Read Khoekhoegowab Genesis 28 Bible Online

Genesis 28 - Khoekhoegowab bible

Genesis 28

¹ǃNubaib ge Isaka Jakoba ǂgai tsî ge ǀkhae bi; ob ge mîmā bi tsî: Kanaanni ǀgôadi xa tara-e tā ū! ti ge mî.

²Khâi îts ǃgûsī Padan-Aramǃhūǃâs ǁga Betueli, saos îb di ommi ǃoa, îts ǁnāpa tara-e ū Labanni, saos ǃgâsab di ôadi xa.

³Îb Elob Hoaǀgaixaba satsa ǀkhae, îb ǂûǂûxaǃnâ kai tsi, îb ǂguiǂgui tsi, îts ǂgui ǁae kai re!

⁴Îb ǁîba Abrahammi di ǀkhaeba satsa mā re, sats tsî sa suriba sa khaoǃgâ, îts ǀumixūse ūhâ re sa ǃgûkhoesis di ǃhūb ǃnâ, Elob ge Abrahamma māba.

⁵Nētib ge Isaka Jakoba ge sîbē, ǃgûsīb nîga, Padan-Aramǃhūǃâs ǁga, Labanni, Betueli Siriaǁîb di ôab, Rebekas Jakob tsî Esaub tsîkha îs di ǃgâsaba ǃoa.

⁶Tsî Esaub ge mûo, Isaki ge Jakoba ǀkhae tsî Padan-Aramǃhūǃâs ǃoa sîbē bi ǃkhaisa, ǁnāpab nî tara-e ūbasense, tsî ǀkhae bib ra hîab ge mîmā bi tsî: Tā tara-e ū Kanaanni ǀgôadi xa, ti mî ǃkhaisa,

⁷tsî Jakob ge ǁgûb tsî ǁgûs tsîra ǁnâuǀnam ge hâ i tsî Padan-Aramǃhūǃâs ǁga ǃgû ge hâ i ǃkhaisa,

⁸tsî Esaub ge mûo, Kanaanni ôadi ǁgûb mûǁae a tsū ǃkhaisa,

⁹ob ge Esauba Ismaeli ǃoa ǃgû tsî ūb hâ tarade ǃnā hâse ge ū, Mahalats, Ismaeli, Abrahammi ôab di ôas, Nebajoti di ǃgâsasa.

¹⁰ǃNubaib ge Jakoba Bersebasa xu ǂoa tsî Harans ǃoa ge ǃgû.

¹¹Ob ge ǃkhai-i tawa ge sī, ǁî-i aib ge ǁomǂkhai-e, sores ge ǂgâ hâ i xui-ao, ob ge ǀuidi ǁnā ǃās didi xa ū tsî ǁîsa ǂkhapise dībasen tsî ge ǁom ǁnā ǃās ai.

¹²Ob ge ge ǁhapo; tsî mû ǃapa-ūda-i ge ǃhūbaib ai ge mâihe hâ i, ǀams â-i ǀhommi kōse ra sī-e; tsî mû, ǀhomǃgāgu Elob digu ge ǁî-i ai gere ǃapa ka ǁgôaxa.

¹³Tsî mû ǃKhūb ge ǁî-i ai mâ tsî ge mî: Tita ge ǃKhūta, abob Abrahammi di Elota tsî Isaki di Elota. Nē ǃhūb ǁîb aits ǁomǁgoeba ta ge tita satsa nîra mā tsî sa suriba.

¹⁴Tsî sa surib ge ǃhūb di tsarab khami nîra ī, tsîts ge nîra khôaǂoa huriǂoasǀî, aiǂoasǀî, ǀapasǀî tsî ǃkhawagasǀî; tsî sa ǃnâ tsî sa surib ǃnâ di ge ǃhūbaib di ǃhaodi hoade nîra ǀkhaehe.

¹⁵Mû tita ge sa ǀkha nîra hâ, tsî tita ge satsa nîra sâu, mâǀîts ga ǃgûs hoasa, tsî tita ge satsa nē ǃhūb ǃoa ǁkhawa nîra ūhā: Tita ge ǁnāxū tsi tide, sa ǃoa ta goro ǃhoana ta nî dīs kōse.

¹⁶Tsî Jakob ge ǂoms âba xu ǃnoaǂkhaio, ob ge ge mî: Amaseb ge ǃKhūba nē ǃkhais ai hâ, tsî tita ge go ǀū i.

¹⁷Ob ge ǃao tsî ge mî: Matikōses a ǃaoǃaosa nē ǃkhaisa! Nēs ge ǀnî xū tama i, tsî a Elob om, tsî nēs ge dao-ams ǀhommi disa.

¹⁸ǃNubaib ge Jakoba ǃnauǁgoaga khâi tsî ǁnā ǀuis, ǂkhapis aseb go ǁgui hâ isa ū tsî ǂâiǂâisensaose ge ǂnûikhâi si tsî oli-i xa ǁîs ǂamǃnâ ge ǂnâ.

¹⁹Ob ge ǀons ǁnā ǃās disa Bet-Els ti ge ǂgai, aibes ge ǀons âsa Lus ti gere ǂgaihe xawe.

²⁰Tsî Jakob ge mîmâi-e ge mîmâi, mî raǃâ: Elob ga hâǀkhā te hâ io, tsîb ga tita ǃgû ta ra daob ai sâu hâ io, tsîb ga pere-i, ǂû ta nî-i, tsî saran, ana ta nîna mā te hâ io,

²¹tsî ta ga ti îb di ommi ǃnâ ǂkhîb ǀkha ǁarusī hâ io, ob ge ǃKhūba tita Elose nî ība.

²²Tsî nē ǀuis ǂâiǂâisensaose ta goro ǂnûikhâis, ǁîs ge nîra Elob om kai, tsî sats nîra mā te xūn hoan xa ta ge satsa amase disiǁî-e nîra mā.