Read Khoekhoegowab Genesis 34 Bible Online

Genesis 34 - Khoekhoegowab bible

Genesis 34

¹Tsî Dinas, Leas ôas, Jakobas ge ǁorabas ge ge ǃgûǂoa, ǁnā ǃhūb ǀgôades nî kōse.

²Tsî Sexemmi, Hamori ôab, Hiviǁîb, ǃhūb di gaosab ge mû si ob ge ū si tsî ǁîs ǀkha ǁgoe tsî ge ǀgaiǁgūǀkhā si.

³Tsî ǀoms âb ge Dinas, Jakob ôasa ge ǂae-ai; tsîb ge ǀgôasa ǁâ tsî ǀgôas di ǂgaob ǃoa ge ǃhoa.

⁴Ob ge Sexemma ǁkhāti Hamori, ǁgûb ǀkha ǃhoa tsî: Nē ǀgôasa tarase ǂganba te re! ti ge mî.

⁵Tsî Jakob ge ǁnâu ǁîb ôas Dinasab go ǀuriǀuri ǃkhaisa ǃnubai gu ge ǁîb di ôaga ǀgoan ǀkha ǃgarob ai ge hâ i; ob ge Jakoba ge ǃnō, ǁîgu ge hās kōse.

⁶Ob ge Hamori, Sexemmi îba, Jakob ǃoa ge ǂoa, ǁîb ǀkhab nî ǃhoase.

⁷O gu ge Jakob ôaga ǁnâu gu geo ǃgaroba xu ge hā; tsî gu ge nē khoega tsûaǂgao tsî kaise ge ǁaixa, Israeli ǃnâb ge tsūdī-e go dī amaga, Jakob ôasa ra ǁom-ūse, ǃkhai-i hîa ga ǁnāti dīhe hâ ga tide-e.

⁸ǃNubaib ge Hamora ǁîgu ǀkha ǃhoa tsî ge mî: Ti ôab Sexemmi di ǀoms ge sadu ôasa ǁâ hâ, mā si re ǁîba tarase,

⁹î du ǀuigu re sida ǀkha; sadu di ôade sida mā re î du sida ôade sado ūbasen re;

¹⁰î du sida ǀkha ǁan re; ǃhūb ge sadu ais aiǃâ hâ, ǁîb ǃnâ ǁan, î du ǁamagusa dī re, î du ǁîb ǃnâ xūna ūhâ re.

¹¹Tsîb ge Sexemma ǁîs di îb tsî ǁîs di ǃgâsagu ǃoa ge mî: A ta ǀkhomma hō re sago mûǁae; tsî sago ga mîba te xū-e ta ge tita nî mā.

¹²Kaise ǁguiǂam te re khāǁuib tsî ǀkhaexūb tsîra; î du ǁnâi ǀgôasa tarase mā te re!

¹³O gu ge Jakob ôaga Sexemmi tsî Hamori ǁgûb âba gāxaǃnâsise ǃeream tsî ge ǃhoa, Dinas ǁîgu di ǃgâsasab go ǀuriǀuri amaga.

¹⁴Tsî gu ge ǁîgu ǃoa ge mî: Sige a dī ǁoa ǃkhais ge nēsa, sige ǃgâsasa ge nî aikhōb ǀkha hâ ao-e māsa; ǁîs kom ga taoǃkhaise ība geo.

¹⁵Xawe nēs ǃnâ ge nî sadu ǀkha ǀgui, sadu ga sida ǀkha ǀguiti-īo, sadu ǃnâ hâ aore-i hoa-i ga ǃgaohe ti;

¹⁶ǃnubai da ge sida ôade sado nî mā, o da ge sadu ôade sida nî ūbasen, o da ge sadu ǀkha nî ǁan, o da ge ǀgui ǁaese nî ī.

¹⁷Xawe sida ǀkha du ga ǀgui tama io ǃgaokaisens xa, o da ge sida ôade ū tsî nî doebē.

