Read Khoekhoegowab Genesis 31 Bible Online

Genesis 31 - Khoekhoegowab bible

Genesis 31

¹ǃNubaib ge ǁîba Labanni ôagu di mîde ge ǁnâu, hîa ra mîga: Jakob ge sige îb din hoana ge ū, tsî sige îb di xūna xub ge nē ǃkhūsib hoaba ge dībasen.

²Tsî Jakob ge ǁkhāti Labanni di aisa ge kōǀî, tsî mû ǁîs ge ǁîbǀî ǁari tsî aetsēs ge ī i khami ī tama ge i.

³Ob ge ǃKhūba Jakob ǃoa ge mî: Oa ǁkhawa sa aboxan ǃhūba ǃoa tsî sa ǀaokhoena ǃoa, tsî tita ge sa ǀkha nîra hâ.

⁴ǃNubaib ge Jakoba sîsī tsî Raxels tsî Leas tsîra ge ǂgai kai ǃgarob ai gūn âb tawa.

⁵Tsîb ge ǁîra ǃoa ge mî: Tita ge saro îb di aisa ra mû, titaǀîs ge ǁari tsî aetsē ī i khamis ī tama ǃkhaisa; xawe Elob ti îb dib ge tita ǀkha hâ ge i.

⁶Tsî saro ge a ǂan, ti ǀgaib hoab ǀkha ta ge saro îba gere sîsenba ǃkhaisa.

⁷Xawe saro îb ge gāxaǃnâsise ge sîsenū te, tsîb ge ti amǃnâsa disi ǃnādi kōse ge ǀkharaǀkhara; xawe Elob ge ǁîba mā-am tama ge i, tsūdī teb nî ǃkhaisa.

⁸Nētib ge ǁîba mîo: ǀGarun ge nî sa amǃnâ, o di ge gūdi hoade ǀgaruna ge ôa, tsî nētib ge ǁîba mîo: Anxan ge nî sa amǃnâ, o di ge gūdi hoade anxana ge ôa.

⁹Nētib ge Eloba saro îba ǀgoana ūǀhana tsî tita ge mā.

¹⁰Tsî i ge ge ī, pirin ge ǀgam ǁaeb ai ta ti mûra ge ǃhâkhâi ǃkhaisa, tsî ta ge ǁhapos ǃnâ ge mû; tsî kō, pirigu piride ra ǃapagu ge anxa tsî ǀgaru tsî ǁgani ge i.

¹¹Tsî ǀhomǃgāb Elob dib ge tita ǃoa ǁhapos ǃnâ: Jakotse! ti ge mî. O ta ge tita: Mû, nē ta a, ti ge mî.

¹²Ob ge ge mî: ǃGapakhâi îts kō: Pirigu hîa piride ra ǃapagu hoagu ge a anxa tsî ǀgaru tsî ǁgani, tita ge Labanni ra dī-ū tsi xūn hoana go mû xui-ao.

¹³Tita ge ǁnā Elota, Bet-Els, hîats ge ǁîs ai ǂnûikhâihesa saosa ǂkhauǀkhāba tes tsî mîmâi-e ge mîmâiba tes di ta. Nēsi khâi îts nē ǃhūba xu doe îts ǁkhawa oa sa ǀaokhoexasis di ǃhūba ǃoa.

¹⁴ǃNubai ra ge Raxels tsî Leas tsîra ǃeream tsî ǁîb ǃoa ge mî: Ūm hâ xare sima amǃnâ-e tsî ǀumi-e sim îb di ommi ǃnâ?

¹⁵ǃHao khoesem xare ǁîb xa ǃgôahe tama hâ? ǁÎb kom sima ge ǁamaxūo, tsîb kom ǁkhāti hugaǀgui sim di mariba ge hapuo.

¹⁶ǁNā ǃkhūsib Elob ge sim di îba ūǀhanab hoab ge a sada di tsî sada ôagu di; dī ǁnâi ǁnān Elob ge mîba tsin hoana.

¹⁷ǃNubaib ge Jakoba khâi tsî ǁîb di ôagu tsî ǁîb di tarara tsîna ǃnain ai ge ǃnao.

¹⁸Tsîb ge ǀgoan âb hoan tsî ūb hâ xūn hoan, tsî ǁnā ǀgoan, ūb hân Padan-Aramǃhūǃâs ǃnâb ge ǃoaǂuibasena ge ūǃgû, Isaki ǁgûb tawab nî sīga Kanaanǃhūb ǃoa.

¹⁹Tsî Labanni ge ge ǃgû hâ i ǁîb di gūna nî ǂkhomse ǃnubais ge Raxelsa ǁgûb ūhâ omelona ge ǀâbasen.

²⁰Tsî Jakob ge Labanni, Siriaǁîb di ǂgaoba ge ǀâsen, ǁhâb ra ǃkhaisab ge ǂanǂan bi tama is ǀkha.

²¹Ob ge ge ǃhū, ūb hân hoan ǀkha tsîb ge khâi tsî ǃāba ǃgâu tsî ais âba Gileadǃhommi ǃoa ge unu.

