Read Khoekhoegowab Genesis 30 Bible Online

Genesis 30 - Khoekhoegowab bible

Genesis 30

¹Tsî Raxels ge mûo, Jakobas ǁoraba tama hâ ǃkhaisao, os ge Raxelsa ǃgâsas âsa ge suri; os ge Jakob ǃoa: ǀGôana mā te, ǁnā tamas ka io, o ta nî ǁō, ti ge mî.

²ǃNubaib ge ǁaib Jakob diba Raxels ǃoagu ge khâi, tsîb ge ge mî: Elob ǃās ǃnâ ta kha tita hâ, o ta sa ǃnāb di ǂûtaniba ǂkhā si hâ?

³Os ge ge mî: Mû nēs hâ ti ǃgās Bilhasa, ǂgâ re ǁîs tawa, îs ti ǁgoakha ai ǁora, î ta tita ona ǁîsa xu ǀgôahōbasen.

⁴Nētis ge ǁîba ǁîs di ǃgās Bilhasa tarase ge mā, tsî Jakob ge ǁîs tawa ge ǂgâ.

⁵Os ge Bilhasa ǀgamǀkhā tsî Jakoba ǀgôaba ge ǁoraba.

⁶ǃNubais ge Raxelsa ge mî: Elob ge tita ge ǀgoraǃgâ, tsîb ge ti domma ǁnâu tsî ǀgôaba go mā te; ǁnā-amagas ge Dan ti ge ǂgai bi.

⁷Tsî Bilhas Raxels di ǃgās ge ǁkhawa ǀgamǀkhā tsî Jakoba ǀgamǁî ǀgôaba ge ǁoraba.

⁸ǃNubais ge Raxelsa ge mî: Tita ge elosi ǂnoagu-aide ti ǃgâsas ǀkha goro ǂnoagu, tsî ta ge go dan; os ge Naftali ti ge ǂgai bi.

⁹Tsî Leas ge mûo, ǁoratoas go ǃkhaisa, os ge ǁkhāti ǁîs di ǃgās Silpasa ū tsî ǁîsa Jakoba tarase ge mā.

¹⁰Os ge Silpas, Leas di ǃgāsa Jakoba ǀgôaba ge ǁoraba.

¹¹ǃNubais ge Leasa ge mî: ǂGuib ra hā tsîs ge Gad ti ge ǂgai bi.

¹²ǁNās khaoǃgâs ge Silpas Leas di ǃgāsa Jakoba ǀgamǁî ǀgôaba ge ǁoraba.

¹³ǃNubais ge Leasa ge mî: ǃGâiǃgâ ta a, ǀgôadi ge ǃgâiǃgâse nî ū te amaga; tsîs ge Aser ti ge ǂgai bi.

¹⁴Tsî Rubenni ge ǃhorob ǃgaoǁaeb ai ǃgû tsî ǃaub ai dudaimǂûn xa hō tsî ǁîna ǁîb îs Leasa ge ūhāba. Os ge Raxelsa Leas ǃoa: Au te si go sa ôab di dudaimǂûn xa, ti ge mî.

¹⁵Os ge ǁîs ǃoa ge mî: ǂÂuba si tama i kha hâ ti aobas ge ūǀhana te ǃkhaisa, os ti ôab di dudaimǂûna ǁkhāti nî ū? ǃNubais ge Raxelsa ge mî: Ab ǁnâi nē tsuxub ǃnâ sa ôab di dudaimǂûn ǃaroma sa tawa ǁgoe.

¹⁶Tsî Jakob ge ǃuia ǃgaroba xu hāo, os ge Leasa ǁîba ǃgûǃoa tsî ge mî: Ti tawats ge nî hāǂgâxa; tita ge amase amǃnâ-i ǀkha go ǃgae tsi ti ôab di dudaimdi ǃaroma xuige. Ob ge ǁnā tsuxub ǃnâ ǁîs ǀkha ge ǁgoe.

¹⁷Tsî Elob ge Leasa ge ǁnâu-am, os ge ǀgamǀkhā tsî Jakoba koroǁî ǀgôaba ge ǁoraba.

¹⁸ǃNubais ge Leasa ge mî: Elob ge tita ti amǃnâsa go mā, ti ǃgāsa ta ge ti aoba mās khaoǃgâ; os ge Isaskar ti ge ǂgai bi.

¹⁹Tsî Leas ge ǁkhawa ǀgamǀkhā tsî Jakoba ǃnaniǁî ǀgôaba ge ǁoraba.

²⁰Os ge Leasa ge mî: Elob ge tita, ā titab ge ǃgâi hō-e go ǀkhae; nē ǃnās aib ge ti aoba tita ǀkha nî ǁaeǁaesen, ǃnani ǀgôaga ta ge ǁoraba bi xui-ao. Os ge Sebulon ti ge ǂgai bi.

²¹Tsîs ge ǁnās khaoǃgâ ǀgôasa ǁora tsî Dina ti ge ǂgai si.

²²Tsî Elob ge ǁkhāti Raxels xa ge ǂâi; tsî Elob ge ǁîsa ǁnâu-am tsî ǁhās âsa ge khowa.

²³Os ge ǀgamǀkhā tsî ǀgôaba ge ǁora; os ge: Elob ge ti ǃharaxūba go ūbē, ti ge mî.

