Read Khoekhoegowab Genesis 3 Bible Online

Genesis 3 - Khoekhoegowab bible

Genesis 3

¹Tsî ǀaob ge ǃaub di ǀgurun ǃKhūb Elob ge dīn hoan ǂamai gāxaǃnâ ge i, tsî taras ǃoa ge mî: O kha, mîb ge xare Eloba: Saro ge ǂû tide mâ hai-i nē ǃhanab di-i hoa-i xa, ti?

²Os ge tarasa ǀaob ǃoa ge mî: Sim ge ǂûn nē ǃhanab ǃnâ hâ haidi din xa ra ǂû;

³xawe ǂûn nē ǃhanab ǁaegub ǃnâ hâ hais din xab ge Eloba ge mî: ǁÎn xa tā ǂû, î ro ǁîna ǁkhāti tā tsâǀkhā, ǁō ro tidega.

⁴Ob ge ǀaoba taras ǃoa ge mî: Tātsē ro kom ǁō tideo;

⁵xawe Elob ge a ǂan, ǁîs xa ro ga ǂû tsēsa xu di saro di mûde nî khowahe ǃkhaisa, o ro ge Elob ǁkhāb khami nî ī, tsî ro ge nî ǂan mâ-i a ǃgâi tsî mâ-i a ǂkhaba ǃkhaisa.

⁶Os ge tarasa ge mû hais xa ǂûs a ǃgâi tsî ǃgapaǀîs a ǀnamǀnamsa ǃkhaisa, tsî turahesa hais asa, gā-ai kais ra amaga; os ge ǂûs xa ū tsî ge ǂû; tsîs ge aob tsîna ge mā tsîb ge ge ǂû.

⁷ǃNubai di ge ǁîra di mûde ge ǁkhowa-amsen, tsî ra ge ge ǂan ǀōkhāse ra hâsa, o ra ge ǀnomahais di ǁnâuga ǂâǁae tsî ǃgaera ge dībasen.

⁸Tsî ra ge ǃKhūb Elob di domma ge ǁnâu, ǃhanab ǃnâ ra ǃgûmaba tsēs di ǂoab ǃnâ. Ob ge Adamma ǁîb di taras ǀkha ǃKhūb Elob di aisa xu ge gaugausen ǃhanab di haidi ǁaegu.

⁹Ob ge ǃKhūb Eloba Adamma ǂgai tsî ǁîb ǃoa: Mapats hâ? ti ge mî.

¹⁰Ob ge ge mî: Sa domma ta go ǃhanab ǃnâ ǁnâu, o ta go ǃao, ǀōǀkhāse ta hâ xui-ao; ǁnā-amaga ta ge go gau.

¹¹Ob ge Eloba ge mî: Tari-e go ǂanǂan tsi, ǀōǀkhāts a ǃkhaisa? ǂÛ tamats xare hâ ǁnā hais, ǃkhâi tsi ta ges tsî ǁîs xats ǂû tide ti ta ge mîs xa?

¹²Ob ge Adamma ge mî: ǁNā taras sats ge mā tes ge hais xa go mā te, o ta ge go ǂû.

¹³Ob ge ǃKhūb Eloba taras ǃoa ge mî: Tare xū-i ǃaromas ǁîsa go dī? Os ge tarasa: ǀAob go gā te o ta ge go ǂû, ti ge mî.

¹⁴ǃNubaib ge ǃKhūb Eloba ǀaob ǃoa ge mî: Nēsats go dī amagats ge ǀâxarexūhe hâ ǀgoan hoan ǂamai tsî ǀgurun ǃhūb din hoan ǂamai. Sa ǃnāb ai ǂhana tsîts nî tsaraba ǂû sa ûitsēdi hoade.

¹⁵Tsî tita ge ǃhuigusa nîra ǂnûiǂgā sats tsî taras tsîro ǁaegu, sa surib tsî ǁîs di surib ǁaegu. ǁÎb ge sa danasa nîra ǂkhūǂkhū tsî sats ge ǁîb ǃnôara nîra ǂkhūǂkhū.

¹⁶Tsî taras ǃoab ge ge mî: Sa tsûna ta ge tita kaise nîra ǂguiǂgui, ǀgamǀkhās ka ǃnubai, tsûb ǀkhas ge ǀgôana nîra ǁora; tsî ǁkhoreb âs ge aobǀî nî hâ tsîb ge ǁîba nî sa ǃkhū.

¹⁷Tsî Adammi ǃoab ge ge mî: Sa taras di dommats go ǃgâ tsî ǃkhâi tsi ta ge hais, ǁîs xats ǂû tide ti ta ge mîs xats go ǂû amagab ge ǃhūba ǀâxarexūhe hâ sats ǃaroma; ǂhansendi ǀkhats ge ǁîba xu nîra ûi, sa ûitsēdi hoade;

¹⁸tsîb ge ǁkhāti ǁkhūn tsî ǀgamen tsîna nîra ūǀkhība tsi, tsîts ge ǁhaon ǃhūb dina nîra ǂû.

¹⁹Sa ais di aosenni ǃnâts ge sa pereba nîra ǂû, ǁkhawats nî ǃhū kais kōse, ǁîba xuts ūhe hâ amaga; tsarats kom satsao, tsîts kom ǁkhawa nîra tsara kaio.

²⁰Ob ge Adamma taras âba Evas ti ge ǂgai, ûitsaman hoan di îs a amaga.

²¹Tsîb ge ǃKhūb Eloba Adammi tsî taras âb tsîra khōsarana dība tsî ǁîna ǁîra ge ana.

²²ǃNubaib ge ǃKhūb Eloba ge mî: Mû, khoeb ge sige di ǀguib khami go ī, ǃgâib tsî ǂkhabab tsîkhab go ǂans ǀkha. ǁNâi ǃomma ǀhōǂui tsîb ûib di hais xa ū tsî ǂû tsî ǀamose ûi tide

²³amagab ge Eloba ǃhanab Edens diba xu ge sîǂui bi, ǃhūbab nî sîsense, ǁîba xub ge ūheba.

²⁴Ob ge ǁîba khoeba doeǁgaǂui tsî xeruga ge mâi aiǂoas Edens ǃhanab dis ai, tsî ǁhabub khami ra gon gôab, dawaǃkhunisen raba, ûib di hais ǃoa gau daoba gu nî ǃûise.