²²Tsî ǃnonaǁî tsēs aib ge Labanna ge ǂhôabahe Jakob go ǃhū ǃkhaisa.

²³Ob ge ǃgâsagu âba ūǀhao tsî ǁîba ge sauruǃgon hû tsēdi daob kōse, tsîb ge ǁîba Gileadǃhomgu ai ge saoǁae.

²⁴Xawe Elob ge Labanni Siriaǁîb tawa tsuxuba ge hā ǁhapo-i ǃnâ, tsîb ge ǁîb ǃoa ge mî: ǂAnbasen îts Jakob ǀkha khoexasi dommi ǀguib ǃnâ ǃhoa!

²⁵Tsî Labanni ge Jakoba ge saoǁae; tsî Jakob ge tentoms âba ǃhommi ai ge ǂnaumâi hâ i ǃnubaib ge Labanni ona ǃgâsagu âb ǀkha tentoms âba Gileadǃhommi ai ge ǂnaumâi.

²⁶ǃNubaib ge Labanna Jakob ǃoa ge mî: Tare-ets go dī ots ti ǂgaoba go ǀâxūsen, ots ti ôara go ūbē ǃkhōsara ase gôab ǀkha?

²⁷Tare xū-i ǃaromasa kha ǁnâi ǂganǃgâsasets go ǁhâ tsî tita ûixūsa? Tsî tarexasa kha mîba te tamats hâsa, î ta ga ǁnū tsi hâ, ǃgâiaǂgaob ǀkha tsî ǁnaetsanadi ǀkha, tromels tsî harps tsîra ǀkha?

²⁸Tsî tarexasa kha ǁkhāti mā-am te tamats hâsa, ti ôadi tsî ti ôagu tsîna ǁoasa? Nēsits kom gârese go dīo.

²⁹Tsîs ga ti ǃomǁae hâ sado ta nî tsūdīsa; xawe ǁnā Elob sadu îb dib ge ǁari tsuxub ǃnâ tita ǀkha ǃhoa tsî go mî: ǂAnbasen îts Jakob ǀkha khoexasi dommi ǀguib ai ǃhoa.

³⁰Tsî nēsi ǁnâi sats ge go doe ǂgao hâ i, sa îb di ommats ǁkhore hâ amaga; tarexats kha ǁnâi ti eloga go ǀâbasen?

³¹Ob ge Jakoba ǃeream tsî Labanni ǃoa ge mî: ǃAo ta go amaga; nēti ta ra mî xui-ao: Îts ǀnîsi sa ôara tā ǀgaib ǀkha ǀâǀhana te.

³²ǁÎ-i tawats ga sa eloga hō khoe-e a-i tā ûi! Nēpa sakhom ǃgâsagu aiǃâ ti tawa hâ xū-i hîa sadu di-e hōǂui îts ǁî-e ū! Jakob kom ǀū ge io Raxels ge ǁîga ǃnaribasen ǃkhaisao.

³³ǃNubaib ge Labanna Jakob di tentoms ǃnâ ge ǂgâ tsî Leas di tentoms ǃnâ tsî ǃgāra di tentoms ǃnâ, xaweb ge xū-e hō tama ge i; tsî Leas di tentomsa xub ge ǂoaxa ǃnubaib ge Raxels di tentoms ǃnâ ge ǂgâ.

³⁴Tsî Raxels ge omelona ū tsî ǁîna ǃnaiǃgapi-ūxū-i ǃnâ ǁgui tsî ǁîn ai ge ǂnû. Tsî Labanni ge tentoms hoasa ge tsânana, xaweb ge xū-e hō tama ge i.

³⁵Tsîs ge ǁîsa ǁgûb ǃoa ge mî: Ti ǀhonkhoets di mûra a ra tā ǁaixa, sa ais aiǃâ ta a khâi ǁoa ǃkhaisa, taradi dommi ai ta hâ xuige. Ob ge ôaǃnâb ra xawe omelona hō tama ge i.

³⁶Ob ge Jakoba ǁaixa tsî Labanni ǀkha ge ǂnoagu; ob ge Jakoba ǃeream tsî Labanni ǃoa ge mî: Mâsa ti ǃûǂamsa, mâba ti ǁoreba, ots ǀaexase tita go ǃgôaǃgon?

³⁷Ti ommi di xūn hoanats go tsânana ǃnubai, tare-ets go hō sa ommi xūn hoan xa? Nēpa ti ǃgâsagu tsî sa ǃgâsagu aiǃâ ǁîna ǁgui, î gu ǁîga sakhom ǁaegu ǂhanuǂhanu.

³⁸Nē ǀgamdisi kuriga ta ge sa ǀkha ge hâ i; sa gūdi tsî sa piridi tsîdi ge ôasā tama hâ i, sa gūn di ǂkharagūga ta ge ǂû tama ge hâ i.

³⁹ǀKhauǃāhe hâ-e ta ūsība tsi tama, mādawa-am ta gere; sats ge ǁî-e ti ǃomma xu gere ǂgaoǀkhā, tsēa i ga ǃnarihe hâ is, tsuxuba i ga ǃnarihe hâ is hoasa.

