Read Khoekhoegowab Genesis 33 Bible Online

Genesis 33 - Khoekhoegowab bible

Genesis 33

¹Tsî Jakob ge ǃgapakhâi tsî ge kō tsî mû, Esaub ge ǃgoaxa tsî hakakaidisi aogu ǁîb ǀkha hâ ǃkhaisa. ǃNubaib ge ǀgôaga ge ǀgora Leas ǃnâ tsî Raxels ǃnâ tsî ǀgam ǃgāra ǃnâ.

²Tsîb ge ǃgāra tsî ǁîra di ôagu tsîna aisǀkhāb ai ge mâi; tsî Leas tsî ǁîs di ôana ǁîn khaoǃgâ; tsî Raxels tsî Joseb tsîra hoan khaoǃgâ.

³Tsîb ge ǁîba ais âna ǃgû-īǀkhā tsî hû ǃnādi kōse ge ǃgamǃgâ ǃhūb ai, ǃgâsab tawab ge sīs kōse.

⁴ǃNubaib ge Esauba ǃkhoeǃoa bi tsî ǁôab ǃnâ ū bi tsî ǁnam bi tsî ge ǁoa bi; tsî kha ge ge ā.

⁵ǁNās khaoǃgâb ge ǃgapakhâi tsî ǁnā taradi tsî ǀgôan tsîna mû tsî ge mî: Tarina nēn sa ǀkha hâna? Ob ge ge mî: ǁNā ǀgôan, Elob ge ǀkhomxase sa ǃgāta ǀkhaen ge ǁîna.

⁶ǃNubai ra ge ǃgāra dāsī, ǁîra tsî ǁîra di ôan tsîna tsî ge ǃgamǃgâ.

⁷Tsîs ge ǁkhāti Leasa ge dāsi ǁîs di ôan ǀkha, tsîn ge ge ǃgamǃgâ; ǁnās khaoǃgâ ra ge Joseb tsî Raxels tsîra dāsī tsî ge ǃgamǃgâ.

⁸Ob ge ge mî: Tarib dis ases hâba tsi ǁnā ǂnubis, hîa ta go ǃoas hoasa? Ob ge ge mî: ǀKhomma ta nî hōga ti ǀhonkhoeb mûǁae.

⁹Ob ge Esauba ge mî: Tita ge kaise ūhâ, ti ǃgâ, a-i ūts hâ-e sase hâ!

¹⁰ǃNubaib ge Jakoba ge mî: Hî-î, ǀkhomma ta ga sa mûǁae hō hâo, ǁnâi ti ǀkhaexūna ū re ti ǃomǁaeba xu, sa aisa ta ge Elob aisa ta mû hâ khami go mû xuige, tsî ti ǃnâts go ǃgâibahe xuige.

¹¹Ū tsi go ti ǀkhaeba, ūsībahets goba, Elob ge ǁîba ǀkhomxase mā te xuige tsî xūn hoana ta ūhâ xuige; nētib ge ge ǁgari bi, ob ge ge ū.

¹²Tsîb ge ge mî: A khom ǃgû, î khom aiǃâb ǃoa doe, î ta tita sa aiǃâ doe!

¹³Xaweb ge ǁîb ǃoa ge mî: Ti ǀhonkhoets ge a ǂan, nē ǀgôan a ǂkham ǃkhaisa tsî daisi ra gūdi tsî gomadi tsîna ta ti ǀkha ūhâ ǃkhaisa; sats khoets ga ǁîna ǀgui tsēs ǀguis ai ǁkhōse doeǁgao, on ge gūn hoana nîra ǁō.

¹⁴Îts ti ǀhonkhoetsa doe-ī sa ǃgāta di ais aiǃâ; o ta ge tita ǂgaeǂgui-aota ase ǂause nî saoǁae, sîsenni ti ais aiǃâ hâb ga mā-am te khami tsî ǃgûs nē ǀgôan dis ga ība te khami, ti ǀhonkhoets tawa ta nî Seiri tawa sīs kōse.

¹⁵Ob ge Esauba ge mî: Î ta ǁnâi nē ǁaes ti ǀkha hâs xa māǀaroba tsi. Ob ge ǁîba ge mî: Tare xū-i ǃaromasa? A ta ǀkhomma hō re ti ǀhonkhoets mûǁae.

¹⁶Nētib ge Esauba ǁnā tsēs ai ǁkhawa daob âb ai Seiri ǃoa ge oa.

¹⁷Xawe Jakob ge Sukots ǃoa doesī tsî omma ge ǂnubibasen tsî ǀgoana ǃharade ge dība; ǁnā-amagab ge ǁnā ǃās di ǀonsa Sukot ti ge ǂgai.

¹⁸Tsî Jakob ge sâusase ǃās Sexems, Kanaanǃhūb ǃnâ ǁgoes tawa ge sī, Padan-Aramǃhūǃâsa xub ge hāo; tsîb ge ǃās di ais ǃnâ ge sī ǁgoe.

¹⁹Tsîb ge ǁnā ǃhanab tentoms âbab ge ǁîb ai ǂnaumâib di ǃâ-e ge ǁama Hamori, Sexemmi îb ôagu di ǃomma xu ǀguikaidisi marin ama.

²⁰Tsîb ge ǁnāpa altarsa ge ǂnubikhâi tsî ǁîba Israeli Elob ge a Elo ti ge ǂgai.