâxarexū-e, î-i ǀkhaehe satsa ra ǀkhae-e!

³⁰Tsî i ge ge ǃnae, Isaki ge Jakoba ǀkhaetoao, o i ge ge ī ǀaseb Jakoba ǁgûb Isaki di aisa xu ǃgûǂoa hâ hîab ge Esaub, ǁîb di ǃgâsaba ǃausa xu hā ǃkhaisa.

³¹Ob ge ǁkhāti ǁîba ǁkhoaxa ǂû-aina ǂhomi tsî ǁgûba ūsība tsî ǁgûb ǃoa ge mî: Ti îtse, ǂnûkhâi îts ǂû re sa ôab di amǀnē-i xa, îs sa ǀomsa tita ǀkhae re!

³²Ob ge Isaki ǁgûb âba ǁîb ǃoa ge mî: Tarits a satsa? Ob ge: Tita ge sa ôata, sa ǂguroǃnaesata, Esauta, ti ge mî.

³³ǃNubaib ge Isaka kaise kai ǃhurib ǀkha îbe ǃhuri tsî ge mî: Tariba kha ǁnāb, amǀnē-e ǃau tsî go tita ǃoa ūhāba? O ta ge hoan xa go ǂû, sats go hās aiǃâ, tsî ta go ǀkhae bi, tsîb ge ǁkhāti ǀkhaehe hâse nîra hâ.

³⁴Esaub ge nē mîdi ǁgûb dide ǁnâuo, ob ge kai tsî au ǃau-i ǀkha ge ǃau, ama ǀkhomǀkhomsase; ob ge ǁgûb ǃoa: ǀKhae te re, tita ona ǀkhae re, ti îtse! ti ge mî.

³⁵Ob ge: Sa ǃgâsab ge gāxaǃnâsib ǀkha hā tsî sa ǀkhaeba go ūbē, ti ge mî.

³⁶ǃNubaib ge ǁîba ge mî: ǁÎ ǃkhaisa xu tamasa kha, ǀons âb Jakob ti ra ǂgaihesa, ob ge ǀnai ǀgam ǃnāra kōse go gā te? Ti ǂguroǃnaesisab ge ge ūǀhana te, tsî kō, nēsib ge ǁkhāti ti ǀkhaeba go ū! Ob ge: Okha, ǀkhae-ets ǁnâi ǃgau kaiba te tama hâ? ti ge mî.

³⁷Ob ge Isaka ǃeream tsî Esaub ǃoa ge mî: Mû, tita ge ǁîba ǃkhūse go mâiǂam tsi, tsî ǃgâsagu âb hoaga ta ge ǃgāse go mā bi; tsî ta ge ǁîba ǃhorob tsî ǂauxûib tsîkha go ǃnare. Tare-e ta ǁnâi satsa nî dība, ti ôa?

³⁸Ob ge Esauba ǁgûb ǃoa ge mî: Nē ǀgui ǀkhaeb ǀguibats kha ūhâ, ti îtse? ǀKhae te re, tita ona ǀkhae re, ti îtse! Ob ge Esauba dommi âba ǃhâkhâi tsî gere ā.

³⁹ǃNubaib ge ǁgûb âb Isaka ǃeream tsî ǁîb ǃoa ge mî: Mû ǃhūbaib di kausa ǃkhaidi osets ge satsa ǁanǃkhaise nîra ūhâ, tsî ǀgapiseba xuts ge ǀhommi di ǀaub ose nîra hâ.

⁴⁰Sa gôaba xuts ge nîra ûi, tsîts ge ǃgâsab âtsa nîra ǃoaba xawe i ge nîra ī, ôasasets ga gaosîseno, ots ge ǁîb di ǃnaoba sa ǃaoba xu nîra ǃhaebeǁnâ.

⁴¹Tsî Esaub ge Jakoba ǁnā ǀkhaeb, ǁgûb ge ǁîb ǀkha ǀkhae bib ǃaroma ge ǁkhan; ob ge Esauba ǂgaob âb ǃnâ ge mî: ǀGū di ge a ǃoatsēdi ti îb dide; ǃgam ta kom nîo ti ǃgâsab Jakoba.

⁴²Tsî nē mîdi Esaub, ǁîs ôab kaib didi ge Rebekasa ǂhôaheo, os ge sîsī tsî Jakob, ǁîs di ôab ǂkhamma ǂgaihā tsî ǁîb ǃoa ge mî: Kō, sa ǃgâsab Esaub ra ǁkhaeǂgaosen sats ǂama, ǃgam tsib nîse.

⁴³Nēsi ǁnâi, ti ôa, ti domma ǁnâu, îts khâi îts ǃhū re Harans ǁgā, Labanni, ti ǃgâsaba ǃoa,

⁴⁴îts ǁîb ǀkha ǀnî tsērode hâ re sa ǃgâsab di ǁgôasib nî toas kōse,

⁴⁵ǁaib sa ǃgâsab dib nî satsa xu oas kōse, tsî dī bits hâsab nî ǀurus kōse; ǃnubai ta nî sî, tsî ǁnāpa xu ū tsi; tare xū-i ǃaroma ta kha ǁnâi sakho hoakho nî ūǀhanahe ǀgui tsēs ǀguis ai?

⁴⁶Os ge Rebekasa Isaki ǃoa ge mî: Tita ge ǃoas ǀguisa ra hî, ti ûib xasa Hetiǁîdi ǃaroma. Jakob ga Hetiǁîdi xa tara-e ūo, naura nē ǃhūb di ôadi dira ī khami, tarexa ta kha ǁnâi nî ûi?