⁴⁰Tsēs ai ta ge ǀgammi xa ge hapuhe, tsî tsuxub ǃnâ ǃkhaib xa, ti ǂoms ge ti mûra xu ǂgōs kōse.

⁴¹Tita ge ǀgamdisi kuriga sa ommi ǃnâ ge hâ i; disihakaǀa kurigu kōse ta ge sa ǀgam ǀgôara ǃaroma gere ǃoaba tsi, tsî ǃnani kurigu kōse sa gūn ǃaroma, ots ge ti amǃnâsa disi ǃnādi kōse ge ǀkharaǀkhara.

⁴²Elob ti îb dib tsî Elob Abrahammi dib tsî ǃaoǃgâb Isaki dib ga ti ǀkha hâ tama ga hâ io, o ta ga nēsi ǂanǂansase sats xa ǀkhaiǃnâse sîbēhe hâ. Elob ge ti ǀkhomǀkhomxasib tsî ti ǃomkha di xūreba go mûǀî tsî ǁanǃoe go ǁkhara tsi.

⁴³ǃNubaib ge Labanna ǃeream tsî Jakob ǃoa ge mî: Nē ǀgôara ge a ti ôa tsî nē ǀgôagu ge a ti ôa, tsî nē gūn ge a ti gū, ā nēts ra mûn hoan ge a ti; tsî tare-e ta kha ǁnâi nētsē nē ti ôara tawa nî dī, tsî ǁîra ôagu ǁîra ge ǁoragu tawa?

⁴⁴Hā ǁnâi nēsi, î khom ǃgaeǀhao-e dī tita tsî sats tsîkhoma, î-i ǀhûǀguitimî-i ase hâ tita tsî sats tsîkhom ǁaegu!

⁴⁵Ob ge Jakoba ǀui-e ū tsî ǁî-e ǂâiǂâixūse ge ǂnûikhâi.

⁴⁶Ob ge Jakoba ǃgâsagu âb ǃoa ge mî: ǀUide ǀhaoǀhao go re! O gu ge ǀuide ūkhâi tsî ǀuiǁkhopose ge dī, o gu ge ǁnāpa ǁnā ǀuiǁkhopos ai gere ǂû.

⁴⁷Tsî Labanni ge ǁîsa Jegar-Sahaduta ti ge ǂgai; xawe Jakob ge ǁîsa Galed ti ge ǂgai.

⁴⁸ǃNubaib ge Labanna ge mî: Nē ǀuiǁkhoposa as ǀhûǀguitimî xūse i tita tsî sats tsîkhom ǁaegu. ǁNā-amagan ge ǀons âsa Galed ti ge ǂgai,

⁴⁹tsî Mispa, ǁîb ge mî xui-ao: Ab ǃKhūba mûǂamsisa ūhâ tita tsî sats tsîkhom ǁaegu, ǀguib ga nauba ǂganǃgâba hâ ǃnubai.

⁵⁰Sats ga ti ôara ǁgonǁgonǂgao tsîts ga ti ôara xōǀkhā ǀnî tarade ūo, khoe-i xare-i sakhom tawa a ǀkhai, xawe kō, ob ge Eloba ǀhûǀguitimî-aose nîra hâ tita tsî sats tsîkhom ǁaegu!

⁵¹Tsî Labanni ge ǃaruǀî Jakob ǃoa ge mî: Mû, nēs ge ǀuiǁkhopos ǁkhāsa, tsî mû, nēs ge ǂnûikhâihe hâ saosa, tita go ǂnûikhâisa tita tsî sats tsîkhom ǁaegu.

⁵²Nē ǀuiǁkhopos ǁkhāsa as ǀhûǀguitimîxūse i, tsî nē ǂnûikhâihe hâ saosa as ǀhûǀguitimîxūse ī; tita nē ǀuiǁkhoposa ǃgû-īǀkhā tide ǃkhaisa saǀî, tsî sats nē ǀuiǁkhoposa tsî nē ǂnûikhâihe hâ saosa ǃgû-īǀkhā tide ǃkhaisa titaǀî ǂkhababa ǃoa.

⁵³Elob Abrahammi dib tsî Elob Nahori dib, Elob ǁîkha îb diba ab ǂhanuǂhanu sakhom ǁaegu!

⁵⁴Ob ge Jakoba ǁgûb âb Isaki di ǃaoǃgâb tawa ge nū. ǃNubaib ge Jakoba ǂā-e ge ǂā ǁnā ǃhommi ai, tsîb ge ǃgâsagu âba ge ǁkhau, pereǂû gu nîse; o gu ge pereǂû tsî ǁnā ǃhommi ai ge ǁomǂkhai.

⁵⁵Tsî Labanni ge ǃnauǁgoaga khâi tsî ǁîb di ôagu tsî ǁîb di ôadi tsîna ǁoa tsî ge ǀkhae in; tsî Labanni ge ǃgû tsî ǁkhawa ǁîb ǃās ǃoa ge oa.