²⁴Os ge Joseb ti ge ǂgai bi, mî raǃâ: Ab ǃKhūba ǀnî ǀgôaba ǀaroba te.

²⁵Tsî i ge ge ī, Raxels ge Joseba ǁorao, ob ge Jakoba Labanni ǃoa ge mî: A ta doe re î ta ti ǃās ǃoa ǃgû tsî ǃhūb ǃoa.

²⁶Mā te re ti tarara tsî ti ôan, ǁîn ǃaroma ta gere ǃoaba tsina, î ta doe; ǂants a ti ǃoabas satsa ta gere ǃoabasa xuige.

²⁷ǃNubaib ge Labanna ǁîb ǃoa ge mî: ǀKhomma î ta ga hō sa mûǁae, tita ge hōǃâ hâ ǃKhūb sats ǃaroma ge ǀkhae te ǃkhaisa.

²⁸Ob ge ge mî: Sa sîsenamǃnâsa mîǃāba te, o ta nî mā tsi.

²⁹ǃNubaib ge ǁîb ǃoa ge mî: Sats ge a ǂan mati ta gere ǃoaba tsi tsî matin ge sa ǀgoana ti tawa hâ i ǃkhaisa.

³⁰ǁNā ǀororon ti aiǃâts ge ūhâ in ǁîn ge ge ǂgui kai; tsî ǃKhūb ge ti ǂais ǀkha ge ǀkhae tsi; tsî nēsi ǁnâi mâ ǁae ta kha ti omma nî sîsenba?

³¹Ob ge ge mî: Tare-e ta nî mā tsi? ǃNubaib ge Jakoba ge mî: Xū-i xare-ets ge mā te tide, xawe nē ǃkhaisats ga dīo, o ta ge sa gūna ǁkhawa nî ǃûsi tsî nî kōǃgâ.

³²Tita ge nētsē sa gūn hoana ǃgûǃnâǃganu tsî nî khai ǀgarun tsî ǁganin hoan tsî ǂnūn ǀgoan ǁkhaon ǃnâ tsî ǁganin tsî ǀgarun hoan piridi ǃnâ, tsî ǁîn ge nî ti amǃnâ.

³³Ob ge ti ǂhanu-aisiba aetsē nîra ǀhûǀguitimîba te, ti amǃnâs hîa sa ais aiǃâ hâs ǂamats ga hā ǃnubai: ǀGaru taman tsî ǁgani taman hoan, piridi ǃnâ hân, tsî ǂnū taman hoan ǁkhaon ǃnâ, an ǁîna ǃnarixūse ti tawa ī.

³⁴ǃNubaib ge Labanna: Aio a-i ī sats go mî khami, ti ge mî.

³⁵Ob ge Labanna ǁnā tsēs ǁkhās ai anxa tsî ǁgani piriga ge khai, tsî ǀgaru tsî ǁgani piridi hoade, tsî ǃuri ǃkhaidi â-in tsî ǂnūn hoana ǁkhaon ǃnâ; tsîb ge ǁîna ǁîb ôagu ǃomǁae ge mā.

³⁶Tsîb ge ǃnona tsēdi di daob kōse ge mâi ǁîb tsî Jakob tsîkha ǁaegu; tsî Jakob ge ǃgau ge gūdi Labanni dide gere ǃûi.

³⁷Ob ge Jakoba ǃam haiǂgonaga ge ū populir, haselar tsî kastanihaiǃnôan xa; tsîb ge ǁîdi ǃnâ ǃuri ǁgarade gere ǃgao, ǃuri ǃkhaidi ǁnā haiǂgonagu tawa hâdi ge ǂhais kōse.

³⁸Tsîb ge ǁnā haiǂgonagu hîab ge ǃgaoga dâuǃkhaidi tsî ǁgamxa āǃoregu, hîan gūna ǁîgu ǃnâ hā ra āgu ǃnâ ge ǁgui, gūn ǃoa-ai; on ge ge ǀgam, ān gere hā ǃnubai.

³⁹Tsî gūn ge haiǂgonagu tawa ǀgamo, on ge gūna anxa, ǀgaru tsî ǁganina ge ôa.

⁴⁰ǃNubaib ge Jakoba ǁkhaona ge ǀgora, tsîb ge gūn di aide anxan ai ge ǂnûi tsî ǂnūn hoan ai Labanni di gūn ǃnâ; tsîb ge gūn âba ǀguri ge mâi, tsîb ge ǁîna Labanni gūn tawa mâi tama ge i.

⁴¹Tsî i ge ge ī, ǀasen gūn di ǀgaisana ra ǀgam, hîab ge Jakoba haiǂgonaga gūn mûǁae āǃkhaidi ǃnâ gere ǁgui, haiǂgonagu tawan nî ǀgamse.

⁴²Xawe gūn ga ǂkhabusao, ob ge ǁîga ǁgui tama ge hâ i; ǁnātin ge ǂkhabusana ge Labanni di kai, tsîn ge ǀgaisana ge Jakob di kai.

⁴³Nētib ge nē khoeba îbe ge ǃkhū, tsîb ge ǂgui gūn, ǃgādi, ǃgāgu, ǃnain tsî eseln tsîna ge ūhâ i.