Read Khoekhoegowab Genesis 32 Bible Online

Genesis 32 - Khoekhoegowab bible

Genesis 32

¹Tsî Jakob ge ǁkhāti daob âb ai ge ǃgû; tsî ǀhomǃgāgu Elob digu ge ǁîba ge ǃoa.

²Ob ge Jakoba ǁîgab ra mû hîa ge mî: Nēs ge ǂnubis Elob disa. Ob ge ǁnā ǃās di ǀonsa Mahanaim ti ge ǂgai.

³Tsî Jakob ge ais âb aiǃâ sîsabega ge sî Esaub, ǃgâsab âb ǁga Seirǃhūb Edommi ǃhūǃâba ǃoa.

⁴Tsîb ge ǁîga mîmā tsî ge mî: Nēti go nî mî ti ǀhonkhoeb Esaub ǃoa: Nētib ra mî Jakob sa ǃgāba: Tita ge ǃhaokhoese ge ǁan hâ i Labanni tawa, tsî ta ge nēsis kōse ǁnāpa hâ;

⁵tsî ta ge goman, eseln, gūn, ǃgāgu tsî ǃgādi tsîna ūhâ; tsî ta ge go sî, ti ǀhonkhoetsa ta nî mîba kaise, î ta ga sa mûǁae ǀkhomma hō ti.

⁶O gu ge sîsabega Jakob tawa ǁkhawa hā tsî ge mî: Sige ge sa ǃgâsab Esaub kōse go sī; tsîb ra ǁkhāti satsa ǃgûǃoa tsî hakakaidisi aogu ǁîb ǀkha.

⁷ǃNubaib ge Jakoba kaise ge ǃao tsîb ge ǃaoxaǃnâ; ob ge ǁaes ǁîb ǀkha hâs tsî gūn, goman tsî ǃnain tsîna ge ǀgora ǀgam ǂnubira ǃnâ,

⁸nētib ra mî xui-ao: Esaub ga ǀgui ǂnubis ai hā tsî ga ǂnau sio, os ge ǃgau ga ǂnubisa nîra ûi.

⁹ǃAruǀîb ge Jakoba ge mî: O Elots ti îb Abrahammi dits, Elots ti îb Isaki dits, sats ǃKhūts hîa ti ǃoa ge mîtse: ǁKhawa oa sa ǃhūba ǃoa, tsî sa ǀaokhoesisa ǃoa, o ta ge tita sats ǀkha nîra hâ, tsî ta ge satsa nîra ǃgâidī.

¹⁰Tita ge nē ǃgâidīgu hoagu tsî nē îǂhôasib hîats ge ti tawa dīb hoaba a ǂkhariba. Nē ǀkharus tis ǀguis ǀkha ta ge nē Jordanna ge ǃgâu, tsî nēsi ta ge go ǀgam ǂnubi kai xui-ao.

¹¹Tsubuǂui te re ti ǃgâsab di ǃomǁaeba xu, Esaub di ǃomǁaeba xu, ǁîba ta ra ǃao xuige; îb tā ǀnîsi hā ǂnau te ǁgûs ǀgôagu ǀkha!

¹²Sats kom ge mîo: Tita ge ǂanǂansase sa tawa nîra ǃgâidī, tsî tita ge sa suriba nîra mâi hurib amǃgâb di ǁkhaeb hîa ǂguib ǃaroma ǃgôahe ǁoab axase.

¹³Tsîb ge ǁnāpa ǁnā tsuxub ǁkhāb ǃnâ ge ǁomǂkhai; tsîb ge ǃomǁaeb ūhân xa Esaub, ǃgâsab âba ǀkhaexū-e ge ūba:

¹⁴ǀGamkaidisi piridi tsî ǀgamdisi piriga, ǀgamkaidisi gūdi tsî ǀgamdisi ǂkharagūga,

¹⁵ǃnonadisi daisi ra ǃnaide ǂkhamn âdi ǀkha, hakadisi gomadi tsî disi ǁgōga, ǀgamdisi eseldi tsî disi ǂkham eselgu tsîna.

¹⁶Tsîb ge ǁîna ǃgāgu âb di ǃomǁae ge mā, mâ gūn ǃâs hoasa ǀguri; tsîb ge ǃgāgu âb ǃoa ge mî: ǃGû ǃganu go re ti ais aiǃâ, î go ǃkhai-e hâ kai re nē gūn tsî nau gūn hoan ǁaegu!

