Read Khoekhoegowab Genesis 29 Bible Online

Genesis 29 - Khoekhoegowab bible

Genesis 29

¹ǃNubaib ge Jakoba ǂaira âba ūkhâi tsî aiǂoas ǀgôan di ǃhūb ǃoa ge doe.

²Tsîb ge ge kō, tsî mû, ǂgâ-i ge ǃaub ǃnâ ge hâ i; tsî mû, ǃnona gūdi gūn didi ge ǁî-i xōǀkhā ra ǁgoe, ǁnā ǂgâsa xun ra āsihe xui-ao; tsî i ge kai ǀui-e ǂgâs di ams ai ge ǁgoe i.

³Tsî gūdi hoadi ge ǁnāpa gere ǀhaoǀhaohe, tsî gu ge ǀuisa ǂgâs di amsa xu gawabē tsî gūna gere āsi, tsî gu ge ǀuisa ǁkhawa ge ǁgui ǂgâs di ams ai, ǁîs di ǃkhais tawa.

⁴ǃNubaib ge Jakoba ǁîgu ǃoa: Ti ǃgâgo, mâ ǃās digo sago? ti ge mî. O gu ge ǁîga: Harans di ge ge sige, ti ge mî.

⁵Ob ge ǁîgu ǃoa: Labanni Nahori ôaba ǂan go a ǁîba? ti ge mî: O gu ge: ǂAn ge a, ti ge mî.

⁶Ob ge ǃaruǀî ǁîgu ǃoa: ǃGâibaheb a? ti ge mî. O gu ge: ǃGâibahe a; tsî kō ǁnās ǃgoaxa Raxels, ǁîb di ôasa, gūn ǀkha.

⁷Ob ge ǁîba: Ganupe a tsēxa, ǁae tamab ge nēba, ǁîb ain nî ǀgoana ǀhaoǀhaoheba; gūna āsi î go gūreǃgû, ti ge mî.

⁸ǃNubai gu ge ǁîga: ǁÎsa ge a dī ǁoa, gūdi hoadi ǀhao hâ tsî khoen nî ǀuisa ǂgâs di amsa xu gawabē hâs kōse, gūna ge nî āsiga, ti ge mî.

⁹Ganupeb ra ǁîgu ǀkha ǃhoa hîas ge Raxelsa gūn ǁîs îb din ǀkha ge hā, ǃûi-aos a amaga;

¹⁰tsî i ge ge ǃnae, Jakob ge Raxels, Labanni ǁîb îs ǃgâsab ôasa mûo, tsî gūn Labanni, ǁîb îs ǃgâsab dina, ob ge Jakoba dāsī tsî ǀuisa ǂgâs di amsa xu gawabē tsî Labanni ǁîb îs ǃgâsab di gūna ge āsi.

¹¹Tsî Jakob ge Raxelsa ge ǁoa, tsîb ge dommi âba ǃhâkhâi tsî ge ā.

¹²Tsî Jakob ge Raxelsa ge ǂanǂan, ǁîs îb di ǃgâsab tsî Rebekas di ôab a ǁî ǃkhaisa, os ge ǁîsa ǃkhoe tsî ǁgûba sī ge ǂanǂan.

¹³Tsî i ge ge ī, Labanni ge Jakob ǁîb ǃgâsas ôab xa ǁnâuo, ob ge ǁîba ge ǃkhoeǃoa, tsîb ge ǁnam tsî ge ǁoa bi, tsî ǁîb ommi tawa ge ūsī bi. ǃNubaib ge ǁîba nē ge ǃnae xūn hoana Labanna gere ǃhoaba.

¹⁴Ob ge Labanna ge mîǀî bi: Amase, sats ge a ti ǂkhō tsîts ge a ti ǁgan! Tsîb ge ǀoasa ǁkhâba ǁîb ǀkha ge hâ.

¹⁵ǁNās khaoǃgâb ge Labanna Jakob ǃoa ge mî: Ti ǃgâsats a amagats kha ǁnâi ǁause nî sîsenba te? Mîba te re, mâ amǃnâ-ets ra ǂgao ǃkhaisa.

¹⁶Tsî Labanni ge ǀgam ǀgôara ge ūhâ i; kais ge Lea ti ge ǀon hâ i tsî ǂkhams ge Raxel ti ge ǀon hâ i.

