Read Khoekhoegowab Genesis 35 Bible Online

Genesis 35 - Khoekhoegowab bible

Genesis 35

¹ǁNās khaoǃgâb ge Eloba Jakob ǃoa ge mî: Khâi îts Bet-Els ǃoa doe îts ǁnāpa sī ǁan; îts ǁnāpa altarsa sī dība ǁnā Elob, hîa sats tawa ge ǂhaiba, sa ǃgâsab Esaub di aisa xuts ge ǁhâ ǃnubai.

²Ob ge Jakoba ǁîb ommi din ǃoa tsî ǁîb ǀkha hân hoan ǃoa ge mî: ǃHao elogu sadu ǁaegu hâga dībē, î du ǃanuǃanusen î du sarana ǀkharaǀkhara;

³î da khâi î da doeǃapa Bet-Elsa ǃoa; o ta ge tita ǁnāpa altarsa nî dība ǁnā Elob, hîa tita ge ǃereamma ti ǂōǂōsib di tsēs ai, tsî tita ǀkha hâ ge iba ǁnā daob, hîa ta gere ǃgûb ai.

⁴ǃNubain ge Jakoba ǁnā ǃhao elogu, ǁîn ǃomǁae hâgu hoagu tsî ǃganudi hîa ǁîn ǂgaedi ǃnâ hâdi tsîna ge mā, tsî Jakob ge ǁîna terpentinhais Sexems tawa hâs ǃgao ge gaugau.

⁵On ge ge ǂnauǁnâ; tsî ǃhuriǃhuris Elob dis ge ǃādi, ǁîn ǂnamipe hâdi ai ge hâ i, on ge Jakob ôaga sauruǃgon tama.

⁶Nētib ge Jakoba Lus, Kanaanǃhūb ǃnâ ǁgoes, Bet-El ti ǀon hâs tawa ge sī, ǁîb tsî ǁîb ǀkha hâ ǁaes hoasa.

⁷Ob ge ǁnāpa altarsa ǂnubi tsî ǁnā ǃāsa Elob Bet-El ti ge ǂgai, Elob ge ǁnāpa ǁîb tawa ǂhai hâ is ǃaroma, ǃgâsab âb di aisa xub ge ǃhū ǃnubai.

⁸Tsî Deboras, Rebekas di ǃhai-aos, ge ǁnāpa ge ǁō, os ge Bet-Els ǃnaga ǁnā ǁganahais, ǀons âs ǃGaes di ǁganas, ti ra ǂgaihes ǃgao ge ǁkhōhe.

⁹Tsî Elob ge Jakob tawa ǁkhawa ge ǂhai, Padan-Aramǃhūǃâsa xub ge hā hâ i ǃnubai; tsîb ge ǁîba ge ǀkhae.

¹⁰Tsî Elob ge ǁîb ǃoa ge mî: Sats ge Jakob ti ǀon hâ; ǃaruǀîs ge sa ǀonsa Jakob ti ǂgaihe tide, tsîts ge Israel ti nî ǀon; ob ge Israel ti ge ǂgai ǀons âba.

¹¹ǃAruǀîb ge Eloba ǁîb ǃoa ge mî: Tita ge Elota Hoaǀgaixata; ǂûǂûxaǃnâ îts ǂguiǂguisen! ǁAe-i, ā, ǁaedi di ǂguib ge sa xu nîra ǀkhī, tsî gao-aogu ge sa kamanaba xu nîra ǂoaxa.

¹²Tsî nē ǃhūb, hîa ta Abrahammi tsî Isaki tsîkha ge māb, ǁîba ta ge tita satsa nîra mā, tsî sa suriba sa khaoǃgâ ta ge tita nē ǃhūba nîra mā.

¹³ǃNubaib ge Eloba ǁîba xu ge ǃapa, ǁnā ǃkhais ǁîs aib ge ǁîb ǀkha gere ǃhoasa xu.

¹⁴Ob ge Jakoba ǂnûikhâihesa sao-e ge ǂnûikhâi ǁnā ǃkhais, ǁîs aib gere ǃhoa-ū bis tawa, ǂâiǂâisao-e ǀui-i xa; tsîb ge ǁî-i ai āǁguibasa ge ǁhō tsî ǁnui-i xa ge ǂnâ.

¹⁵Tsî Jakob ge ǁnā ǃās Elob ge ǁîs ai ǁîb ǀkha gere ǃhoasa, Bet-El ti ge ǂgai.

¹⁶Tsîn ge Bet-Elsa xu ge dāǁnâ; tsî ǂkhari ǃhūǃâro-i ǀgui-i ge hâ i, Efratas tawats nî sīs kōse, ǃnubais ge Raxelsa ge ǁora, tsîs ge ǁoras âs ǃnâ ge ǃgombahe.

¹⁷Tsî i ge ge ī ǁoras âs ǃnâs ra ǃgombahe hîas ge ǂnûritarasa ǁîs ǃoa ge mî: Tā ǃao re, nē ǀgôabas ǁkhāti nîra ūhâ xuige!

¹⁸Tsî i ge ge ī, ǀoms âs ra ǂoa (ǁōs kom geo) hîas ge ǀons âba Ben-Oni ti ge ǂgai, xawe ǁgûb ge Benjamin ti ge ǂgai bi.

¹⁹Nētis ge Raxelsa ge ǁō; os ge ge ǁkhōhe, ǁnā daob Efratas, (ǁnās ge Betlehemsa) ǃoa gaub amǃgâ.

²⁰Tsî Jakob ge ǂâiǂâisao-e ge ǂnûikhâi ǀhobas âs ǂamai. ǁÎs ge ǂâiǂâisaos Raxels ǀhobas disa nētsēs kōse.

²¹ǃNubaib ge Israela dāǁnâ tsî tentoms âba Migdal-Eders nau ǀkhāb ai ge ǂnaumâi.

²²Tsî i ge ge ī Israeli ǁnā ǃhūb ǃnâ ǁan hâ hîab ge Rubenna ǃgûsī tsî Bilhas, ǁgûb di ǀgamitaras ǀkha ge ǁgoe; tsî Israeli ge ǁîsa ge ǁnâu. Tsî Jakob ôagu ge disiǀgamǀa ge i:

²³Leas ôagu ge Rubenni, Jakob di ǂguroǃnaesabeb, tsî Simeonni tsî Levib tsî Judab tsî Isaskari tsî Sebulonni tsîga ge i.

²⁴Tsî Raxels ôakha ge Joseb tsî Benjaminni tsîkha ge i.

²⁵Tsî Bilhas, Raxels ǃgās di ôakha ge Danni tsî Naftalib tsîkha ge i.

²⁶Tsî Silpas, Leas ǃgās di ôakha ge Gadi tsî Aseri tsîkha ge i. Nēgu ge Jakob ôaga Padan-Aramǃhūǃâs ǃnâb ge ǁorabahega.

²⁷Tsî Jakob ge Isaki, ǁîb îb tawa ge sī Mamres ǃnâ, Kirjat-Arbas tawa; ǁîs ge Hebrons, ǁîs aib ge Abrahamma ǃhaokhoese hâ isa, tsî Isaki ona.

²⁸Tsî tsēdi Isaki didi ge ǀguikaidisi tsî ǁkhaisadisi kuri ge i.

²⁹Tsî Isaki ge gagasa mā tsî ge ǁō, tsîb ge ǁaedi âb tawa ge ǀhaoǀhaohe, kaira tsēdi xa ǀhupu hâse; tsî ǁîb di ôakha Esaub tsî Jakob tsîkha ge ǁîba ge ǁkhō.