¹⁷Tsîb ge ǂguroba mîmā tsî ge mî: Esaub ti ǃgâsab ga satsa ǃoa tsîb ga dî tsio: Tarib dits a? Tsî mâǀîts ra ǃgû? Tsî tarib dina nēn, sa ais aiǃâ hâna? ti a mîo,

¹⁸ots ge nî mî: Nēn ge ǃnarexūn sa ǃgāb Jakob din, ti ǀhonkhoeb Esaub ǃoa go sîhena; tsî mû, ǁîb ǂûb ge ǁkhāti sige khaoǃgâ hâ.

¹⁹Tsîb ge ǁkhāti ǀgamǁîba ge mîmā, tsî ǁkhāti ǃnonaǁîba, tsî ǁîna gūde ra saon hoana, mî raǃâ: Nē mîs ǁkhāsa du ge nî ǃhoa Esaub ǃoa, ǁîba du ga hō o.

²⁰Tsî du ge ǁkhāti nî mî: Mû, sa ǃgāb Jakob ge sida khaoǃgâ hâ! Nētib ra mî amaga: Tita ge ǁîb di aisa nē ǃnarexūn, ti ais aiǃâ ǃgûgaun ǀkha nî ǂkhî kai; tsî ǁnās khaoǃgâ ta ge ais âba nî mû; ǀnîsib ge ti aisa nî ǃkhōǃoa.

²¹Nētin ge ǀkhaexūna ǁîb di ais aiǃâ ge ǃgû-ūhe; xaweb ge ǁîba ǁnā tsuxub ǁkhāba ǁgoeǃkhais ai ge ǁomǂkhai.

²²Tsîb ge ǁnā tsuxub ǁkhāb ǃnâ khâi tsî ge ū ǁîb di ǀgam tarara tsî ǁîb di ǀgam ǃgāra tsî ǁîb di disiǀguiǀa ǀgôaga, tsîb ge Jabokǃāb di ǃgâuǃkhaisa-ū ge ǃgâu.

²³Tsîb ge ǁîna ū tsî ǁnā ǃāroba ge doeǃgâu kai; tsîb ge ūb hâna ge doeǃgâu kai.

²⁴Xawe Jakob ǂûb ge ǀguri ge ǃgau; tsî khoeb ge ǁîb ǀkha ge ǃkham ǁgoaǂnobos ge ǁhais kōse.

²⁵Tsî mûb geo dan bi ǁoab a ǃkhaisa ob ge Jakob ǂnamib di uniǁaesa ge tsâǀkhā, Jakob ǂnamib di uniǁaes ge ǃoes kōse, ǁîb ǀkhab ra ǃkham hîa.

²⁶Ob ge ǁîba ge mî: A ta ǃgû ǁgoaǂnobos go ǁhai xuige. Xaweb ge ge mî: Tita ge satsa ǃgû kai tide, titats ga ǀkhae tama io.

²⁷Ob ge ǁîba ǁîb ǃoa: Matits ǀon hâ? ti ge mî. Ob ge: Jakota, ti ge mî.

²⁸Ob ge ǁîba ge mî: Sa ǀons ge aiǃâb ǃoa Jakob ti ǂgaihe tide tsî Israel ti nî ǂgaihe: Sats ge gaosase go tanisen Elob tsî khoen tsîn ǀkha tsîts ge go dan amaga.

²⁹Ob ge Jakoba dî tsî: Sa ǀonsa ǂanǂan te re, ti ge mî. Ob ge ǁîba: Tare xū-i ǃaromasa ti ǀonsats ra dîsa? ti mî tsî ǁnāpa ge ǀkhae bi.

³⁰Tsî Jakob ge ǀons ǁnā ǃās disa Penuel ti ge ǂgai: Eloba ta kom aisa xu ais ǃoa go mûo, tsî ti ǀoms kom go ǂuruo, tib ra mî xui-ao.

³¹Tsî sores ge ge ǁhaiba bi, Penuelsab ǃgûǃganu hâ hîa; tsîb ge ǂnamib âb ǃnâ gere ǀī.

³²ǁNā-amagan ge Israeli ôana ǃoe hâ ǁapab ǂnamib di uniǁaes ai ǁgoeba ǂû tama hâ, nētsēs kōse, ǁîb ge uniǁaes Jakob ǂnamib disa a tsâǀkhā xui-ao ǁnā ǃoe hâ ǁapab tawa.