¹⁷Tsî Leas ge ǂkhabusa mûra ge ūhâ i, xawe Raxels ge îsa ǀkhās tsî îsa aisa ge ūhâ i.

¹⁸Tsî Jakob ge Raxelsa ǁâ tsî ge mî: Tita ge hû kurigu kōse nî ǃoaba tsi Raxels sa ôas ǂkhams ǃaroma.

¹⁹ǃNubaib ge Labanna ge mî: ǃGâiba te a satsa ta ǁîsa nî māsa, ǀkhara khoeba ta nî mā sis xa; hâǀkhā te re!

²⁰Nētib ge Jakoba Raxels ama hû kuriga gere ǃoaba bi; tsî ǁîgu ge ǁîb mûǁae ǀnî tsērodi khami ge ī, ǁâ sib hâ amaga.

²¹ǃNubaib ge Jakoba Labanni ǃoa ge mî: Ti tarasa mā te re, ti tsēdi go ǀoa xuige; î ta ǁîs tawa ǂgâ re!

²²Ob ge Labanna ǁnā ǃās di aogu hoaga ǀhaoǀhao tsî ǂûǁae-e ge dī.

²³Tsî i ge ǃuia ge ī, ob ge ǁîb di ôas Leasa ū tsî ǁîb tawa ge ūhā si; ob ge ǁîs tawa ge ǂgâ.

²⁴Tsî Labanni ge ǃgās âb Silpasa ǁîb di ôas Leasa ǃgāse ge mā.

²⁵Tsî i ge ǃnauǁgoaga ge ī, tsî mû, os ge Lea go i. ǁNā-amagab ge Labanni ǃoa ge mî: Okha, tare xū-e kha sats go dī te-e? Raxels ama ta kha ǃoaba tsi tama hâ? Tarexats ǁnâi go gā te?

²⁶Ob ge Labanna ge mî: Nē ǃās sida dis ai dīhe tama ǃkhais ge nēsa, ǂkhams ra ǂguroǃnaesabes aiǃâ māǂuihesa.

²⁷Nēs di wekheba dīǀoaǀoa, o da ge sida ǁîs ona nî mā tsi, ǃoabas hîats nî ǁkhawa hû kuriga ǃoaba tes ǃaroma.

²⁸Ob ge Jakoba ǁnāti ge dī; tsîb ge ǁîs di wekheba ge dīǀoaǀoa. ǃNubaib ge Raxels, ǁîb di ôasa, tarase ge mā bi.

²⁹Tsî Labanni ge ǁîb di ǃgās Bilhasa ǁîb di ôas Raxelsa ǃgāse ge mā.

³⁰Ob ge ǁkhāti Raxels tawa ge ǂgâ; tsîb ge Raxelsa Leasa ǃnā hâse ǀnam hâ ge i; tsîb ge ǁkhawa ǀnî hû kuriga gere ǃoaba bi.

³¹Tsî ǃKhūb ge mûo, Leas ra ǁkhanhe ǃkhaisa, ob ge ǁîsa ǁhāsa ge khowaba; xawe Raxels ge ǁora tama ge i.

³²Tsî Leas ge ǀgamǀkhā tsî ǀgôaba ge ǁora, tsîb ge Ruben ti ge ǂgai bi; nētis ge mî xui-ao: ǃKhūb ge ti ǁgâiǀāba ge mû amagab ge ti aoba nēsi nî ǀnam te.

³³Tsîs ge ǁkhawa ǀgamǀkhā tsî ǀgôaba ǁora tsî ge mî: ǃKhūb ge ǁkhanhe ta hâsa ge ǁnâu amagab ge ǁkhāti nē ǀgôaba go mā; tsîs ge Simeon ti ge ǂgai bi.

³⁴Tsîs ge ǁkhawa ǀgamǀkhā tsî ǀgôaba ǁora tsî ge mî: Nēsib ge nē ǃnās ai ti aoba tita nî ǁaeǁaesen, ǃnona ǃnādi kōse ta go ǀgôaga ǁoraba bi xui-ao; ǁnā-amagas ge Levi ti ge ǂgai bi.

³⁵Tsîs ge ǁkhawa ǀgamǀkhā tsî ǀgôaba ǁora tsî ge mî: Nē ǃnās ai ta ge ǃKhūba nî ǃkhōǀkhā; ǁnā-amagas ge Juda ti ge ǂgai bi. Tsîs ge ge ǁoraǀû.