¹⁸Tsî nē mîdi âgu ge ǃgâi ge i Hamori mûǁae tsî Sexemmi, Hamori ôab mûǁae.

¹⁹Ob ge ǂkhamkhoeba ǀhawe tama nē ǃkhaisa dīsa, Jakob ôasab ǁkhore hâ amaga; tsîb ge ǁgûb ommi ǃnâ hân hoan ǃgâ-ai ge ǃgôahe.

²⁰Nēti kha ge Hamori tsî Sexemmi ǀgôab âb tsîkha ǃās dao-ams ǃnâ sī tsî ǁîkha ǃās di aogu ǀkha ǃhoa tsî ge mî:

²¹Nē aogu ge a ǂkhîxa sage ǀkha; ǁnā-amaga a gu nē ǃhūb ǃnâ ǁan, î gu ǁîb ǃnâ ǁamagusa dī, îb ǃhūba, kaiseb kom a harao, ǁîgu di ais aiǃâ hâ, o ge sage ǁîgu ôade tarase nî ū, tsî ge ge ǁîga sage ôade nî mā.

²²O gu ge nē aoga nēs ǃnâ nî ǀgui sage ǀkha, sage ǀkhan nî ǁan tsî ǀgui ǁaese īsa: Mâ aoreb sage dib hoab ga ǃgaoheo, ǁîgu ǃgaohe hâs ǁkhās khami.

²³ǁÎgu di ǀgoan tsî ū gu hân tsî ǁîgu di goman hoana, sage di kain tide? Nēs ǀguis ǃnâ a ge ǁîgu ǀkha ǀgui, o gu ge sage ǀkha nî ǁan.

²⁴Tsî gu ge Hamori tsî Sexemmi ǁîb di ôab tsîkha ge ǁnâuǀnam ǁnāgu ǁîb ǃās di dao-amsa-ū ra ǂoagu hoaga; o gu ge ge ǃgaohe, aoregu ǁîb ǃās di dao-amsa-ū ra ǂoagu hoaga.

²⁵Tsî i ge ǃnonaǁî tsēs ai ge ī, tsûb ǃnâ gu hâ hîa kha ge Jakob ôakha, Simeonni tsî Levib tsîkha, Dinas ǃgâkha, mâb hoab âkha gôab âba ū tsî ǁkhoaǂgaoxase ǃās ǃnâ sī tsî aoregu hoaga ge ǃgam.

²⁶Tsî kha ge ǁkhāti Hamori tsî ǁîb di ôab Sexemmi tsîkha gôab di ǀāb ǀkha ge ǂnau; tsî kha ge Dinasa Sexemmi di omma xu ūǂui tsî ǁnāpa xu ge bē.

²⁷O gu ge Jakob ôaga ǂnauǃanhe hâgu ai hā tsî ǃāsa ge ǁkhâuǂuiǃnâ, ǁîgu di ǃgâsasa gu go ǀuriǀuri amaga.

²⁸ǁÎgu di gūn, goman, eseln, ǃās ǃnâ hân tsî ǃgarob ai hân, ǁîna gu ge ge ū.

²⁹Tsî ū gu hân hoan, ǁîgu ǀgôaron hoan tsî ǁîgu di taradi tsîna gu ge ǃkhōsase ge ǃgû-ū tsî ǁîna ge ǀâǀhana tsî ommi ǃnâ hân hoana.

³⁰ǃNubaib ge Jakoba Simeonni tsî Levib tsîkha ǃoa ge mî: Sakho ge tita go gongonǃnâ, tita ra ǀō kaise nē ǃhūb ǃnâ ǁan hân ǃnâ, Kanaanǁîn ǃnâ tsî Perisiǁîn ǃnâ; tsî tita ge ǀoro ǁaes â-i khoeta; ǁîn ga ti ǃoagu ǀhûo, on ge tita nîra ǂnau, o ta ge nîra hîkākāhe tita tsî ti ommi tsîna.

³¹O kha ge ǁîkha: ǁNâib kha ǁîba sikhom di ǃgâsasa ǀai-aose nî sîsenū? ti ge mî.